Փաշինյանը հայ ժողովրդից թաքցնում է ԵՄ-ին միանալու հետևանքները․ Վոլոդին

Ռուսաստանի Պետդումայի նախագահ Վյաչեսլավ Վոլոդինը հայտարարել է, որ ՀՀ վարչապետ Նիկոլ Փաշինյանը, հավանաբար, անձնական պարտավորություն է ստանձնել երկիրը միացնել Եվրոպական միությանը և այժմ իրագործում է այն, գրել է TASS-ը։ Վոլոդինի պնդմամբ՝ Փաշինյանը թաքցնում է, թե ինչ հետևանքներ կարող է ունենալ հայ ժողովրդի համար Եվրասիական տնտեսական միությունից (ԵԱՏՄ) երկրի դուրս գալը։ Վոլոդինի խոսքով՝ Փաշինյանը «փորձում է ԵՄ-ի հետ միանալու բոլոր ծախսերը բարդել ԵԱՏՄ-ի և Ռուսաստանի վրա»։

Ռուս պաշտոնյան նաև ընդգծել է, որ կառավարության ղեկավարը բնակչության հետ բացահայտ չի խոսում այն մասին, թե երկրի համար ինչ արժեք կունենա ԵԱՏՄ-ից դուրս գալը։ Նա հավելել է, որ որ Փաշինյանին «չեն մտահոգում ժողովրդի ճակատագիրն ու երկրի պետականությունը», և նա հույս ունի, որ «ԵՄ-ին միանալը կպահպանի իր անձնական իշխանությունը»։ Վոլոդինի կարծիքով՝ ԵՄ-ին միանալու որոշման դեպքում Հայաստանը չի ստանա արտոնություններ և զարգացման աջակցություն։

Նրա ձևակերպմամբ՝ Հայաստանի հետ կվարվեն այնպես, ինչպես ժամանակին վարվեցին Ուկրաինայի հետ։ «Գործնականում պարզվեց, որ նույն ուկրաինական գյուղմթերքը, ըստ էության, այդպես էլ բաց չթողեցին եվրոպական շուկաներ՝ դրա համար սահմանելով խիստ և ոչ շահավետ սակագնային քվոտաներ։ Նույնը սպասվում է նաև Հայաստանին»,- ասել է Վոլոդինը։ Վերջինս նախազգուշացրել է նաև Հայաստանում հնարավոր տնտեսական հետևանքների մասին, ըստ որոնց՝ բնակիչների համար գազը կթանկանա գրեթե 4 անգամ, իսկ Ռուսաստանից Հայաստան իրականացվող անդրսահմանային դրամական փոխանցումները, որոնք այսօր կազմում են տարեկան մոտ 4 մլրդ դոլար (բոլոր փոխանցումների 2/3-ը), կտրուկ կկրճատվեն։

Բացի այդ, Պետդումայի նախագահը նշել է, որ ՀՀ քաղաքացիների համար կչեղարկվեն Ռուսաստան մուտք գործելու միգրացիոն արտոնությունները, իսկ աշխատանքի տեղավորումը հնարավոր կլինի միայն արտոնագրերով։ Մոսկվայի և Երևանի հարաբերությունները լարվել են՝ հայկական կողմից ՀԱՊԿ գործունեության քննադատության և Հայաստանի՝ Եվրամիության հետ կապերի ընդլայնման շուրջ հայտարարությունների ֆոնին։ Մոսկվայից հնչող կոշտ քննադատության ֆոնին ՌԴ-ն սահմանափակել էր ՀՀ-ից մի շարք ապրանքների ներմուծումը, որոնց թվում են ծաղիկները, «Ջերմուկ» հանքային ջուրը։ Կասեցվել էր նաև ալկոհոլային արտադրանքի առանձին խմբաքանակների իրացումը։ Ավելի ուշ սահմանափակումներ էին կիրառվել ՀՀ-ից որոշ մրգերի, իսկ հունիսի 2-ին՝ սերմապտուղների, կարտոֆիլի, սմբուկի և չրերի ներմուծման վրա։

Մայիսի 22-ին ՌԴ փոխվարչապետ Ալեքսեյ Օվերչուկը հայտարարել էր, որ ԵՄ-ին անդամակցելու որոշման պարագայում Հայաստանը կկորցնի որոշակի արտոնություններ, երկրի համար կսահմանվեն մաքսատուրքեր, ինչպես նաև կփոխվեն գազի և էլեկտրաէներգիայի սակագները։ ՌԴ նախագահ Վլադիմիր Պուտինը կոչ էր արել հայկական իշխանություններին կողմնորոշվել ԵԱՏՄ-ի և ԵՄ-ի միջև, իսկ ՌԴ ԱԳ նախարար Սերգեյ Լավրովն զգուշացրել էր ԵԱՏՄ արտոնությունների հնարավոր կորստի մասին: Մայիսի 29-ին ԵԱՏՄ երկրները ՀՀ-ին հորդորել էին ԵՄ-ին անդամակցության հարցով հանրաքվե անցկացնել։

Այս թեմայով Հայաստանը ցինիկաբար շահագործում է ԵԱՏՄ-ի հնարավորությունները․ Վոլոդին ՀՀ-ն կկորցնի սեփական ինքնությունը, ինչպես կորցրել է բրենդային կոնյակ անվանելու իրավունքը. Վոլոդին Զելենսկիի՝ երիտասարդ լինելու, Պուտինի նկատմամբ առավելություն ունենալու խոսքերը հիվանդ լինելու նշան են. Վոլոդին Բայդենին ու Բլինկենին կարող է էլեկտրական աթոռ սպասել. Վոլոդին Պուտինի դեմ մահափորձը պետք է հետաքննվի․ Վոլոդին