Կառուցապատողի «թույլտվությունը» կարող է վերանալ․ ՀԾԿՀ-ն փոխում է գազին միանալու կանոնները

Բազմաբնակարան շենքերի բնակիչների համար գազամատակարարման ցանցին միանալու գործընթացը կարող է պարզեցվել։ Հանրային ծառայությունները կարգավորող հանձնաժողովը նոր նախագիծ է դրել շրջանառության մեջ, որով առաջարկվում է փոփոխություն կատարել հանձնաժողովի 2005 թվականի հուլիսի 8-ի №95-Ն որոշմամբ հաստատված՝ բնական գազի մատակարարման և օգտագործման կանոններում։

Նախագծով առաջարկվում է բազմաբնակարան շենքերի բնակիչների և կազմակերպությունների՝ գազամատակարարման ցանցին միանալու դեպքում վերացնել գազասպառման համակարգի սեփականատիրոջ, այդ թվում՝ կառուցապատողի, գրավոր համաձայնությունը ներկայացնելու պահանջը։

ՀԾԿՀ-ի հիմնավորման համաձայն՝ գործող կարգավորումը գործնականում որոշ կառուցապատողների հնարավորություն է տվել բնակիչներից համաձայնության տրամադրման դիմաց լրացուցիչ գումար պահանջել, մինչդեռ նման վճար գործող կանոններով նախատեսված չէ։

Խնդիրն, ըստ հանձնաժողովի, հատկապես ընդգծվել է Երևանում, որտեղ գազամատակարարման ցանցին միանալու համար կիրառվում է նաև լրացուցիչ միացման վճար։ Արդյունքում բնակիչը սահմանված վճարից բացի կարող էր բախվել նաև կառուցապատողին լրացուցիչ գումար վճարելու պահանջի հետ։

Նախագիծն ընդունվելու դեպքում բնակիչը գազամատակարարման ցանցին միանալու համար կառուցապատողից առանձին համաձայնություն ստանալու անհրաժեշտություն չի ունենա։

Հանձնաժողովի ներկայացրած նախագծի նպատակն է նվազեցնել բնակիչների համար գազամատակարարման ցանցին միանալու վարչական և ֆինանսական բեռը և գործընթացն ավելի թափանցիկ դարձնել։

Միաժամանակ, առաջարկվող փոփոխությունը չի վերացնում գազամատակարարման ցանցին միանալու համար սահմանված միացման վճարը։ Այն վերաբերում է կառուցապատողի համաձայնության պարտադիր պահանջին և այդ համաձայնության դիմաց հնարավոր լրացուցիչ վճարների ռիսկին։

Հիշեցնենք, որ սպառողների՝ ցանցերին միացման գործընթացը պարզեցնելու և ծախսերը նվազեցնելու ուղղությամբ ՀԾԿՀ-ն այս տարի փոփոխություն է կատարել նաև էլեկտրաէներգիայի ոլորտում։ Մասնավորապես, ապրիլին նվազեցվել են էլեկտրական ցանցին նոր սպառման համակարգերի, այդ թվում՝ բազմաբնակարան շենքերի, միացման վճարները։

Երևանում բազմաբնակարան շենքերի միաֆազ միացման 10 կՎԱ հզորության վճարը նվազել է մոտ 40 տոկոսով՝ 672 հազար դրամից հասնելով 406 հազար դրամի, իսկ 14 կՎԱ հզորության դեպքում՝ մոտ 45 տոկոսով՝ 769 հազար դրամից մինչև 424 հազար դրամ։

Գազամատակարարման ցանցին միանալու վերաբերյալ նախագիծը ներկայում քննարկման փուլում է։

Այս թեմայով Ունի Հայաստանը գազի այլընտարանք. Մեկնաբանում է տնտեսագետը Մահացած զինծառայողի ընտանիքին արդարություն է պետք, ոչ թե արագ հայտնաբերված մեղավոր կամ քավության նոխազ․ Բացառիկ զրույց հայտնի իրավապաշտպանի հետ Ռուսական էներգոռեսուրսները Հայաստանը չի կարող ոչնչով փոխարինել. ռուսաստանցի փորձագետ Հայաստանն առաջիկա օրերին կվերսկսի հեղուկ գազի ներմուծումը Իրանից Ինչու է Վրաստանը տեղափոխում Հայաստան եկող գազատարի մի հատվածը. մանրամասներ