Սաղաթելյանը հայտարարել է ընդդիմության միջև կառուցողական համաձայնության մասին

«Հայաստան» դաշինքում հայտարարել են ընդդիմադիր ուժերի միջև մի շարք հարցերի շուրջ ձևավորված միասնական դիրքորոշման մասին։ Ազգային ժողովի «Հայաստան» խմբակցության պատգամավոր, ՀՅԴ Հայասատնի ԳՄ ներկայացուցիչ Իշխան Սաղթելյանը տեղեկացրել է ընդդիմադիր ուժերի քննարկումների մասին։ «Այս օրերին բավականին ակտիվ և կառուցողական քննարկումներ են տեղի ունեցել ընտրություններին մասնակցած մի շարք ընդդիմադիր ուժերի միջև։

Ընդհանուր մոտեցումներում բավականին կառուցողական համաձայնություն կա»,- ընդգծել է Սաղաթելյանը։ Նա չի մանրամասնել հարցերը, բայց հավելել է, որ քննարկումները շարունակվում են և առաջիկայում ընդդիմությունն ընտրությունների վերաբերյալ ամբողջական գնահատականով հանդես կգա ու կլինեն նորություններ։

Սաղաթելյանը նաև նշել է, որ իրենց ուժն այսօր՝ ընտրությունների վերջնական արդյունքների ամփոփման օրը ժամը 18:00-ին լինելու է ԿԸՀ-ի դիմաց: «Մենք այսօր ներկա ենք լինելու ԿԸՀ-ի առջև, բարձրացնելու մեր բողոքի ձայնը և հանձնաժողովից պահանջելու ենք առաջնորդվել օրենքներով և Սահմանադրությամբ»,- հավելել է նա։ Սաղաթելյանի խոսքով՝ ԿԸՀ-ն պետք է կամ առաջնորդվի իշխանությունների պատվերով և շարունակի, իր ձևակերպմամբ, կեղծել ընտրությունների արդյունքները, կամ օրենքի շրջանակում պատշաճ գնահատական տա ընդդիմադիր ուժերի ներկայացրած բողոքներին։

Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։ «Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։

Շուրջ 50 ընտրատեղամասում վերահաշվարկի դիմում էր  ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։ «Ուժեղ Հայաստանը» և «Միասնության թևերն» ավելի ուշ՝ հունիսի 12-ին, ընտրությունների արդյունքներն անվավեր ճանաչելու դիմում էին ներկայացրել ԿԸՀ, «Ուժեղ Հայաստանը» պահանջել էր նաև վերաքվեարկություն՝ 2 տեղամասերում։

Հունիսի 12-ին ԿԸՀ-ն ամփոփել էր 637 ընտրական տեղամասերի ընտրական հանձնաժողովների իրականացրած վերահաշվարկի արդյունքները: Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։

Այս թեմայով «Իշխան Զաքարյանին որ հանդիպեք, ի՞նչ կասեք, կոռուպցիայի մեջ եղե՞լ է», «Գնահատական չեմ կարող տալ» Աննան վերստին փաստեց՝ Քոչարյանը Ղրիմը չի ճանաչում դե յուրե ՌԴ կազմում Ինչպես Իշխան Զաքարյանի ընտանիքը դարձավ Ծաղկաձորի սպորտային համալիրի սեփականատեր. «Հետք» Փաշինյանը խնդիր ա դրել կամ իր առաջ են դրել ՌԴ-ի ազդեցությունը ՀՀ-ում վերացնել, բերել մի ուրիշ ուժ Ի՞նչ երեսով է Իշխան Զաքարյանը կրկին ակտիվացել․ ԶԱՐՄԱՆՔ