Ինչ պետք է, իշխանությունը չի անում, մեր հայորդիները մնացել են միայնակ․ Ալավերդյան

Ըստ պաշտոնական տվյալների՝ ադրբեջանական բանտերում այժմ 19 հայ գերի է պահվում, նրանք դատապարտվել են 15 տարուց մինչեւ ցմահ ազատազրկման։ Այս ընթացքում նրանք ենթարկվել են հալածանքների, կտտանքների եւ հոգեբանական ծանր սթրեսների: Մինչդեռ ՀՀ Մարդու իրավունքների պաշտպանն այս ամենը մեկնաբանում է մեկ նախադասությամբ՝ նրանց մաղթելով շուտափույթ ազատում: Հարցի շուրջ «Իրավունք»-ը զրուցել է ՀՀ Մարդու իրավունքների առաջին պաշտպան ԼԱՐԻՍԱ ԱԼԱՎԵՐԴՅԱՆԻ հետ:

— Օրերս «Միջազգային եւ համեմատական իրավունքի կենտրոնի» ղեկավար, ՄԻԵԴ-ում հայ գերիների շահերի ներկայացուցիչ, փաստաբան Սիրանուշ Սահակյանն ասել է, որ մեր հայ գերիներից երկու անձի վրա եղել է դաջվածք՝ խաչի տեսքով, որոնք Ադրբեջանի բանտում այրել են եւ այդ երկու հայ գերիներին ենթարկել փաստացի խոշտանգման։ Այս ամենից հետո՝ կրկին լռում է ՄԻՊ-ը: Ի՞նչ կասեք այս մասին։

— Կասեմ հետեւյալը՝ իշխանության հայտարարությունները գրեթե ամբողջապես վերաբերում են դեպի Եվրոպա ճանապարհ բռնելուն։ Սիրելինե՛րս, խոշտանգումների մասին Եվրոպական կոնվենցիան հիմնականում նվիրված է Խոշտանգումների կանխարգելման կոմիտեի ստեղծմանը, նրա կառուցվածքին, նրա գործառույթին։ Ի դեպ, մենք այդ կոմիտեի անդամ ենք: Ըստ այդմ, կարծում եմ, ամենաճիշտ ճանապարհն է դիմել հենց այդ կառույցին։ Խոշտանգումների կանխարգելման կոմիտեի կայքի վրա վերջին զեկույցը 2023 թվականի զեկույցն է։ Այն, ինչ այս ընթացքում մենք տեսնում ենք, թե ինչ է կատարվում, եւ այս առումով Ադրբեջանում արդեն երեք տարի գտնվող մեր  հայորդների վիճակը պատկերացնո՞ւմ եք: Այսինքն՝ 2023 թվականից հետո Խոշտանգումների կանխարգելման կոմիտեն դա չի նայել:

Ի՞նչն է խանգարում հատուկ զեկույցով հանդես գալ Մարդու իրավունքների պաշտպանին ու դիմել այդ կոմիտեին, դիմել ՄԱԿ-ին: Եվ ընդհանրապես, ես էլի եմ ասում՝ այն, ինչ պետք է, իշխանությունը չի անում: Ինձ համար այստեղ գրեթե չկան փակ ինչ-որ հարցեր: Ես էլի եմ շեշտում՝ ունեմ հիմնավոր կասկածներ՝ այս իշխանության հետ կապված, այսպես ասած, այս պատմության մեջ խառնված լինելու հարցում, բայց Մարդու իրավունքների պաշտպանը պետք է արձագանքի, եւ դա նրան ոչ միայն կզարդարի, այլ նաեւ կզարդարի հենց այս իշխանություններին, որոնք մատը մատին չեն տալիս:

Որեւէ մեկը չի կարող պահանջել Մարդու իրավունքների պաշտպանից, որ վերջինս անի ավելին, քան ինքը կարող է, բայց նա գոնե կարող է արձագանքել։ Ի դեպ, ինքը կարող է հանդես գալ հայտարարություններով։ Հիշեցնեմ, որ Միջազգային Կարմիր խաչի կոմիտեն հանված է Ադրբեջանից, այսինքն՝ ավելի քան տարօրինակ վիճակ է, երբ մեր հայորդիները հայտնվել են ամբողջովին միայնակ՝ անազատության մեջ, այնպիսի իշխանությունների իրավունքների ներքո, որոնք իրենց անվանում են «պետական ահաբեկիչ»։ Չի կարելի՞, ի վերջո, ուղղակի, Մարդու իրավունքների պաշտպանի մակարդակով այցելել եւ այդ ամեն ինչը լուծել: Եթե իշխանություններն ու պաշտպանը խելացի մոտենան, նրանք կտեսնեն, որ որեւէ մի խոչընդոտ չկա, Մարդու իրավունքների պաշտպանի համար գործել ակտիվ, դիմել Եվրոպական կոմիտեին, ՄԱԿ-ին։

ՆԱՆԱ ՍԱՐԳՍՅԱՆ

Այս թեմայով Լրացավ վեցերորդ տարին, որ ֆիզիկապես մեզ հետ չես. Հերոսի հայր Ինչ պետք է, իշխանությունը չի անում, մեր հայորդիները մնացել են միայնակ․ Լարիսա Ալավերդյան Բաղդասարյանների գերդաստանը Խաչվերածը նշեց հավերժի ճամփան բռնած ՆԻՆԱ ՄԱՅՐԻԿԻ հիշատակի առաջ խոնհարմամբ Հորդորում եմ մեր Մարդու իրավունքների պաշտպանին անպայման արձագանքի եւ այցելի հայ գերիներին. Ալավերդյան ԾՆՈՒՆԴԴ ՇՆՈՐՀԱՎՈՐ ԱՐԹՈՒՐՍ. Մայոր Արթուր Ալավերդյանը կդառնար 34 տարեկան