2021-ին Քոչարյանի ձախողված «ձեւը» կրկնելը, ինչո՞ւ դարձավ Կարապետյանների բրենդը. ԶԱՐՄԱՆՔ

Ընդամենը երկու օր առաջ Ազգային ժողովում ՆԻԿՈԼ ՓԱՇԻՆՅԱՆԸ կոկորդ էր պատռում, թե՝ 300 հազար ադրբեջանցիների թեման ֆեյք, մտացածին, հորինովի թեմա է, նման բան չի եղել, չկա եւ չի լինելու: Մինչդեռ, այսպես կոչված, «Արեւմտյան Ադրբեջան» համայնքի վարչության նախագահ Ազիզ Ալեքբերլին «Վերադարձ դեպի Արեւմտյան Ադրբեջան» երրորդ համագումար-փառատոնի շրջանակում հայտարարել է, որ «Արեւմտյան ադրբեջանցիների» վերադարձն իրենց «հայրենի հողեր» համապատասխանում է մարդու հիմնարար իրավունքներին եւ միջազգային իրավունքին։ Նա ընդգծել է, որ տարածաշրջանում ձեւավորված նոր իրողությունները վկայում են «արեւմտյան ադրբեջանցիների»՝ իրենց «հայրենի հողեր վերադարձի» անխուսափելիության մասին։ Ալեքբերլին հավելել է, որ Հայաստանը պետք է ընդունի այս իրողությունը եւ ստեղծի պայմաններ՝ «արեւմտյան ադրբեջանցիների» անվտանգ, արժանապատիվ եւ խաղաղ վերադարձի համար։ Երկու օր առաջ «ֆեյք» էր, այսօր արդեն ադրբեջանական պահանջ՝ բա հիմա ո՞վ է ստում՝ Ալիեւի ազիզալեքբերլիները, թե՞ Փաշինյանն ու իր իշխանությունը։

Զարմանալի հայտարարություններ հնչում են նաեւ ընդդիմադիր դիրքավորվածների կողմից: Ուղիղ մեկ տարի առաջ իր հայտնի հայտարարությունից հետո՝ Հայաստանում կալանավորվեց գործարար Սամվել Կարապետյանը: Անդրադառնալով օրացույցային այդ օրվան՝ եղբորորդին՝ «Ուժեղ Հայաստան» կուսակցության համակարգող եւ նախընտրական ցուցակի առաջին համար ՆԱՐԵԿ ԿԱՐԱՊԵՏՅԱՆԸ գրում է. «Մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը հարձակվել է հայ եկեղեցու վրա, հայ ժողովրդի վրա: Եթե չհաջողվի քաղաքական գործիչներին, մենք էլ մեր ձեւով ենք մասնակցելու այդ ամեն ինչին. Մեկ տարի առաջ այս օրը ասված խոսքից հետո՝ մենք արդեն 340 հազար հայերով ենք մասնակցում էս ամեն ինչին»: Բայց ինչի՞ն, այդպես էլ չի հստակեցնում Կարապետյան կրտսերը: Եթե նկատի ուներ Հայ եկեղեցու պաշտպանությանը, ի գիտություն հիշեցնենք, որ մինչեւ իր եւ հորեղբոր քաղաքականություն մտնելը՝ անհատ մարդիկ, քաղաքական ու հասարակական գործիչներ, քաղաքական ուժեր կան, որ դեռ 2018-ից ամեն գնով պաշտպանել են եկեղեցուն: Իսկ եթե իրենց ասած՝ «մեր ձեւով» կոնցեպտի մասին է խոսքը, ապա այդպես էլ չհասկացանք՝ 2021-ի արտահերթ ընտրություններին իրականացրած ՀՀ երկրորդ նախագահ Ռոբերտ Քոչարյանի ձախողված «ձեւը» կրկնելը, ինչո՞ւ դարձավ Կարապետյանների հեղինակային բրենդը:

Բոլոր անհասկանալի իրավիճակներում հայաստանյան քաղաքական միտքը հանգում է մի «փայլուն» գաղափարի՝ ստորագրահավաք իրականացնել, առկա հանրային ցասումը պարպել այդ թղթերի մեջ ու ցրվել տներով: Ընտրությունների արդյունքներից հետո՝ կրկին անորոշ վիճակ է՝ ընդդիմությունը փողոցային պայքար սկսի՞, թե սուսուփուս մանդատները վերցնի, ընտրությունները լեգիտիմացնի՞, թե՞ ոչ, իսկ «ամենակարող» ստորագրահավաքը ուշանում էր ու ուշանում: Եվ մինչ այս հարցերի տակից փորձում է խորհրդարան անցած ընդդիմությունը դուրս գալ, ահա պաշտպանության նախկին նախարար Արշակ Կարապետյանի «Համահայկական ճակատ» կուսակցությունը ստանձնեց ոչ մի տեղ չտանող գործընթացը: Կուսակցության նախագահ ԱՐՍԵՆ ՎԱՐԴԱՆՅԱՆՆ Ազատության հրապարակում ստորագրահավաք է իրականացնում՝ դեմ լինելով ընտրության արդյունքներին: Հետո ի՞նչ են անելու այդ ստորագրությունները, թերեւս լավագույնս կարող է պատասխանել Ավետիք Չալաբյանի «Հայաքվե» նախաձեռնությունը, որը ստորագրահավաք էր իրականացնում՝ վստահեցնելով, որ Արցախը երբեք չի լինելու Ադրբեջանի կազմում: Անգամ վկայականներ էին բաշխում ստորագրողներին:

ԶԱՐՄԱՑԱԾ Է «ԻՐԱՎՈՒՆՔ»-Ը

Այս թեմայով Գուցե արժե հարցնեք ինքներդ ձեզ՝ ինչի՞ եք հասցրել այս երկիրը․ ԶԱՐՄԱՆՔ Որ խելքներդ չի հասնում, ծպտուն մի հանեք․ ԲԱՄԲԱՍԱՆՔ Երեւանն արդեն շատ մեծ է, դրա համար չվում են Տիգրանաշեն․ ԸՆԿԵՐ ՓԱՆՋՈՒՆԻ «Դաբրոներ են» տվել Փաշինյանի աշխատակազմի նախկին ղեկավար Հարությունյանը, առողջապահության ոլորտը «վարած-ցանած» նախկին նախարար Արսեն Թորոսյանը, Կոտայքի մարզպետ Ահարոն Սահակյանն ու ՏԿԵ նախարար Դավիթ Խուդաթյանը «Իրավունք». «Որ խելքներդ չի հասնում, ծպտուն մի հանեք». Փաշինյանն օդերով է հանել նորելուկ պատգամավորներին