Թուփաքի սպանության 30-ամյա առեղծվածը կարող է բացահայտվել

Ամերիկացի ռեփեր Թուփաք Շաքուրի սպանությունից գրեթե 30 տարի անց Լաս Վեգասում սկսվել է գործով միակ մեղադրյալի՝ 63-ամյա «Քեֆի Դի» մականունով Դուեյն Դևիսի դատավարությունը, գրել է BBC-ին։

Դևիսը հանցավոր խմբավորման նախկին առաջնորդ է, որը մեղադրվում է հրազենի կիրառմամբ սպանություն կատարելու մեջ՝ հանցավոր խմբավորմանն աջակցելու կամ դրա գործունեությանը նպաստելու նպատակով։ Նա իրեն մեղավոր չի ճանաչել։ Մեղադրական դատավճռի դեպքում Դևիսին սպառնում է ցմահ ազատազրկում՝ առանց պայմանական վաղաժամկետ ազատ արձակման հնարավորության։

Գործով երդվյալ ատենակալների ընտրությունը մեկնարկել է օգոստոսի 10-ին։ Շաքուրը սպանվել է 1996 թվականի սեպտեմբերի 7-ին Լաս Վեգասում։ Նրա մեքենայի ուղղությամբ կրակ է բացվել ընթացող մեկ այլ ավտոմեքենայից։ Ռեփերը ստացած վնասվածքներից մահացել է վեց օր անց։ Սպանությունը տասնամյակներ շարունակ մնացել է չբացահայտված, իսկ առաջին ձերբակալությունը կատարվել է միայն 2023 թվականին, երբ Դևիսին մեղադրանք է առաջադրվել։

Սպասվում է, որ դատավարության ընթացքում կանդրադառնան նաև 1990-ականներին ԱՄՆ-ի Արևելյան և Արևմտյան ափերի ռեփերների միջև հակամարտությանը, ինչպես նաև Bloods և Crips փողոցային խմբավորումների դիմակայությանը։ Գործով կարող են ցուցմունք տալ նաև մի շարք հայտնի անձինք, այդ թվում՝ Death Row Records-ի նախկին ղեկավար Շուգ Նայթը, որը համարվում է Շաքուրի սպանության վերջին ողջ մնացած ականատեսներից մեկը։

Մեղադրանքի համար առանցքային ապացույցներից մեկը Դևիսի համահեղինակած գիրքն է, որում նա անդրադարձել է Շաքուրի սպանությանը։ Դևիսի պաշտպանական կողմը պնդում է, որ գրքում ներկայացված տեղեկությունների մի մասը գեղարվեստական հորինվածք է։