Նվազագույնը 100 հազար դրամ․Ինչ գին ունի սեպտեմբերի 1-ը

Գաղտնիք չէ, որ առաջին դասարան գնալը «փորձություն» ու տոն է ինչպես երեխաների, այնպես էլ ծնողների համար։ Կողքի աչքով նայելիս էլ պարզ է՝ սեպտեմբերի 1-ին պատրաստվելն էժան հաճույք չէ․ որ երեխան հավուր պատշաճի, «տեղը տեղին»  պատրաստված առաջին անգամ մտնի դպրոց՝ պետք է որոշակի «գին» վճարել։

Նվազագույնը 100 հազար դրամ։ Ահա այսքան գումար է անհրաժեշտ  դպրոցահասակ մեկ երեխային սեպտեմբերի 1-ին պատրաստելու համար։ Սա այն դեպքում, երբ Հայաստանում նվազագույն աշատավարձի չափը 75 հազար դրամ է։ Ստացվում է՝ մեկ երեխային դպրոց ճանապարհելու համար անհրաժեշտ գումարը հավասար կամ նույնիսկ ավելի շատ է, քան նվազագույն աշխատավարձը։
Սեպտեմբերի 1–ին ընդառաջ դպրոցահասակ երեխաների ծնողները շտապում են անհրաժեշտ գնումներ կատարել երեխաների համար: «Իրավունքը» որոշել է պարզել, թե ծնողների համար որքան կարժենա կրտսեր և միջին դասարանների երեխաներին դպրոց ուղարկելը։

Երևանի խոշոր առևտրի կենտրոնների, խանութների և տոնավաճառների, առևտրի օնլայն հարթակների գնացուցակների ուսումնասիրման արդյունքում պարզ է դարձել, որ շարքային հայ ընտանիքի բյուջեն մեկ երեխա դպրոց ուղարկելուց կնվազի 90 000 դրամով: Սա այն դեպքում, երբ ընտանիքը երեխայի համար ամեն ինչից գնի մեկական հատ։

Դպրոցի համար ամենակարևոր գնումներից մեկը պայուսակն է, որը Երևանի խանութներում կարելի է ձեռք բերել նվազագույնը 6000-7000 դրամով: Իսկ եթե ծնողը հաշվի առնի նաև պայուսակի ամրությունը, ապա միջինում մեկ պայուսակը կարժենա 10000 դրամ։

Պայուսակում պետք է լինեն տետրեր, օրագիր, գրչատուփ, գրիչներ, մատիտներ, ռետիններ, նկարչական ալբոմ և այլ գրենական պարագաներ: Կրտսեր և միջին դասարանների երեխաներին անհրաժեշտ են նաև առարկայական հատուկ տետրեր։ Այս ամենի համար միջինում անհրաժեշտ է 16.000 դրամ։

Գոնե սեպտեմբերի 1–ին աշակերտները հագնում են սպիտակ վերնաշապիկ, սև կամ կապույտ տաբատ կամ կիսաշրջազգեստ, հիմնականում` նոր։ Սպիտակ վերնաշապիկ Երևանի տոնավաճառներից կարելի է ձեռք բերել միջինը 8000 դրամով, վերնաշապիկին փոխարինող սպիտակ բլուզը՝ միջինում 6000 դրամով: Տաբատներն արժեն 10.000-15.000 դրամ, իսկ կիսաշրջազգեստները՝ միջինը` 9000–15000 դրամ: Տղա երեխայի կոշիկները կարելի է գնել միջինը 12 000–15000 դրամով, իսկ աղջիկներինը՝ 14000-17.000 դրամով: Երեխաների գուլպաները և ներքնազգեստը միասին ծնողի գրպանի վրա կարժենան միջինը 10000 դրամ:

 Սակայն աղքատության բարձր մակարդակ ունեցող մեր երկրում ոչ բոլոր ծնողներն են, որ կարողանում են երեխաների համար գնել 15000 դրամ և ավելի թանկ պայուսակ: Բարձրացել են նաև հագուստի գները, ավելին՝ հագուստի համար նախատեսված գումարը տարեցտարի ավելանում է: Փոքրերի հագուստն ավելի թանկ է, քան մեծերինը, ընդ որում՝ աղջկա հագուստի տեսականին ավելի մեծ է, գներն էլ՝ բարձր:

Հետո նոր ծախսեր են առաջանում. գրքերի համար գումար են ծախսում, ապա նաև ձմեռային հագուստ են գնում: Կարճ ասած, վերնաշապիկ, տաբատ, կիսաշրջազգեստ (դպրոցներ կան, որտեղ համազգեստի միջին գինը գերազանցում է 10000 դրամը), մարզահագուստ, կոշիկ, սպորտային կոշիկներ, պայուսակ, օրագիր, տետրեր, գրիչներ, մատիտներ. այս ամենի համար միջին հաշվարկով անհրաժեշտ է առնվազն 100 հազար դրամ մեկ աշակերտի դեպքում՝ դրան գումարած նաև դասագրքերի գումարը։

Մենք նաեւ մի փոքր էքսկուրսով հետ ենք գնացել մինչեւ 2017թվական` փորձելու հասկանալ, թե ինչ գնային փոփոխություն է կատարվել այս տարիների ընթացքում.

2017-մեկ երեխային դպրոց ճանապարհելու համար անհրաժեշտ էր նվազագույնը  50 հազար դրամ:

2018-մեկ երեխային դպրոց ճանապարհելու համար անհրաժեշտ էր նվազագույնը 30-40 հազար դրամ

2019-մեկ երեխային դպրոց ճանապարհելու համար անհրաժեշտ էր նվազագույնը  50-70 հազար դրամ

Այս ցուցանիշը պահպանվել է մինչեւ 2024-ը,

Իսկ ահա 2025-2026թթ-ներին ունենք արդեն 100 հազար դրամի պատկերը:

Այս թեմայով Գազի գինը ՀՀ-ի համար էժան չէ, շատ բան ենք տալիս ԵԱՏՄ-ին, շատ բան էլ պիտի ստանանք. Պապոյան Թրամփը հայտարարել է Ուկրաինայի և Ռուսաստանի միջև «խոշոր գործարքի» նախապատրաստման մասին ԱՄՆ նոր Կոնգրեսը կունենա բացահայտ ԼԳԲՏ-ականների ռեկորդային թիվ Երբ ցանկանում էի խոսել երեխայիս հետ գրական հայերենով, ստիպված էի լսել՝ «Մի՜ հաչա այդ շան լեզվով»․ Անի Օհանյան «Ժողովուրդ». Ինչ վիճակ է ԱԱԾ մեկուսարանում․ Ռոբերտ Քոչարյանը՝ մի քանի քառակուսի մետրում, քրեական հեղինակությունները՝ նույն խցերում