Բազմաթիվ դիմորդներ դուրս են մնալու կրթական համակարգից. բաց նամակ՝ ԿԳՄՍ նախարարին

«Հարգելի տիկին նախարար,

 

Քոլեջներ դիմելու օնլայն կարգը մեծ խառնաշփոթ է առաջացրել դիմորդների եւ նրանց ծնողների շրջանում։

 

Բազմաթիվ ծնողներ չեն կարողանում ինքնաշխատ եղանակով գրանցվելով նախարարության ստեղծած համապատասխան կայքում՝ գտնել իրենց եւ իրենց երեխայի ազգակցական կապը, որը, չգիտես ինչու, համարվում է պարտադիր՝ հետագա դաշտերը լրացնելու համար։

 

Հավատում եմ, որ ԿԳՄՍՆ-ը մեկ միասնական հարթակի միջոցով փորձել է հեշտացնել դիմորդների գործը, սակայն իրականում ստացվել է հակառակը՝ գլխացավանք, քաշքշուկ, փակուղային իրավիճակ։

Այս շիլա-շփոթը հանգեցնելու է նրան, որ բազմաթիվ դիմորդներ չեն կարողանալու նշված ժամկետներում հայտ ներկայացնել իրենց նախընտրած հաստատություն եւ դուրս են մնալու կրթական համակարգից։

 

Ուստի, խնդրում եմ` վերանայել քոլեջներ ընդունվելու կարգը՝ գոնե այս տարի այն թողնելով թղթային, առձեռն մակարդակի վրա, որպեսզի կարողանանք մեր երեխաների փաստաթղթերը ֆիզիկապես ներկայացնել ուսումնական հաստատություն։

 

Դիմորդի ծնող՝ Նարե Գրիգորյան»: