«Ժողովուրդ». Ինչ ունեցվածք է հայտարարագրել ՔՊ ցուցակի 7-րդ համարը՝ Ռուբինյանը

«Ժողովուրդ» օրաթերթը գրում է. «2026 թվականի հունիսի 7-ին կայանալիք Ազգային ժողովի ընտրություններին ընդառաջ «Ժողովուրդ» օրաթերթը շարունակում է ներկայացնել քաղաքական ուժերի ընտրական ցուցակներում ընդգրկված թեկնածուների կենսագրություններն ու գույքային հայտարարագրերը։ Այս անգամ ուշադրության կենտրոնում է «Քաղաքացիական պայմանագիր» կուսակցության ընտրական ցուցակի 7-րդ համարը՝ ՀՀ Ազգային ժողովի նախագահի տեղակալ Ռուբեն Ռուբինյանը։

Ռուբինյանի՝ 2025 թվականի տարեկան հայտարարագրից պարզ է դառնում, որ նա Երևանում ունի բնակարան և ավտոկայանատեղի։ Բնակարանը, որը գնվել է «Կանաչ Թաղ» ՍՊԸ-ից, արժեցել է 47 մլն դրամ, իսկ ավտոկայանատեղին՝ 5 մլն դրամ։ Երկու անշարժ գույքերն էլ ձեռք են բերվել 2024 թվականի նոյեմբերի 26-ին և հանդիսանում են նրա միանձնյա սեփականությունը։ ԱԺ փոխնախագահը տրանսպորտային միջոց չի հայտարարագրել, սակայն ներդրումներ է կատարել պարտատոմսերում։

Ռուբինյանը հայտարարագրել է նաև 5 մլն դրամ բանկային ավանդ, իսկ բանկային հաշիվներում տարեվերջին ունեցել է 1 մլն 453 հազար դրամից ավելի գումար։ Կանխիկ դրամ նա չի հայտարարագրել։ Հայտարարագրի համաձայն՝ Ռուբեն Ռուբինյանի տարեկան եկամուտը կազմել է 22 մլն 847 հազար դրամից ավելի, որից 17 մլն 886 հազար դրամը ստացել է Ազգային ժողովի աշխատակազմից՝ որպես աշխատավարձ։

Միևնույն ժամանակ, նրա վարկային պարտավորությունները շարունակում են մնալ զգալի։ 2025 թվականի դեկտեմբերի 31-ի դրությամբ բնակարանի ձեռքբերման համար ստացված վարկի մայր գումարի մնացորդը կազմել է շուրջ 31 մլն 932 հազար դրամ։ Հաշվետու տարում վարկի մարմանն ուղղված վճարումները կազմել են ավելի քան 5 մլն դրամ։

Ռուբեն Ռուբինյանը կրթությամբ միջազգայնագետ է։ 2010 թվականին ավարտել է Երևանի պետական համալսարանի միջազգային հարաբերությունների ֆակուլտետը, այնուհետև ուսումը շարունակել է Լոնդոնի համալսարանական քոլեջում և Լեհաստանի Յագելոնյան համալսարանում՝ ստանալով մագիստրոսի աստիճաններ քաղաքականության, անվտանգության և եվրոպագիտության ոլորտներում։ Նա «Քաղաքացիական պայմանագիր» կուսակցության հիմնադիր անդամներից է։ Տարբեր տարիներին եղել է կուսակցության վարչության անդամ և մամուլի խոսնակ։ Մինչև 2018 թվականը աշխատել է «Արարատ Նյուզ»-ում, «Բեթքոնստրակտ»-ում և թարգմանություններ է իրականացրել «Թումո»-ի համար։ 2018 թվականին զբաղեցրել է ՀՀ արտաքին գործերի նախարարի տեղակալի պաշտոնը, իսկ 2021 թվականի օգոստոսի 3-ից ընտրվել է ՀՀ Ազգային ժողովի նախագահի տեղակալ»։

Առավել մանրամասն թերթի այսօրվա համարում

Այս թեմայով «Ժողովուրդ». Ինչ վիճակ է ԱԱԾ մեկուսարանում․ Ռոբերտ Քոչարյանը՝ մի քանի քառակուսի մետրում, քրեական հեղինակությունները՝ նույն խցերում «Հրապարակ»․ Ինչ շինարարություն են սկսել ԱԱԾ «պադվալում» Առնվազն ծիծաղելի է մանկամիտներս մութ սենյակում սեւ կատու փնտրելը. հատուցումը ծանր է լինելու՝ այն սարերի հետեւում չի «Իրավունք». Ինչ պաշտոն են խոստացել նախկին ԱԽՔ-ին Հորոսկոպ հոկտեմբերի 31-ի համար. ինչ է սպասում կենդանակերպի նշաններին