ՊԱՏՄԱԿԱՆ ՀԱՂԹԱՆԱԿ ՊՐՈՖԵՍԻՈՆԱԼ ԽԱՌԸ ՄԵՆԱՄԱՐՏԵՐԻ ONE CHAMPIONSHIP ՄՐՑԱՇԱՐՈՒՄ

Օրերս Թաիլանդի Բանգկոկ քաղաքում կայացած Խառը մենամարտերի ONE Championship մրցաշարում Հայաստանի ներկայացուցիչ ԿԱՐԵՆ ՂԱԶԱՐՅԱՆԸ փայլուն հաղթանակ տոնեց։ Սա աննախադեպ հաղթանակ էր մեր երկրի համար։

Iravunk. com -ի մարզական լրագրողը կապ է հաստատել ու բացառիկ զրույց ունեցել արդեն հայրենիք վերադարձած ԿԱՐԵՆ ՂԱԶԱՐՅԱՆԻ հետ։

- Ողջույն, Կարեն։ Շնորհավորում ենք փայլուն հաղթանակի առթիվ։ Սա պատմական հաղթանակ էր, քանի որ խառը մենամարտերի պատմության մեջ մեր երկրում ապրող, պարապող որևէ մարզիկի դեռևս չէր հաջողվել հաղթել այս հեղինակավոր մրցաշարում։ Ինչպիսի զգացողություններ ունեցար։

- Շատ շնորհակալ եմ։ Հանդես եկա 56 կգ քաշային կարգում։ Սա պրոֆեսիոնալ մենամարտ էր։ Հակառակորդս շատ փորձառու էր, ճապոնացի Հիսաշի Էզակին էր։ Տեխնիկական նոկաուտով, վաղաժամ հաղթեցի նրան առաջին ռաունդից հետո։ Մրցակիցս, քանի որ դեմքի վնասվածք ուներ, հրաժարվեց շարունակել պայքարը։ Նա բավականին փորձառու մրցակից էր, բրազիլական ջիու - ջիցուի Աշխարհի առաջնության փոխչեմպիոն։ Խառը մենամարտերում ունեցել է 7 հաղթանակ, առանց որևէ պարտության, հիմա արդեն դարձավ 7 հաղթանակ, 1 պարտություն։ Իսկ ես խառը մենամարտերում արդեն ունեմ 6 հաղթանակ 1 պարտություն։ Աննկարագրելի զգացողություններ առաջացան հաղթանակից հետո, կարծես շոկի մեջ լինեի այդ պահին։

Շատ մեծ հպարտության զգացողություններ ունեցա։ Հաղթանակս նվիրում եմ իմ հայ ազգին, հարազատներիս, մեր զինվորներին, սա միայն իմ հաղթանակը չէ, այլ բոլորինս։ Սա իսկապես շատ կարևոր հաղթանակ էր ինձ համար։ Քանի որ իմ ծննդավայր Գավառում չկան պայմաններ պարապելու, ուստի ես հաղթահարելով այդքան երկար ճանապարհը, գալիս հասնում եմ մայրաքաղաք Երևան, սակայն երբեք չեմ ընկճվում, քանի որ հենց այդպիսի դժվարությունների շնորհիվ ենք մենք կոփվում ու հասնում նման տպավորիչ հաղթանակների։ Շուրջ երկու ամիս պատրաստվել էի այս մրցաշարին։ Հաղթանակով բարձրացավ իմ վարկանիշը դասակարգման աղյուսակում։ Ինձ համար շատ մեծ պատիվ է, որ մեր երկրում միակն եմ ու առաջինը, ում հաջողվեց հաղթել այսպիսի հեղինակավոր մրցաշարում։ Շնորհակալ եմ Աստծուն, հենց նրա շնորհիվ եմ հաղթել, իմ հավատքի շնորհիվ։ Հատուկ շնորհակալություն նաև անձնական մարզչիս Ստեփան Շահմուրադյանին և Հայաստանի Խառը մենամարտերի /MMA /ֆեդերացիայի նախագահ Գարեգին Աղաբալյանին, մշտապես իմ կողքին լինելու համար։

Ասեմ, որ 2018-ին Վրաստանում կայացած խառը մենամարտերի սիրողական միջազգային մրցաշարում փայլուն հաղթանակ եմ տարել ադրբեջանցի մրցակցի հանդեպ, ընդամենը 13 վայրկյանում, տեխնիկական նոկաուտի ենթարկելով նրան։ Այս հաղթանակը ևս երբեք չեմ կարող մոռանալ։

Իսկ ահա Կարենի անձնական մարզիչը ՍՏԵՓԱՆ ՇԱՀՄՈՒՐԱԴՅԱՆԸ, մեզ հետ զրույցում այսպես մեկնաբանեց.

- ONE Championship -ը համարվում է աշխարհի ամենահեղինակավոր մարտական կազմակերպություններից մեկը, որտեղ հանդես են գալիս MMA -ի, Մուայթայի, Քիքբոքսինգի և Գրեփլինգի լավագույն մարզիկները աշխարհի տարբեր երկրներից։ Այն երկրորդն է UFC -ից հետո։ Նշեմ, որ իմ սանի Կարենի հաղթանակը պատմական էր, քանի որ Հայաստանում ապրող, պարապող որևէ մարզիկ մինչ այս չէր հաղթել այս հեղինակավոր մրցաշարում։ Կարենի հետ միասին երկար ճանապարհ ենք անցել, նրա առաջին տիտղոսը սիրողական MMA -ում Աշխարհի փոխչեմպիոնությունն էր, որից հետո պրոֆեսիոնալ հարթակում հաղթանակ տոնեց GFC -ում, NAIZA - ում ու արդեն երկրորդ փորձից, դժվար ու շատ կարևոր հաղթանակ տոնեց One Championship - ում։ Ասեմ, որ Կարեն Ղազարյանին արդեն տարբեր տեղերից նկատել են և ուզում են հրավիրել մենամարտերի արդեն չեմպիոնական գոտիների համար։ Կարենը օժտված է կամային բարձր հատկանիշներով, շատ կարգապահ և կշռադատված մարզիկ է, շատ մեծ հույսեր եմ կապում նրա հետ։ Շատ շնորհակալ ենք ֆեդերացիայի նախագահ Գարեգին Աղաբալյանին, նրա ներդրումը շատ մեծ է մեր մարզիկների գրանցած հաջողություններում։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Հայաստանի հավաքականը ծանր կորուստ ունի Ազգերի լիգայի վճռորոշ խաղերից առաջ Ըմբշամարտի ԱԱ. Նարեկ Հարությունյանն ու Հրայր Ալիխանյանը պարտվեցին մեկնարկում ԱԱ. Արսեն Հարությունյանը մեկնարկեց վստահ հաղթանակով՝ 10:0 Հայ բռնցքամարտիկները Թուրքիայից կվերադառնան երկու մեդալով «ԱՄԵՆԱԴԺՎԱՐԸ ՍՏԱՑՎԵՑ ՌՈՒՍ ՄՐՑԱԿՑԻ ՀԵՏ ՄԵՆԱՄԱՐՏԸ». ԲՌՆՑՔԱՄԱՐՏԻ ՄԵԾԱՀԱՍԱԿՆԵՐԻ ԵՎՐՈՊԱՅԻ ՈՒ ԱՇԽԱՐՀԻ ԲՐՈՆԶԵ ՄԵԴԱԼԱԿԻՐ ՌՈՒԴՈԼՖ ԳԱՐԲՈՅԱՆ