ԱՄՆ-ն և Իրանը համաձայնության չեն եկել Իսլամաբադի բանակցություններում

ԱՄՆ-ն և Իրանը չեն կարողացել հասնել համաձայնության պատերազմի դադարեցման շուրջ Իսլամաբադում կայացած բանակցություններից հետո, հաղորդում է Reuters-ը։ Բանակցությունները տևել են շուրջ 21 ժամ։ ԱՄՆ փոխնախագահ Ջեյ Դի Վենսը հայտարարել է, որ կողմերը համաձայնության չեն հասել, և, նրա խոսքով, դա ավելի վատ նորություն է Իրանի համար, քան ԱՄՆ-ի։ Նա նշել է, որ Թեհրանը չի ընդունել Վաշինգտոնի պայմանները, այդ թվում՝ միջուկային զենք ստեղծելուց հրաժարվելու վերաբերյալ։ «Մեզ անհրաժեշտ է հստակ պարտավորություն, որ նրանք չեն ձգտի ունենալ միջուկային զենք և չեն փորձի ձեռք բերել այն արագ ստեղծելու գործիքներ»,- ասել է Վենսը։ Իրանական Tasnim գործակալությունը հայտնել է, որ համաձայնության չհասնելու պատճառն ԱՄՆ-ի «չափազանց» պահանջներն են։

Իրանական այլ ԶԼՄ-ներ նշել են, որ մի շարք հարցերի շուրջ կողմերը մոտեցել են համաձայնության, սակայն հիմնական տարաձայնությունները վերաբերում են Հորմուզի նեղուցին և Իրանի միջուկային ծրագրին։ Իրանի ԱԳՆ ներկայացուցիչը հայտարարել է, որ բանակցությունները անցել են փոխադարձ անվստահության մթնոլորտում՝ նշելով, որ մեկ փուլում համաձայնության հասնել չէր էլ ակնկալվում։ Reuters-ի տվյալներով՝ բանակցություններից հետո ԱՄՆ և Իրանի պատվիրակությունները հեռացել են Իսլամաբադից։ ԱՄՆ պատվիրակության կազմում էին նաև հատուկ ներկայացուցիչ Սթիվ Ուիթքոֆը և Դոնալդ Թրամփի փեսա Ջարեդ Քուշները, իսկ Իրանի կողմից մասնակցել են խորհրդարանի խոսնակ Մոհամմադ Բաղեր Ղալիբաֆը և արտգործնախարար Աբբաս Արաղչին։

Գործակալությունը նշում է, որ մինչ բանակցությունները իրանական աղբյուրները պնդում էին՝ ԱՄՆ-ը պատրաստ է ապասառեցնել Իրանի ակտիվները Կատարում և այլ երկրների բանկերում, սակայն Վաշինգտոնը հերքել է այդ տեղեկությունը։ Ըստ աղբյուրների՝ Թեհրանը պահանջել է նաև վերահսկողություն Հորմուզի նեղուցի նկատմամբ, ռազմական փոխհատուցումներ և հրադադար ամբողջ տարածաշրջանում, այդ թվում՝ Լիբանանում։ ԱՄՆ-ն և Իսրայելը հարվածներ էին հասցրել Իրանին փետրվարի 28-ին:

Հարձակումների հետևանքով զոհվել էին բարձրաստիճան պաշտոնյաներ, այդ թվում՝ Գերագույն առաջնորդ Ալի Խամենեին: Թեհրանը պատասխանել էր՝ հարվածներ հասցնելով տարածաշրջանում ԱՄՆ-ի և Իսրայելի թիրախներին: Ապրիլի 8-ին ԱՄՆ-ն և Իրանը համաձայնության էին եկել երկշաբաթյա հրադադարի շուրջ, որը ներառում էր Հորմուզի նեղուցի անհապաղ բացումը:

Այս թեմայով Իրանում հանդիսավորությամբ նշվել է Հայաստանի Անկախության տոնը Ունի Հայաստանը գազի այլընտարանք. Մեկնաբանում է տնտեսագետը Եթե ​​ԱՄՆ-ն կատարի իր պարտավորությունները, մենք կբացենք նաև Հորմուզի նեղուցը. Մասուդ Փեզեշքիան Երրորդ երկիր խառնում է վիճակը. քրդական ներուժը ուղղորդում են Իրանի դեմ Որքան են խոստացել Իրանում յուրաքանչյուր ամերիկացի զինվորականի համար