Սրանք խոսելու տեղ չունեն, պարզապես մնում է ժողովուրդը հասկանա. Էդուարդ Շարմազանով

«Իրավունք»-ը զրուցել է ՀՀԿ գործադիր մարմնի անդամ ԷԴՈՒԱՐԴ ՇԱՐՄԱԶԱՆՈՎԻ հետ։

— Նախընտրական շրջանն ավարտվում է, ինչպես կմեկնաբանեք այն, որ որոշ դեպքերում իբրեւ ընդդիմություն ներկայացվող քաղաքական ուժերը Հանրայինի բանավեճերի ժամանակ երբեմն ավելի շատ իրար էին փնովում, քան իշխանությանը:

— Դե ամեն ուժին ընդդիմություն հո չեն ասի: Չեմ կարծում, որ բոլոր նրանք, ովքեր իրենց ընդդիմություն են հռչակում, իրական ընդդիմություն են: Ինձ համար առնվազն մի քանի ընդդիմադիր ուժ կա, նրանք էլ իրենց շատ կոռեկտ, համաչափ պահեցին: Բայց այո, իրավացի եք, ցավոք կան մարդիկ, ովքեր ընդդիմադիր ձայները փոշիացնում են:

— ՀՀԿ-ն չի մասնակցում ընտրություններին, բայց էլի հանրապետականներին էին քննարկում: Ինչո՞ւ:

— Թող գան ՀՀԿ-ին ուղիղ հարցեր տան, Հանրապետականն էլ կպատասխանի: Գուցե մտածում են, որ Հանրապետական կուսակցությանը քննադատելով` իրենց ձայները կավելանան: Այսինքն` այդ հեղափոխության կողմնակից հասարակությունը, որը 2018 թվականին մեզ մերժել է, հիմա ցանկանում են կռիվ տալ, տեսնելու համար, ով ավելի շատ է քննադատում Հանրապետականին, որպեսզի գուցե, մեր ժամանակաշրջանում, դժգոհ քաղաքացիների ձայներին տիրանան: Դե ընտրություններ են, ով ինչ ասես կարող է խոսել: ՀՀԿ-ն չի մասնակցում ընտրություններին: Մենք ասել ենք աջակցում ենք ընդդիմությանը եւ կոչ ենք անում ձայն տալ այն ուժերին, ովքեր խնդիր չունեն` անցողիկ շեմը հաղթահարելու: Մենք ասել ենք, որ այս իշխանությունը չարիքի իշխանություն է, որը դուրս է եկել Անկախության հռչակագրի դեմ: Այս իշխանությունը վտանգ եւ սպառնալիք է, որը խելոք կատարում է Ալիեւի բոլոր հրահանգները: Եվ այս իշխանության վերարտադրվելու դեպքում մենք կմոտենանք «Արեւմտյան Ադրբեջան» լինելուն:

— ԱԺ նախագահ Ալեն Սիմոնյանը հերքեց այն խոսակցությունը, որ 300 հազար ադրբեջանցի գալու եւ բնակվելու են Հայաստանում: Ի՞նչ եք կարծում` ստո՞ւմ են:

— Զարմանում եմ, որ Հայաստանում կան բանական մարդիկ, ովքեր դրանց հերքումներին կամ խոստումներին հավատում են: Նույն Ալեն Սիմոնյանը, իր շեֆի հետ միասին 2021 թվականի ընտրություններից հետո, խորհրդարանում ուղղակիորեն ասում էր, որ Արցախում ապագա կա: Հիմա Արցախում հայ չկա: Նռները ձեռքները 2018-2019 թթ.-երին գնում ասում էին՝ Աղդամն իմ հայրենիքն է: Պատերազմի ժամանակ ասում էին` Արցախը անկախ է եւ լինելու է ինքնորոշված: Նայեք, սեպտեմբերի 27-ին, Նիկոլ Փաշինյանի ելույթը ԱԺ-ում: Թող իրենք գնան իրենց նախկին հայտարարությունների հետ կռիվ անեն: Ալեն Սիմոնյանը այն պետական գործիչն է, որը կանգնել եւ հայտարարել է 2021 թվականի ընտրություններից հետո, լրագրողների հետ ճեպազրույցի ժամանակ, որ Արցախում ապագա կա ու ծափահարել է: Հիմա 2026 թիվն է, Արցախում ապագա կա՞: Արցախում հայ չկա:

— Բայց հետո էլ ասաց, թե սխալվել է...

— Այդ սխալն արժեցել է 140 հազար մարդու տնից-տեղից կտրելուն: Իրենց սխալն արժեցել է Արցախի կորստի, հազարավոր կյանքեր, տասնյակ հազարավոր մարդկանց վիրավոր սարքել, տասնյակ հազարավոր երեխաների չծնվելուն: Ի՞նչ է նշանակում սխալվել է: «Բլոտ» էր խաղո՞ւմ, որ 4 թուղթը մոռացել էր ցույց տար: Բա դա ենք ասում, որ իրենց սխալները շատ թանկ են նստում մեր ազգի ու պետության վրա:
2020 թվականին գնում էին սահմանադրական բարեփոխումների՝ հպարտ քաղաքացու անձնագրով: Ես Նիկոլ Փաշինյանին ասել եմ, մենք քեզ թողել ենք երկու հայկական պետություն՝ 42 հազար քառակուսի կիլոմետր տարածքով: Դու մտածի` ինչ ես թողելու: Կամ եթե Արցախը շուտ էր տված, բոլորով՝ թիմակիցներով գնում էին ինագուրացիայի, որ ի՞նչ անեին: Շուշիում գնում «Քոչարի» էին պարում, որ ի՞նչ: Ասում էին Արցախը մեր հայրենիքն է, բա ձեր հայրենիքը հանել տվե՞լ եք… Սրանք խոսելու տեղ չունեն, պարզապես մնում է` ժողովուրդը հասկանա: Իսկ կհասկանա, թե՝ ոչ, հունիսի 7-ին կերեւա:

ՆԱՆԱ ՍԱՐԳՍՅԱՆ

Այս թեմայով «Հրապարակ»․ Էդուարդ Թոփչյանը եւ կինը` իրավապահների ուշադրության կենտրոնում «Ալ Ահլի» նոր մարզիչը լավ գիտի Սպերցյանին, ամեն ինչ լավ կստացվի. Մուսաև Նախկին ԱԽ քարտուղարը հրապարակ է նետել լկտի կեղծիք պարունակող ստեր Ապրիլյան պատերազմի մասի. Շարմազանով Նորեկ, որը դառնում է թիմի հենասյունը. Արաբական մամուլը հիացած է Սպերցյանի խաղով Ի՞նչ կլինի «թավշյա հեղափոխության արդյունքում»։ 14.11.2018. Շարմազանով