Սերը՝ ամպերից վեր, բայց օրենքից` ոչ. 443 մետր բարձրության վրա արված առաջարկն ավարտվեց ձերբակալությամբ

Նյու Յորքի խորհրդանիշներից մեկի՝ Empire State Building գագաթին հնչած «այո»-ն ընդամենը մի քանի րոպե անց փոխվեց ոստիկանական հրահանգների եւ ձերբակալության։ Այն, ինչ սոցիալական ցանցերում ներկայացվեց որպես աշխարհի ամենահամարձակ սիրո առաջարկներից մեկը, իրավապահների գնահատմամբ դարձավ վտանգավոր ու ապօրինի ակցիա։ 

Հուլիսի 1-ին ռուս էքստրեմալ մագլցողներ 33-ամյա Անժելա Նիկոլաուն եւ 32-ամյա Իվան Կուզնեցովը կարողացել են հասնել երկնաքերի հանրության համար փակ աշտարակի ամենաբարձր հատված՝ շուրջ 443 մետր բարձրության վրա։ Առանց տեսանելի ապահովագրական պարանների նրանք բացել են սեւ պաստառ, որի վրա գրված էր. «Երբ սիրո ուժը հաղթի իշխանության սիրուն, աշխարհը խաղաղություն կճանաչի»։ Մի քանի ակնթարթ անց Կուզնեցովը ծնկի է իջել եւ ամուսնության առաջարկ արել Նիկոլաուին, որն ընդունել է այն։

Սակայն ռոմանտիկ տեսարանը երկար չի տեւել։ Դեպքի մասին ահազանգ ստանալուց հետո տեղում աշխատել են Նյու Յորքի ոստիկանության հատուկ ստորաբաժանումները։ Իրավապահները, օգտագործելով նաեւ անօդաչու սարք եւ ուղղաթիռ, վերահսկել են իրավիճակը, ապա զույգին անվտանգ ուղեկցել ներքեւ ու ձերբակալել։ 

Նրանց ներկայացվել են մի շարք մեղադրանքներ՝ ապօրինի մուտքի, վտանգավոր իրավիճակ ստեղծելու, գույքին վնաս պատճառելու եւ այլ իրավախախտումների համար։ Քննիչները փորձում են պարզել, թե ինչպես են նրանք շրջանցել շենքի խիստ անվտանգության համակարգը եւ հասել տեխնիկական գոտի, որը հասանելի չէ այցելուներին։

Empire State Realty Trust-ը հայտարարությամբ ընդգծել է, որ բարձրանալը եղել է ամբողջությամբ չարտոնված եւ վտանգել է թե՛ մասնակիցների, թե՛ շենքի անվտանգությունը։ Ընկերությունը նույնիսկ հումորով հիշեցրել է, որ շենքում գործում է պաշտոնական ամուսնության առաջարկի ծառայություն, որը թույլ է տալիս նման պահերը կազմակերպել օրինական եւ անվտանգ պայմաններում։

Նիկոլաուն եւ Կուզնեցովը վաղուց հայտնի են «ռուֆթերների» աշխարհում։ Նրանք տարիներ շարունակ բարձրանում են աշխարհի ամենաբարձր շենքերի գագաթներ՝ հաճախ առանց անվտանգության միջոցների, իսկ նրանց հարաբերությունների և վտանգավոր արկածների մասին 2024 թվականին նկարահանվել է Skywalkers: A Love Story վավերագրական ֆիլմը։ 

Դեպքը լայն արձագանք է ստացել համաշխարհային մամուլում եւ սոցիալական ցանցերում։ Մի մասը զույգին ներկայացնում է որպես համարձակ արկածախնդիրներ, մյուսները՝ որպես մարդկանց, որոնք սեփական կյանքի եւ հանրային անվտանգության հաշվին ուշադրություն գրավելու փորձ են արել։ Սակայն մեկ հանգամանք գրեթե բոլոր մեկնաբանություններում նույնն է՝ սիրո առաջարկը, որն արվել էր քաղաքի գլխապտույտ բարձունքներից, ավարտվեց ոչ թե միայն նշանադրությամբ, այլ նաեւ քրեական գործով։

Այս թեմայով Ամուսնացել է Անժելա Սարգսյանի դուստրը Պարո'ն Փաշինյան, դուք Մովսեսը չեք, դուք ժողովրդին չբերեցիք Ավետյաց երկիր, դուք Իվան Սուսանինն եք Ովքեր են ՔՊ ցուցակի առաջին 50 հոգին .ՑԱՆԿ «Շինելուց» խոսողները. Անժելա Էլիբեկովա Փաշինյանի հայտարարությունը հանձնելու մասին է, ոչ թե ստանալու. Անժելա Էլիբեգովա