Նարեկ Կարապետյանը տակավին երիտասարդ է, ինքն էլ չի հիշո՞ւմ․ ԶԱՐՄԱՆՔ

Ազգային ժողովի «Ուժեղ Հայաստան» խմբակցության ղեկավար ՆԱՐԵԿ ԿԱՐԱՊԵՏՅԱՆԸ խրոխտ հայտարարել է, թե 2026 թվականի խորհրդարանական ընտրություններին ընդդիմադիր 4 ուժերը ստացել են 80 տոկոսով ավելի շատ ձայն, քան 2021-ին։ «Ընդդիմությունը ստացել է համարյա թե 2 անգամ ավելի շատ ձայն․ եւ Հայաստանում դեռ կա՞ն հուսահատ հայրենակիցներ, որոնք չեն հավատում, թե ՔՊ-ն հեռանալու է», - հարց է բարձրացնում ինքն իր մանդատից գոհ Կարապետյան կրտսերը։ Ինչ խոսք, թվերը կարող են շատ գեղեցիկ դասավորվել, տոկոսները՝ ավելի խոսուն լինել, բայց ընտրողը սովորաբար հիշում է ոչ թե տոկոսների աճը, այլ արդյունքը։ Իսկ մանդատավոր ընդդիմության արդյունքն իրականում զրո է, Նիկոլ Փաշինյանն ու ՔՊ-ն՝ իշխանություն։ Ու երբ ընտրություններին պարտությունից հետո՝ «Ուժեղ Հայաստան»-ը դեռ փորձում է հաղթական տրամադրություններ տարածել՝ սեփական համակիրներին հերթական անգամ հույս վաճառելով, պարզ է դառնում, որ հիմա էլ դասեր չեն քաղել։ Ի վերջո, շատերը գուցե մոռացել են, բայց Նարեկ Կարապետյանը տակավին երիտասարդ է, ինքն էլ չի հիշո՞ւմ, որ նախընտրական քարոզարշավի ժամանակ ժողովրդին ոչ թե տոկոսներ էր խոստանում անձամբ ինքը, այլ Հանրայինի եթերում, անդրադառնալով Նիկոլ Փաշինյանին, հայտարարում էր, որ «իզուր եք այս մարդուն այսքան հարց տալիս․ նա 3-4 օրից իշխանության չի լինելու»։

Իսկ ահա «Ուժեղ Հայաստան» խմբակցության պատգամավոր Էդգար Ղազարյանով որոշել է զբաղվել ԱԺ իշխող «Քաղաքացիական պայմանագիր» խմբակցության պատգամավոր ՍԱՍՈՒՆ ՄԻԱՔԱՅԵԼՅԱՆԸ։ Վերջինս, անդրադառնալով Էդգար Ղազարյանին, ասել է, որ վերջինս իրավունք չունի վիրավորական արտահայտություններով ելույթ ունենալ, եւ հորդորել է ԱԺ խոսնակին ու ընդդիմության ներկայացուցիչ փոխխոսնակին կարգի հրավիրել նրան։ «Էդգարիկը ոչ մի բարոյական իրավունք չունի, որ հելնի խոսա, «Ուժեղ Հայաստանի» հարգելի պատգամավորներ, չգիտեմ ինչ։ Այդ գործելաոճը փոխե՛ք։ Մեր երկրին, ժողովրդին ենք ծառայում։ Չենք եկել այստեղ մարտի դաշտ, ձեր արածը հետո դաժան հետեւանք կունենա»,- սպառնացել է Միքայելյանը։ Լրատվամիջոցների հետ զրույցում էլ Էդգար Ղազարյանն ընդգծել է․ «ԵԿՄ-ն մարտական զենքով ծառայություն է իրականացնում, սպառնալիքին պետք է լուրջ վերաբերվել»։ Այսքանից հետո՝ տպավորությունն այնպիսին է, որ ավելի մոտ ենք եթե ոչ մարտի դաշտին, ապա արդեն քրեական քրոնիկայի ժանրին, բայց ոչ խորհրդարանական ու քաղաքական բանավեճի։

Աշխարհում էլ զարմանալի դեպքերի պակաս չկա։ Արհեստական բանականությանը, պարզվում է՝ այլեւս ո՛չ օրենք է պետք, ո՛չ վերահսկողություն, ո՛չ էլ մասնագետների խորհուրդ։ Բավական է պարզապես ուժեղ եւ խելացի նախագահ ունենալ։ ԱՄՆ նախագահ ԴՈՆԱԼԴ ԹՐԱՄՓԸ հերթական անգամ մարդկությանը մատուցել է իր պատկերացրած տեխնոլոգիական փրկության բանաձեւը։ «Միակ վերահսկողությունը կամ «սահմանափակիչները», որոնք անհրաժեշտ են արհեստական բանականությանը, ուժեղ եւ խելացի (բարձր IQ-ով) նախագահն է, եւ ԱՄՆ-ը լիլուլի հարուստ է դրանով»,- գրել է Թրամփը։ Այսինքն՝ ալգորիթմները կարող են սխալվել, համակարգերը՝ անկանխատեսելի վարք դրսեւորել, իսկ տեխնոլոգիական հսկաները՝ հսկայական ազդեցություն ունենալ։ Բայց անհանգստանալու կարիք չկա․ Վաշինգտոնում կա «բարձր IQ-ով» նախագահ։ Այսպիսով, արհեստական բանականության ապագան կարծես թե վերջապես պարզ է․ ոչ թե արհեստական բանականությունը պետք է ունենա վերահսկողություն, այլ վերահսկողությունը պետք է ունենա Թրամփ։ Իսկ մնացածը, ինչպես ասում են, թող լուծի բարձր IQ-ն։

ԶԱՐՄԱՑԱԾ Է «ԻՐԱՎՈՒՆՔ»-Ը

Այս թեմայով Եկան, տեսան, բայց հաղթելու փոխարեն՝ գնացին «Ուժեղ Հայաստան»-ը մարզերում ընկել է դռնեդուռ. ԲԱՄԲԱՍԱՆՔ Սամվել Կարապետյանը դատի է տվել Նիկոլ Փաշինյանին․ պահանջում է 3 մլն դրամ և ներողություն խնդրել Տեսանյութը շուրջ 1․5 տարի առաջ է նկարահանված․ ՆԳՆ-ն՝ Նարեկ Նալբանդյանին ձերբակալելու տեղեկությունների մասին Ավինյանի մամուլի քարտուղարն ազատվել է աշխատանքից