Որ նախարարություններն են հասարակական հիմունքներով օգտվում ԼԳԲՏ+ համայնքի խորհուրդներից

Հայաստանյան առկա իրողությունները նոր հարցեր են առաջացնում պետական կառավարման համակարգի ինքնուրույնության, որոշումների թափանցիկության եւ արտաքին ազդեցությունների վերաբերյալ։ Խոսքը մասնավորապես վերաբերում է ԱՄՆ-ի եւ Մեծ Բրիտանիայի կառավարությունների կողմից ֆինանսավորվող «Փինք Արմենիա» ԼԳԲՏ-ական կազմակերպության ընդգրկմանը մի շարք նախարարություններին կից հասարակական խորհուրդներում։

Նախորդ տարվա սեպտեմբերին ՀՀ կառավարությունն ընդունեց որոշում՝ նախարարներին եւ կառավարությանը ենթակա մարմինների ղեկավարներին կից հասարակական խորհուրդների ձեւավորման եւ աշխատակարգի վերաբերյալ, ըստ որի՝ մինչեւ տարեվերջ նախարարությունները պարտավորվեցին ձեւավորել խորհուրդների նոր կազմեր։ Նախարարությունների հայտարարություններում դիմող կազմակերպությունների եւ անհատ փորձագետների համար սահմանվել էին որոշակի չափանիշներ, ինչպիսիք են՝ մասնագիտական աշխատանքային փորձը, իրականացված ծրագրերը եւ համագործակցության շրջանակը։ 

Արդյունքում՝ «Փինք Արմենիա»-ի ներկայացուցիչներն այլեւս ընդգրկված են հետևյալ նախարարներին կից հասարակական խորհուրդներում՝ Արդարադատության նախարարություն, Ներքին գործերի նախարարություն, Աշխատանքի եւ սոցիալական հարցերի նախարարություն, Առողջապահության նախարարություն: Ըստ նույն կազմակերպության պաշտոնական տեղեկատվության՝ միակ գերատեսչությունը, որը մերժել է իրենց դիմումը, եղել է Կրթության, գիտության, մշակույթի եւ սպորտի նախարարությունը: Ինչ խոսք, հանուն արդարության պետք է նշենք, որ՝ ի պատիվ նախարար Ժաննա Անդրեասյանի: 

«Փինք Արմենիա» կազմակերպության ներկայացուցիչների ներգրավումը միանգամից չորս առանցքային նախարարությունների խորհրդատվական մարմիններում, ինքնին կարող էր «ժողովրդավարության բաստիոն» հռչակված «Նիկոլստանում» դիտվել որպես քաղաքացիական հասարակության ներգրավման օրինակ, եթե այն չտեղավորվեր ավելի լայն՝ տարիներով ձեւավորված ազդեցության շղթայի մեջ։ Այս պարագայում, սակայն, ակնհայտ է դառնում, որ գործ ունենք ոչ թե պարզապես ՀԿ-ների մասնակցության, այլ կոնկրետ ուղղվածություն ունեցող կառույցների համակարգային ներթափանցման հետ պետական որոշումների կայացման միջավայր։

Խնդիրը միայն այն չէ, որ նշված կազմակերպությունը ֆինանսավորվում է արեւմտյան աղբյուրներից՝ ներառյալ ամերիկյան եւ շվեդական միջազգային զարգացման գործակալություններ USAID-ը եւ Sida-ն։ Ավելի կարեւոր հարց է՝ ինչ ազդեցություն կարող է ունենալ նման ֆինանսավորման եւ գաղափարական հենքի առկայությունը Հայաստանի ներքին քաղաքական օրակարգի վրա։ Քաղաքագիտական շրջանակներում սա հաճախ բնորոշվում է որպես «քաղաքականության գրավում», երբ արտաքին դերակատարները ոչ թե ուղղակի ճնշում են գործադրում, այլ ձեւավորում են ազդեցության ներքին մեխանիզմներ։ Արդարադատության, ներքին գործերի, աշխատանքի եւ սոցիալական հարցերի,առողջապահության նախարարությունների կից խորհուրդներում «Փինք Արմենիա»-ի ներգրավումը պատահական համընկնում համարելն արդեն դժվար է։ Սրանք այն ոլորտներն են, որտեղ ձեւավորվում են հասարակության արժեքային, իրավական եւ սոցիալական հիմքերը։ Մինչդեռ, օրինակ, Ռուսաստանի Դաշնությունում ԼԳԲՏ շարժումը ճանաչված է ծայրահեղական եւ արգելված է։

ՀՐԱՆՏ ՍԱՐԱՖՅԱՆ 

Այս թեմայով Սեմյոն Բաբայանը պատասխաններ է պահանջում ԿԳՄՍ նախարարությունից Էլեկտրաէներգիայի անջատման պատճառով այս պահին հնարավոր չէ ընդունել թղթային եղանակով դիմումները Ինչու ՊՆ-ն չաջակցեց «Մոնթե»-ին․ նախարարությունից պարզաբանում են Վաճառվում է Հայաստանը «Իրավունքի» հաղթանակը ընդդեմ ԼԳԲՏ ներկայացուցչի. Շնորհակալություն հրաշագործ փաստաբան Լեվոն Բաղդասարյանին