Դուք քաղաքային իշխանությո՞ւն եք, թե՞ պրոդյուսերական կենտրոն. ԶԱՐՄԱՆՔ

Վարդավառի` շուրջ 200 միլիոն դրամանոց տոնակատարության աղմուկը դեռ չմարած՝ Երեւանի քաղաքապետ ՏԻԳՐԱՆ ԱՎԻՆՅԱՆՆ արդեն նոր միջոցառման նախապատրաստության մեջ է։ Ու կրկին՝ քաղաքային բյուջեի հաշվին։ Երեւանի ավագանու «Մայր Հայաստան» խմբակցության ղեկավար Մանուկ Սուքիասյանը բարձրաձայնում է, որ այս անգամ խոսքը 50 միլիոն դրամի մասին է, որը նախատեսվում է հատկացնել «Նորաձեւության շաբաթ» միջոցառմանը։ Նրա խոսքով՝ նախկինում նույն նպատակով հատկացվել է շուրջ 42 միլիոն դրամ, իսկ այժմ գումարը հասցվել է 50 միլիոնի։ Ու այստեղ է առաջանում բնական հարցը. իսկապե՞ս Երեւանի ամենահրատապ խնդիրը նորաձեւության ցուցադրություններ կազմակերպելն է։ Երբ մայրաքաղաքի բազմաթիվ փողոցներ, բակեր, վերելակներ, կոյուղատար համակարգեր ու տրանսպորտային խնդիրներ շարունակում են մնալ չլուծված, քաղաքապետարանը հերթական անգամ նախընտրում է միլիոններ ծախսել շքեղ միջոցառումների վրա։ «Դուք քաղաքային իշխանությո՞ւն եք, թե՞ պրոդյուսերական կենտրոն»,- հարցնում է ընդդիմադիր ավագանին։ Եվ, թերեւս, սա այն հարցերից է, որի պատասխանը քաղաքացիներն էլ են ակնկալում։ Որովհետեւ եթե քաղաքային բյուջեն վերածվել է փառատոների, շոուների ու ցուցադրությունների ֆինանսավորման աղբյուրի, ապա դժվար է հասկանալ, թե որտեղից պետք է միջոցներ գտնվեն այն խնդիրների համար, որոնց հետ երեւանցին բախվում է ամեն օր։ Ի վերջո, բյուջեն քաղաքապետի կամայականությունների դրամապանակը չէ, այլ հարկատուների գումարը, որի յուրաքանչյուր դրամի ծախսը պետք է ունենա հստակ հանրային հիմնավորում։

Հայաստանով անցնող «TRIPP+» առեւտրային նախագծի ղեկավար կնշանակվի ԿՈՆՍՏԱՆՏԻՆ ՍՈԿՈԼՈՎԸ: Այս մասին հաղորդում է բրիտանական «The Guardian»-ը: Ըստ պարբերականի` ԱՄՆ Պետդեպարտամենտը հաստատել է այս նշանակումն անցած ուրբաթ: Սոկոլովը Հայաստանում հայտնի է որպես հայաստանյան կապի խոշոր օպերատորներից «Վիվա Արմենիա»-ի համասեփականատեր։ «Վիվա Արմենիա»-ն վերջերս ձեռք էր բերել նաեւ մեկ այլ օպերատորի՝ «Ռոստելեկոմ»-ի բաժնետոմսերը։ Անդրադառնալով վերոնշյալին՝ մեդիափորձագետ Տիգրան Քոչարյանը գրում է. «Այդքան փորձեց ռուսին ու ամերիկացուն կռվացնի Հայաստանում, վերջը ամերիկացիք ու ռուսները դավադիտ եղան ու Հայաստանով անցնող «TRIPP +» առեւտրային նախագծի ղեկավար ու նայող դրեցին ամերիկառուս բիզնեսմեն Կոնստանտին Սոկոլովին: Ով արդեն Հայաստանում խոշոր փայ կամ համասեփականատեր ունի «Վիվա»-ում, ԱՄԻՕ բանկում ու Թեղուտի հանքում: Էն որ ասում են շուստրի աղվեսը չորսը ոտքով թակարդն է ընկնում, այ էս դեպքն է: Բայց դե շարունակի չորսը ոտքով գազին սղմել: Հիմա կարելի ա փոփ-քորն վերցնել ու հետեւել արեւմտամետներին:

Զարմանալի ու միաժամանակ ուշագրավ հայտարարություն է արել Անվտանգային քաղաքականության հետազոտական կենտրոնի նախագահ ԱՐԵԳ ՔՈՉԻՆՅԱՆՆ իր վերջին հարցազրույցներից մեկում։ Նա պնդել է. «Եթե Ռուսաստանի Դաշնությունը գազն անջատի, Հայաստանի Հանրապետությունը պիտի Եվրամիությունից գնի այն գազը, որն իրենք Ադրբեջանից են գնել․ դա փրկօղակ կլինի»։ Սակայն այս հայտարարությունը բազմաթիվ հարցեր է առաջացնում։ Հատկապես, եթե հաշվի առնենք, որ Եվրոպա արտահանվող ադրբեջանական գազի ճնշող մասը իրականում ռուսական ծագում ունի։ Ստացվում է պարադոքսալ պատկեր. Ռուսաստանից գազի մատակարարումների դադարեցման դեպքում Հայաստանը, իբր, պետք է նույն գազը ձեռք բերի Եվրոպայից՝ ադրբեջանական անվան տակ։ Այդ դեպքում որտե՞ղ է «փրկօղակը», եւ ինչո՞վ է նման սխեման տարբերվում նույն էներգակիրն ավելի բարդ ու թանկ ճանապարհով ձեռք բերելուց։

ԶԱՐՄԱՑԱԾ Է «ԻՐԱՎՈՒՆՔ»-Ը

Այս թեմայով Ինչ կարող էինք զիջել, արդեն զիջել ենք․ Տիգրան Աբրահամյան Եթե ինքն իր դեմ փողոց է փակելու, ուրեմն` որպես երկրի ղեկավար, չի վերահսկում իրավիճակը․ Քոչարյան Աթոռամարտ. Ավինյան-Ալեն Սիմոնյան թեժ պայքար է ՔՊ-ում. «Ժողովուրդ» «Ժողովուրդ». Ո՞վ է ընդդիմադիրների վրա հարձակվող Տիգրան Գալստյանը Էս ի՞նչ շոու ես անում, Ստեփանակերտից մաքուր քաղաք չկար, հանձնեցիր. քաղաքացին՝ Ավինյանին