Ընդդիմադիր մեկ ճակատով ընտրություններին մասնակցելը պահանջված մոտեցում էր. Փոստանջյան

Կենտրոնական ընտրական հանձնաժողով ընտրություններին մասնակցելու հայտ ներկայացրած քաղաքական ուժերի շարքում չկար «Երկիր ծիրանի» կուսակցությունը: Մինչդեռ կուսակցությունն անցկացրել էր համագումար՝ ընտրություններին մասնակցելու եւ նախընտրական ցուցակը հրապարակելու օրակարգով: Այս մասին «Իրավունք»-ը զրուցեց կուսակցության նախագահ ԶԱՐՈՒՀԻ ՓՈՍՏԱՆՋՅԱՆԻ հետ:

— Այն, որ Դուք անցկացրեցիք համագումար, ենթադրվում էր` ընտրություններին մասնակցելու հայտ կներկայացնեք, ի՞նչ փոխվեց:

— Նախ համագումարը միայն ընտրությունների հետ չէր կապված, այլ ընդհանուր ամեն ինչի հետ: Համագումարի արդյունքում կուսակցությունը բանաձեւ է ընդունել: Շուտով կհրապարակենք մեր դիրքորոշումն ընդհանուր առմամբ ամբողջ քաղաքականության եւ ապագա սպասվելիք քաղաքական իրադարձությունների վերաբերյալ։ Ինչու հայտ չներկայացրեցիք, այս հարցի պատասխանը եւս կլինի բանաձեւի մեջ, կիմանաք:

— Արդեն իսկ հայտնի է, թե որ քաղաքական ուժերն են այս ընտրություններին պայքարելու իշխանության համար: Ինչպե՞ս կգնահատեք ընդդիմադիր ուժերի շանսերը, առանձին-առանձին մասնակցելով՝ կկարողանա՞ն Նիկոլ Փաշինյանանին հեռացնել իշխանությունից:

— Դա ես ցանկանում եմ եւ մաղթում եմ բոլորին հաջողություն։ Իհարկե, բացի այն անձից, ում Դուք հիշատակեցիք եւ նաեւ ովքեր նրան կսպասարկեն: Նրանց էլ պետք է հանել քաղաքական այս անցուդարձից, որովհետեւ նրանք շարունակեցին ցեղասպանների գործը 21-րդ դարում, հետեւաբար, ամեն ինչ պետք է անել, որ առնվազն դրան վերջ դրվի։

— Ինչու՞ հնարավոր չէր ձեւավորել միասնական ընդդիմադիր ճակատ ընդդեմ այս իշխանության եւ լայն դաշինքով մասնակցել ընտրություններին, երբ վերջապես եկել էր պահը, որ շատերն էին հասկացել` ինչ իշխանության հետ գործ ունենք:

— Այդ հարցի պատասխանը չգիտեմ, բայց կարծում եմ՝ դա պահանջված մոտեցում էր։ Այո՛, պահանջված էր, որ միասնական մեկ ճակատով ընդդիմությունը մասնակցեր ընտրություններին: Բայց, այնուամենայնիվ, եկեք չբացառենք, որ միգուցե այս դեպքում էլ ինչ-որ մի շարժ տեղի ունենա: Այս առումով մեր կուսակցության բանաձեւի մեջ ավելի հստակորեն ամեն ինչ նշված է լինելու։

ՀՐԱՆՏ ՍԱՐԱՖՅԱՆ

Այս թեմայով Ձյուն և բուք է սպասվում. մարզերի ու Երևանի ճանապարհներին կդիտվի մերկասառույց Ովքեր են Գևորգ Ստեփանյանի մեքենան հրկիզելու պատվիրատուները․ բացառիկ մանրամասներ․ «Իշխանություն» Երևանում 3 անչափահաս տղաների ծայրահեղ ծանր վիճակում երեկ տեղափոխել են հիվանդանոց Շախմատը միշտ եղել է իմ հետաքրքրությունների շրջանակում. Երեւանի շախմատի ֆեդերացիայի նախագահի առաջին հարցազրույցը Ուրա՞ էնտեղ ընդդիմություն՝ ծաղրածուներ են, որոնք եկել են մարդկանց ուրախացնելու քաղաքական թիվ մեկ ամբիոնից․ Գագիկ Մելքոնյան