Պետք չէ ամաչել հայկական լինելուց. ինչու ձախողվեց Սիմոնը «Եվրատեսիլ»-ում, ըստ Վահագ Ռաշի

«Նոր նկատեցի, որ հերթական անգամ ձախողվել ենք «Եվրատեսիլ»-ում։ Անկեղծ ասած՝ մենք այս մրցույթին շատ ավելի լուրջ ենք վերաբերվում, քան հենց Եվրոպան։ Շատ երկրներում մարդիկ նույնիսկ տեղյակ չեն մրցույթի գոյության մասին, կամ լավագույն դեպքում հիշում են միայն եզրափակիչի օրը։ Այն, ինչ մեզ համար երբեմն ազգային մակարդակի իրադարձություն է, շատերի համար պարզապես հերթական հեռուստաշոուն է։ Այդ պատճառով էլ պետք է վերջապես հասկանանք՝ այստեղ հաղթելու համար միայն «եվրոպական ճաշակին» հարմարվելը բավարար չէ։

 

Իմ կարծիքով՝ մեր հիմնական սխալը սկսվում է հենց ընտրությունից։ Եթե հիշենք Հայաստանի լավագույն արդյունքները, կտեսնենք, որ հաջողություններ ունեցել ենք այն ժամանակ, երբ ներկայացրել են արդեն ձևավորված, կայացած ու հանրության կողմից ճանաչված արտիստներ։ Մարդիկ պետք է զգան, որ բեմում կանգնած մարդը արդեն պատմություն, ճանապարհ ու դեմք ունի։ Իսկ վերջին տարիներին հաճախ ուղարկում ենք արտիստների, որոնց նույնիսկ Հայաստանում շատերը դժվարությամբ են ճանաչում, կամ ճանաչում են մեկ-երկու երգով։