Հորդորում եմ մեր Մարդու իրավունքների պաշտպանին անպայման արձագանքի եւ այցելի հայ գերիներին. Ալավերդյան

Բաքվի բանտում հայ գերիների կարգավիճակը ծայրահեղ մտահոգող է: Վերջերս, ցմահ դատապարտված Արցախի Ազգային ժողովի նախկին նախագահ, Բաքվում պատանդառված Դավիթ Իշխանյանն ուղերձ է հղել ՀՀ ում Մարդու իրավունքների պաշտպանին եւ առաջարկել այցեցել Բաքվի բանտ՝ տեղեկանալու համար հայ գերեվարվածների կարգավիճակից: Մարդու իրավունքների պաշտպան Անահիտ Մանասյանն ի պատասխան արձագանքել է, որ ավելին ասելիք չունի, միայն շուտափույթ ազատում է մաղթել հայ գերիներին: Հիշեցնենք, որ, ըստ պաշտոնական տվյալների, ադրբեջանական բանտերում այժմ 19 հայ գերի է պահվում, նրանք դատապարտվել են 15 տարուց մինչեւ ցմահ ազատազրկման։

Այս մասին «Իրավունք»-ը զրուցել է ՀՀ Մարդու իրավունքների առաջին պաշտպան ԼԱՐԻՍԱ ԱԼԱՎԵՐԴՅԱՆԻ հետ:

— Օրեր առաջ Բաքվի բանտից Դավիթ Իշխանյանը դիմել էր Հայաստանի Մարդու իրավունքների պաշտպան Անահիտ Մանասյանին, հրավիրել նրան ադրբեջանական բանտ՝ տեսակցելու այնտեղ պահվող հայ գերիներին, ինչին ՄԻՊ-ը տվել է պատասխան, որը մերժելուն հավասարազոր է: Ի՞նչ կասեք այս մասին:

— Այս թեման կրկին բարձրացվել է, եւ տիկին Մանասյանն ասել է, որ նա չունի այդպիսի լիազորություն: Ես վերին աստիճանի զարմացած եմ: Հորդորում եմ փոքր- ինչ լայն նայել Մարդու իրավունքների պաշտպանի գործունեությունը, ինչպես միջազգային հանրության մեջ է ընդունված: Ես երբ Մարդու իրավունքների պաշտպանն էի, պետք է ասեմ, որ այդ տարիներին շատ սերտ համագործակցություն եմ ունեցել Վրաստանի ՄԻՊ-ի հետ: Եվ բազում հարցեր եմ լուծել այդ ընթացքում:

Ցանկանում եմ մեկընդմիշտ գիտակցեն, որ Մարդու իրավունքերի պաշտպանի համար փակ դռներ չկան՝ ինչպես պետության ներսում, այնպես էլ միջազգային հարաբերությունների շրջանակներում: Երբ հատկապես այսքան պաթոսով խոսվում է, որ մենք խաղաղության ենք գնում, ես ընդհանրապես չեմ հասկանում ո՞րն է խնդիրը: Ինչո՞ւ ՄԻՊ-ը չի մասնակցում իշխանության կողմից խաղաղության հաստատման գործընթացին նման կերպ: Եթե ասում են, որ արդեն խաղաղություն է, ապա ի՞նչն է խանգարում Ադրբեջանի հետ այդ հարցում համագործակցությանը:

Գերիներ կամ, ինչպես ես եմ ասում, քաղաքական պատանդների հարցերում շատ մեծ նշանակություն ունի մոտեցումը: Հորդորում եմ մեր Մարդու իրավունքների պաշտպանին անպայման արձագանքի եւ այցելի նրանց:

— Ստացվում է՝ Ադրբեջանում ցմահ դատապարտված Իշխանյանը կարողանում է կոչ անել, սակայն Հայաստանում ոչ ոք ոչինչ չի անում…

— Ես գիտեմ դրա խորքային պատճառները, թե ինչու ոչինչ չեն անում: Բայց երբ դա ստացել է հանրային հնչեղություն եւ թմբկահարվում է՝ լռել չի՛ կարելի: Պետք է ասեմ, որ դեռ այն ժամանակ երբ ես Պաշտպան էի, գնացել եմ Ադրբեջան, այնտեղի ՄԻՊ-ն է եկել Հայաստան: Այսինքն՝ դա պաշտոնական մակարդակով գործառույթներ են:

Իրոք մտահոգված եմ, քանի որ եթե արդեն կոչ է գալիս տուժած կողմից, դա մեծ ահազանգ է: Ի՞նչ է, այս իշխանության շահերից չի՞ բխում, որ Մարդու իրավունքների պաշտպանը գնա Ադրբեջան եւ այցելի հայ գերիներին…

Դրա համար ես ասացի, որ առավել խորքային է պատճառը, եւ մնում եմ իմ հիմնավոր կասկածներին, որ մինչ այսօր Ադրբեջանում պահվում են, որպես քաղաքական պատանդներ հայորդիները, այդ թվում Արցախի ռազմաքաղաքական ղեկավարությունը, որովհետեւ անպայման այս իշխանությունների մատը խառն է: Դրան այլ բացատրություն չկա, քանի որ եթե դա այդպես չէ, ապա ամեն ինչ կարվեր, որ պաշտպանը արձագանքեր, այցելեր գերիներին եւ տեղեկանար նրանց ամեն մի ապրած օրից:

ՆԱՆԱ ՍԱՐԳՍՅԱՆ

Այս թեմայով Ինչ պետք է, իշխանությունը չի անում, մեր հայորդիները մնացել են միայնակ․ Ալավերդյան Բաղդասարյանների գերդաստանը Խաչվերածը նշեց հավերժի ճամփան բռնած ՆԻՆԱ ՄԱՅՐԻԿԻ հիշատակի առաջ խոնհարմամբ ԾՆՈՒՆԴԴ ՇՆՈՐՀԱՎՈՐ ԱՐԹՈՒՐՍ. Մայոր Արթուր Ալավերդյանը կդառնար 34 տարեկան Կարծես երեկ էր, որ ձեռքս բռնած գնում էր մանկապարտեզ․ Արեւիկ Ալավերդյանը հուզված է Այսօր չորրորդ իշխանության իրավունքի եւ արդարության պաշտպան հայտնի փաստաբանի տարեդարձն է