«Ժողովուրդ». ԱԺ արտահերթ նստաշրջանում բախումնե՞ր են սպասվում

«Ժողովուրդ» օրաթերթը գրում է. ««Ժողովուրդ» օրաթերթը ԱԺ կայքից պարզեց, որ ՀՀ Ազգային ժողովի նախագահի որոշմամբ՝ 2026 թվականի հուլիսի 2-ին՝ ժամը 11:00-ին, Կառավարության նախաձեռնությամբ կգումարվի Ազգային ժողովի արտահերթ նստաշրջան։

Օրակարգային նախագծերի ուսումնասիրությունը ցույց է տալիս, որ իշխանությունները պատրաստվում են մի շարք առանցքային փոփոխություններ իրականացնել ընտրական, քրեական և տնտեսական ոլորտներում։

1. Ընտրական օրենսգրքի և Հանրաքվեների մասին օրենքի փոփոխություններ. արտերկրում բնակվող մեր հայրենակիցներին զրկում են ձայնից

ՔՊ-ական պատգամավորներ Ալխաս Ղազարյանի, Արուսյակ Մանավազյանի, Հասմիկ Հակոբյանի և Արուսյակ Ջուլհակյանի հեղինակած նախագծով առաջին և երկրորդ ընթերցմամբ քննարկվելու են «Ընտրական օրենսգիրք» և «Հանրաքվեի մասին» սահմանադրական օրենքներում լրացումներն ու փոփոխությունները։

Փաստաթղթերի ուսումնասիրությունից պարզ է դառնում, որ Ներքին գործերի նախարարության հետ համագործակցությամբ մշակված այս նախագծով իշխանությունը ցանկանում է արմատապես փոխել ընտրողների շրջանակը։

183 օրվա ցենզը. Այսուհետ ընտրություններին և հանրաքվեներին մասնակցելու իրավունք կունենան միայն այն քաղաքացիները, ովքեր քվեարկության օրվան նախորդող 48 օրվա (իսկ ԱԺ արտահերթ ընտրությունների դեպքում՝ 28 օրվա) դրությամբ, նախորդող 365 օրվա ընթացքում փաստացի 183 և ավելի օր գտնվել են Հայաստանի Հանրապետությունում։

Բացառություն կկազմեն միայն այն անձինք, ում բացակայությունը պայմանավորված է եղել ՀՀ հանրային ծառայության մեջ գտնվելու բերումով (ծառայողական նպատակներով) կամ արտերկրի ԲՈՒՀ-երում ուսանելու հանգամանքով։

Ինչո՞վ է հիմնավորվում. Իշխանությունները հղում են անում Սահմանադրական դատարանի ՍԴՈ-945 որոշմանը՝ պնդելով, որ քաղաքացիությունը չպետք է լինի միայն ձևական իրավական կապ կամ անձնագիր ունենալ, այլ պետք է արտացոլի իրական կապ պետության հետ։ Ըստ նրանց՝ որոշումների հետևանքները պետք է կրեն նրանք, ովքեր իրապես ապրում են Հայաստանում։

2. ՀՀ դրոշի մասին օրենքի և Քրեական օրենսգրքի փոփոխություններ. Եռագույնը՝ բոլոր գյուղերի ու քաղաքների մուտքերին

Ալեն Սիմոնյանի և Ալխաս Ղազարյանի կողմից առաջարկվում է ուշագրավ լրացում կատարել «Հայաստանի Հանրապետության դրոշի մասին» օրենքում։

Օրենքի նոր նախագծով սահմանվում է պարտադիր պահանջ. ՀՀ պետական դրոշը մշտապես պետք է բարձրացված լինի յուրաքանչյուր քաղաքային և գյուղական համայնքի վարչական տարածքի հիմնական մուտքերի մոտ։

Ըստ հեղինակների՝ այսօր բազմաթիվ բնակավայրերի մուտքերում պետական դրոշը կա՛մ ընդհանրապես բացակայում է, կա՛մ գտնվում է ոչ պատշաճ վիճակում։ Այս փոփոխությամբ իշխանությունները ցանկանում են ստեղծել միասնական պետական խորհրդանշական միջավայր և ուժեղացնել ազգային ինքնագիտակցությունը։

Բացի այդ, Ալեն Սիմոնյանը, Վահագն Ալեքսանյանն ու մի խումբ այլ պատգամավորներ հանդես են եկել Քրեական օրենսգրքում, «Հանրային ծառայության մասին» և «Համայնքային ծառայության մասին» օրենքներում փոփոխություններ անելու նախաձեռնությամբ։

Էլ ի՞նչ կքննարկվի արտահերթին

Երևան քաղաքի և տրանսպորտի հսկայական փաթեթ. Կառավարությունը բերում է Երևանում տեղական ինքնակառավարմանը, ավտոկայանատեղերի վճարներին, աղբահանությանը, ինչպես նաև տեսանկարահանող սարքերով հայտնաբերված խախտումների վարչական վարույթներին վերաբերող մեծածավալ փոփոխություններ։

«Ժողովուրդ» օրաթերթը կշարունակի հետևել իրադարձությունների զարգացմանը և առաջիկա նիստի ընթացքում սպասվող հնարավոր թեժ բախումներին»։

Առավել մանրամասն թերթի այսօրվա համարում

Այս թեմայով Սպասվում են կարճատև անձրև և ամպրոպ. օդի ջերմաստիճանը կնվազի 2-4 աստիճանով «Ամենաիսկական դժոխքը» Կիևում սպասվում է հոկտեմբերին. The Economist Օդի ջերմաստիճանը կբարձրանա 4-6 աստիճանով․ տեղումներ չեն լինի Ցավոտ բացահայտումներ են սպասվում Ջերմաստիճանը կնվազի 5-8 աստիճանով, սպասվում է կարկուտ, անձրև․․․ ի՞նչ եղանակ է կլինի սեպտեմբերի 7-ից 10-ը