Վարչապետը սպառնում է, որ ունեցվածքից կզրկի․ ստեղծածս էլ քանդես՝ նորը կստեղծեմ․ Սիրուշո

«Երկրի վարչապետը սպառնում է՝ ասելով, որ ունեցվածքից կզրկի ինձ, մեզ, երեխաներիս։ Իմ կյանքի արժեքները ունեցվածքով ո՛չ սկսվում են, ո՛չ ավարտվում։ Ինձ դրանով վախեցնելն անիմաստ է։ Աշխատում եմ 7, 8 տարեկանից։ Ստեղծածս էլ քանդես՝ նորը կստեղծեմ»,- գրել է Սիրուշոն։

Հիշեցնենք, որ օգոստոսի 25-ի առավոտյան դիմակավորված ԱԱԾ ծառայողները քննչական գործողություններ էին իրականացրել ԱԺ «Հայաստան» խմբակցության պատգամավոր, Սիրուշոյի ամուսին Լևոն Քոչարյանի տանը։ Պատգամավոր Մեսրոպ Մանուկյանը հայտնել էր, որ այդ պահին տանը գտնվել են նաև երեք անչափահաս երեխաները։

Նույն օրը խուզարկություն էր իրականացվել նաև Սիրուշոյին պատկանող «Սիրուշո Փրոդաքշն» ընկերության գրասենյակում։ Քննչական գործողությունների ավարտից հետո գրասենյակի դռները կապարակնքվել էին։ Ըստ հրապարակված տեղեկությունների՝ սահմանափակման տակ էր հայտնվել նաև նույն տարածքում գործող մեկ այլ կազմակերպության գրասենյակ։

Քննչական գործողություններ էին իրականացվել նաև ՀՀ երկրորդ նախագահ Ռոբերտ Քոչարյանի և նրա ընտանիքի անդամների հետ կապված հասցեներում։ Ավելի ուշ հայտնի էր դարձել Ռոբերտ Քոչարյանի և նրա ավագ որդու՝ Սեդրակ Քոչարյանի ձերբակալության մասին։