Վերջնագիր ոչ թե Նիկոլը, այլ ԵԱՏՄ-ն ու Ռուսաստանը կարող են տալ, եւ այն արդեն տվել են

Կողմնորոշվելու համար տրված ժամկետը լրանում է դեկտեմբերին, արագորեն սպառվող ժամանակը Նիկոլին գժվեցնում է։

Եթե առաջիկա շաբաթներին Հայաստանի նկատմամբ արտահանման սահմանափակումների հարցը չլուծվի, դա կդառնա «ԵԱՏՄ վերջի սկիզբը». այս մասին հայտարարել է Հայաստանի վարչապետի պաշտոնը զբաղեցնող Նիկոլը՝ ամփոփելով Ռուսաստանի նախագահ Վլադիմիր Պուտինի հետ հեռախոսազրույցը:

Հայաստանի նկատմամբ արտահանման ռուսական սահմանափակումներից հոգեկան հավասարակշռությունն էլ ավելի կորցրած ու ցայտնոտային վիճակում գտնվող Նիկոլի ուղեղում երեւի «կարճ միացումներ» են, համենայնդեպս, ինչ-որ բան հաստատ այն չէ, այլապես իրեն հաշիվ կտար ու չէր համարձակվի ԵԱՏՄ-ի եւ Ռուսաստանի առնչությամբ արտահայտվել վերջնագրով՝ իր վերջի սկիզբն ակնհայտորեն շփոթելով Եվրասիական տնտեսական միության վերջի սկզբի հետ:

Ավելին. Նիկոլը կարծում է, թե կարող է հիմարի տեղ դնել Պուտինին, կամ ՌԴ նախագահը կների իրեն: Ու դեռ լկտիություն ու հանդգնություն ունի հավակնելու նրա հետ հանդիպման...

Նիկոլի գլխավորած կառավարությունը պետության ունեցվածքից տարածք է տրամադրել ռուսատյաց Արման Բաբաջանյանի հիմնած ԶԼՄ-ին: Նիկոլը եւ նրա գրպանում գտնվող Քննչական կոմիտեն ՌԴ-ն, ըստ էության, հրապարակավ համարել են Հայաստանին թշնամի կամ Հայաստանի նկատմամբ թշնամական գործունեություն իրականացնող պետություն, եւ այս ամենից հետո Նիկոլը կարծում է, թե կարող է Ռուսաստանի նախագահ Վլադիմիր Պուտինին հիմարի տեղ դնել:

Կամ գուցե կարծում է, թե վերը նշված ու վերը չնշված, Ռուսաստանի, ՀԱՊԿ-ի, ԵԱՏՄ-ի դեմ ուղղված բազմաթիվ քայլերից հետո Պուտինը կարող է եւ կների իրեն... Երկու դեպքում էլ ՉԱՐԱՉԱՐ ՍԽԱԼՎՈ՛ՒՄ Է:

Ռուսատյաց եւ հայաստանյան հանրությանն իր վատ համբավով հայտնի Արման Բաբաջանյանի հիմնած լրատվամիջոցը տարածք է ստացել Հայաստանի կառավարությունից: Հայաստանի իշխանությունները տարածք են տրամադրել ռուսատյաց քաղաքական գործչի հիմնած լրատվական կայքի համար։ Այս փաստը, բնականաբար, չի վրիպել ռուսական ԶԼՄ-ների ուշադրությունից:

Ինչպես գրել է, օրինակ, «РИА Новости»-ին, Հայաստանի կառավարությունը 3 տարի ժամկետով անհատույց օգտագործման տարածք է տրամադրել Երեւանում՝ «Հանուն հանրապետության» հակառուսական կուսակցության առաջնորդ Արման Բաբաջանյանի հիմնած 1in.am առցանց ռեսուրսի գործունեության համար: Նշված որոշումը հետեւում է նրա կայքում տեղադրված կառավարության որոշումից:

«Հանուն հանրապետության» հակառուսական կուսակցության առաջնորդ Արման Բաբաջանյանի հիմնած «Սկիզբ մեդիա կենտրոն» ՍՊԸ-ին երեք տարի ժամկետով անհատույց օգտագործման հանձնել (որին պատկանում է 1in.am-ը.- խմբ.) ՀՀ տարածքային կառավարման եւ ենթակառուցվածքների նախարարության Պետական գույքի կառավարման կոմիտեին ամրագրված Երեւան քաղաքի Վարդանանց փակուղի հասցեում գտնվող շենքում 250 քմ մակերեսով տարածք», - նշված է կառավարության որոշման մեջ:

Որոշման հիմնավորումներում նշված է, որ տարածք տրամադրելու խնդրանքով դիմել է ընկերության տնօրենը՝ «լրատվամիջոցների բնականոն եւ անխափան գործունեությունն ապահովելու նպատակով»:

Կասկածից դուրս է, որ եթե ընդդիմադիր կամ, թեկուզ, պարզապես ռուսամետ դիրքորոշում ունեցող որեւէ ԶԼՄ-ի ղեկավար նույն խնդրանքով դիմեր կառավարություն, ստանալու էր մերժում, մինչդեռ «Հանուն հանրապետության» (իրականում՝ «Ընդդեմ հանրապետության») հակառուսական կուսակցության առաջնորդ Արման Բաբաջանյանի հիմնած «Սկիզբ մեդիա կենտրոն» ՍՊԸ-ին վերոնշյալ տարածքի տրամադրումը չի մերժվել:

Եթե հաշվի առնենք, որ մայրաքաղաքի կենտրոնում 250 քմ մակերեսով գրասենյակային տարածքի վարձակալության արժեքը, ամենահամեստ հաշվարկներով, մեկուկես միլիոն դրամ է, ապա 3 տարվա համար այն կկազմի 54 մլն դրամ, որից զրկվել է Հայաստանի պետական բյուջեն՝ հանուն հակառուսական կուսակցության առաջնորդի հիմնած ընկերությանը պատկանող 1in.am իշխանամետ, հակահայկական ու հակառուսական ուղղվածություն ունեցող կայքի: Թերեւս ավելորդ է նշել, որ տվյալ տարածքը մեկ այլ անձի կամ կազմակերպության վարձակալության տալու դեպքում հիշյալ գումարը կարող էր ծառայեցվել Հայաստանի պաշտպանության, օրինակ, ԱԹՍ-ների դեմ պայքարի միջոց կամ միջոցներ գնելու համար:

Եվ ահա, այս ամենից հետո Հայաստանի վարչապետի պաշտոնը զբաղեցնող Նիկոլը հնարավոր է համարում Վլադիմիր Պուտինի հետ հանդիպումը, որքան էլ զավեշտական է, պատրաստակամություն է հայտնել առաջիկայում հանդիպել Ռուսաստանի նախագահի հետ: Ու սա՝ այն դեպքում, երբ Պուտինը, եթե չափազանց մեծահոգի գտնվի ու ցանկանա դարձի բերելու նպատակով հավելյալ ինչ-որ բան բացատրել Նիկոլին, ինքը պետք է պատրաստակամություն հայտնի հանդիպել Նիկոլի հետ:

«Հանդիպումը հնարավոր է,- ասել է Նիկոլը լրագրողներին՝ ի պատասխան Ռուսաստանի նախագահի հետ հանդիպման հնարավորության մասին հարցին, - Համենայնդեպս, քննարկումներ եւ շփումներ մենք անպայման կունենանք»:

Հնարավոր է... Բայց, հնարավորը դեռ չի նշանակում, որ Պուտինը նրան կընդունի: Ինչ վերաբերվում է ՌԴ նախագահի հետ քննարկումներին, շփումներին, որոնց իրականացման հարցում Նիկոլը վստահություն է հայտնել, ապա, եթե Պուտինը չհրաժարվի Նիկոլի հեռախոսազանգին պատասխանել, դա բացառված չէ:

Իրականում Պուտինի հետ հանդիպումը հնարավոր համարելու վերաբերյալ Նիկոլի հայտարարությունը մանիպուլյատիվ հնարք է, որի նպատակը հանգստացնելն է այն հայ գյուղատնտեսներին, ձկնաբույծներին, ալկոհոլային խմիչքներ եւ կաթնամթերքներ արտադրողներին, արտահանողներին, որոնց արտադրանքի ընդունումից ՌԴ-ն միանգամայն արդարացիորեն եւ իրավացիորեն հրաժարվել է: Այսինքն՝ անցած երկուշաբթի Պուտինի հետ հեռախոսազրույցի ընթացքում չկարողացավ հասնել հայկական ապրանքների արտահանման արգելքի վերացմանը, հնարավոր է իր հետ հանդիպմանը ու խնդրի լուծմանը հասնի հետագայո՞ւմ:

Չի՛ ստացվելու՝ առանց ԵՄ, թե ԵԱՏՄ Հայաստանի կողմնորոշման հարցով մինչեւ դեկտեմբեր հանրաքվե անցկացնելու ԵԱՏՄ-ի պահանջի կատարման, որը Նիկոլը հիշյալ հեռախոսազրույցի ընթացքում դարձյալ, ըստ էության, մերժել է՝ դա հնարավոր համարելով միայն Եվրամիությանն անդամակցելու հարցով անդամակցության պաշտոնական հայտ ներկայացնելուց հետո, մինչդեռ ԵԱՏՄ-ի վերջնաժամկետը մոտենում է:

ԱՐԹՈՒՐ ՀՈՎՀԱՆՆԻՍՅԱՆ

Այս թեմայով Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար Փաշինյանը նպատակ ունի կտրել թաղման նպաստները Ռուսաստանի հետ մեր հարաբերությունները անխուսափելիորեն փոխվելու են․ Փաշինյան Որ խելքներդ չի հասնում, ծպտուն մի հանեք․ ԲԱՄԲԱՍԱՆՔ «Դաբրոներ են» տվել Փաշինյանի աշխատակազմի նախկին ղեկավար Հարությունյանը, առողջապահության ոլորտը «վարած-ցանած» նախկին նախարար Արսեն Թորոսյանը, Կոտայքի մարզպետ Ահարոն Սահակյանն ու ՏԿԵ նախարար Դավիթ Խուդաթյանը