Ձեր սխալն ամենասկզբից էր. Թելման Պետրոսյանի բաց նամակը Նարեկ Կարապետյանին

 

«Հարգելի՛ Նարեկ,

 

Ձեր սխալը, իմ կարծիքով, ամենասկզբից էր, երբ չկարողացաք այնպես անել, որ բոլոր պայքարող քաղաքական ուժերը կոնսոլիդացվեն ձեր շուրջը։ Գիտե՞ք՝ ինչու չկարողացաք։ Որովհետև կարծում էիք, որ այսպես թե այնպես արդեն հաղթել եք։ Քաղաքական էգոն ստիպեց հավատալ, որ միայն դուք եք փոփոխության կրողը, և դրա պատճառով չկարողացաք ձևավորել միասնական ճակատ։

 

Դուք հաշվի չառաք, որ ձեր դեմ աշխատելու էին վարչական ռեսուրսները, քաղաքական ճնշումները, քարոզչական մեքենան և ընտրական գործընթացների նկատմամբ մարդկանց անվստահությունը։ Այդ ամենը պետք էր հասկանալ և նախապես պատրաստ լինել։ Քաղաքականությունը ցանկություններով չի առաջնորդվում, այլ սառը հաշվարկով և հեռատեսությամբ։

 

Ամենամեծ խնդիրը, սակայն, այն էր, որ մարդկանց ամբողջ ընթացքում ներկայացնում էիք միայն հաղթանակի սցենարը։ Չասացիք, թե ինչ եք անելու, եթե արդյունքները ձեր սպասածի պես չլինեն։ Լավ քաղաքական ուժը միշտ պետք է ունենա ոչ միայն պլան Ա, այլ նաև պլան Բ և պլան Գ։

 

Այսօր էլ կարծես կանգնել եք մեկ այլ խնդրի առաջ։ Թվում է՝ վախենում եք այն մեղադրանքներից, թե եթե վերցնեք մանդատները, մարդիկ կասեն, որ ի սկզբանե դրա համար էիք պայքարում։ Բայց եթե իսկապես պայքարել եք հանուն ձեր ընտրողների, ապա մանդատ վերցնելը չպետք է դիտվի որպես նպատակի ավարտ, այլ որպես պայքարի հերթական հարթակ։ Մանդատը գործիք է, ոչ թե վերջնակետ։

 

Եթե վստահ եք ձեր գաղափարներին և ձեր ասածներին, ապա պետք է շարունակեք պայքարը բոլոր հնարավոր հարթակներում՝ թե՛ ԱԺ-ում, թե՛ ԱԺ-ից դուրս։ Քաղաքական ուժի արժեքը ոչ թե նրա մեջ է, թե քանի մանդատ ունի, այլ թե ինչպես է օգտագործում իրեն վստահված հնարավորությունները։ Այս պահին ձեր ընտրողները սպասում են ոչ թե արդարացումների, այլ հստակ խոսքի։ Ընդունեք ձեր սխալները, ներկայացրեք հետագա քայլերը և ապացուցեք, որ նրանց ձայները չեն կորել, այլ շարունակելու են ծառայել այն պայքարին, որի համար ձեզ վստահել են։