Չինաստանի հազվագյուտ հողային մետաղները սպառնում են եվրոպական արդյունաբերությանը

Եվրամիությունը ստեղծում է հատուկ հակաճգնաժամային հանձնաժողով՝ Չինաստանի հետ առևտրային լարվածության սրման դեպքում արձագանքելու համար։ Եվրոպայում մտավախություն կա, որ եթե Պեկինը հոկտեմբերից սահմանափակի հազվագյուտ հողային մետաղների և այլ ռազմավարական հանքանյութերի արտահանումը, դա կարող է ծանր հարված հասցնել մայրցամաքի բարձր տեխնոլոգիական արդյունաբերությանը։ Այս հումքը կենսական նշանակություն ունի էլեկտրամոբիլների, հողմային տուրբինների, տվյալների կենտրոնների, ինչպես նաև պաշտպանական արդյունաբերության արտադրության համար։

Թեև հազվագյուտ հողային մետաղներն իրականում լայնորեն տարածված են, դրանց արդյունահանման և հատկապես վերամշակման ոլորտում Չինաստանը երկար տարիների պետական քաղաքականության շնորհիվ դարձել է բացարձակ առաջատար։ Այսօր երկիրը ապահովում է աշխարհի հազվագյուտ հողային մետաղների արդյունահանման շուրջ 60%-ը, վերամշակման 85–90%-ը, իսկ բարձր արդյունավետության մշտական մագնիսների արտադրության ավելի քան 90%-ը։ Պեկինն արդեն նախկինում կիրառել է այս գերիշխանությունը քաղաքական նպատակներով՝ սահմանափակելով ռազմավարական հանքանյութերի արտահանումը։

Հազվագյուտ մետաղների վերահսկողությունը դարձել է ԱՄՆ-Չինաստան տեխնոլոգիական մրցակցության առանցքային ուղղություններից մեկը։ Մինչ Վաշինգտոնը սահմանափակում է Չինաստանի հասանելիությունը առաջատար կիսահաղորդչային տեխնոլոգիաներին, Պեկինը կարողանում է ճնշում գործադրել ռազմավարական հումքի մատակարարումների միջոցով։ ԱՄՆ-ն արագացնում է սեփական արտադրական շղթաների ստեղծումը, ներդրումներ է կատարում MP Materials-ի, Lynas Rare Earths-ի և դաշնակից երկրների նախագծերում, սակայն նոր հանքավայրերի և վերամշակման գործարանների ստեղծումը կարող է տևել 7–10 տարի։

Եվրամիությունը գտնվում է առավել խոցելի դիրքում, քանի որ սպառվող հազվագյուտ հողային մետաղների 98%-ը ներմուծում է Չինաստանից։ Չինական էլեկտրամոբիլների նկատմամբ մինչև 45% մաքսատուրքերի սահմանումից հետո Պեկինը սկսել է պատասխան քայլեր, իսկ հոկտեմբերին, երբ նախատեսվում է վերջնականացնել այդ սահմանափակումները, կարող է կիրառել նոր միջոցներ՝ սահմանափակելով կամ ամբողջությամբ արգելելով ռազմավարական հանքանյութերի և մշտական մագնիսների արտահանումը Եվրոպա։

Եթե նման սցենարը իրականություն դառնա, լուրջ խնդիրների առաջ կկանգնեն եվրոպական ավտոմոբիլային և վերականգնվող էներգետիկայի ոլորտները, այդ թվում՝ Siemens Gamesa-ն և Vestas-ը։ Միևնույն ժամանակ ԵՄ «Made in Europe» (Industrial Accelerator Act) նախաձեռնության տեղայնացման պահանջները կարող են գործնականում անհնար դառնալ առանց չինական հումքի։ Արդյունքում Եվրոպան կանգնած է բարդ ընտրության առաջ՝ կամ մեղմել Չինաստանի նկատմամբ իր պաշտպանողական առևտրային քաղաքականությունը, կամ բախվել հումքային էմբարգոյի, որը կարող է կաթվածահար անել մայրցամաքի բարձր տեխնոլոգիական արդյունաբերության զգալի մասը։

Այս թեմայով Չինաստանի առևտրային հաշվեկշռի դրական մնացորդը հասել է 119 մլրդ դոլարի՝ արտահանման աճի ֆոնին Ո՞ւմ հավատալ՝ Պապոյանի թվերի «հրաշքին», թե՞ Փաշինյանի աղերսագին զանգերին Չինաստանը ներկայացրել է նոր սերնդի միկրոալիքային զենք՝ մինչև 100 ԳՎտ հզորությամբ. Արտակ Զաքարյան «Ռուսաստանի տնտեսական վերակողմնորոշումը դեպի Չինաստան ավարտված է». Գերմանական լրատվամիջոցներ Ռուսաստանը հրապարակել է Պուտինի Չինաստան այցի ծրագիրը