Քաղաքապետարանը մերժել է Ապրիլյան պատերազմի 10 ամյակին նվիրված համերգ-հերոսապատման իրականացման համար անհատույց կերպով դահլիճ տրամադրել

Աշուղ Արմանին իր սոց էջում գրառում է կատարել այն մասին, որ Երեւանի քաղաքապետարանը մերժել է ապրիլյան պատերազմի 10 ամյակին նվիրված համերգ-հերոսապատման իրականացման համար անհատույց կերպով դահլիճ տրամադրելու իր դիմումը։ Թե ինչու է քաղաքապետարանը մերժել երգչի դիմումը, «Իրավունք»-ը պարզեց ԱՇՈՒՂ ԱՐՄԱՆԻՑ:

—Հարգելի Աշուղ Արմանի, Դուք հայտարարություն հրապարակեցիք Ձեր Ֆեյսբուքյան էջում, որտեղ ասված է, որ Երեւանի քաղաքապետարանը մերժել է Ապրիլյան պատերազմի 10 ամյակին նվիրված համերգ-հերոսապատման իրականացման համար անհատույց կերպով դահլիճ տրամադրելու Ձեր դիմումը։ Կխնդրեմ մանրամասնել, ի՞նչ պատճառաբանությամբ է մերժել:

—Նախ նշեմ, որ հաճախակի ենք կազմակերպել նմանատիպ միջոցառումներ, բայց քանի որ հիմա դահլիճների գներն ահռելի թանկ են, ստիպված դիմել ենք քաղաքապետարան։ Շահույթ որեւէ չենք հետապնդել: Դիմումում նշվել է, որ համերգը լինելու է բացառապես հրավիրատոմսերով եւ մասնակից են լինելու հիմնականում Ապրիլյան պատերազմի հերոսների ընտանիքների անդամները։ Գրությունում նշել էի, որ սա նաեւ հերոսածին ընտանիքների ցանկությունն է, քանի որ նրանցից շատերը սրտատրոփ սպասում էին վերոնշյալ միջոցառմանը։ Ինձ պատասխանել են, որ Երեւանի Պատանի հանդիսատեսի թատրոնն իմ նշած օրերին զբաղված է, այլ դահլիճներ կամ օրեր չեն առաջարկել։

ՈՐԵՎԷ ԿՈՒՍԱԿՑՈՒԹՅԱՆ ԱՆԴԱՄ ԵՐԲԵՎԷ ՉԵՄ ԵՂԵԼ ՈՒ ՉԵՄ ԷԼ ՊԱՏՐԱՍՏՎՈՒՄ ԼԻՆԵԼ

—Ո՞ւմ եք դիմել անհատույց դահլիճ տրամադրելու խնդրանքով:

—Նամակով դիմել էի Երեւանի քաղաքապետ պարոն Տիգրան Ավինյանին։ Նախապես նշեմ, որ որեւէ կուսակցության անդամ երբեւէ չեմ եղել ու չեմ էլ պատրաստվում լինել, որպեսզի իմ բողոքին քաղաքական երանգ չտրվի, ուղղակի չէի կարող լռել։

—Համերգային ծրագիրն ի՞նչ էր իր մեջ ենթադրում եւ ովքե՞ր էին լինելու մասնակիցները:

— Համերգային ծրագրի ընթացքում պիտի հակիրճ ներկայացվեր պատերազմի պատմությունը եւ հերոսներին: Հիմնականում պետք է հնչեին հայրենասիրական, ժողովրդական եւ ազգագրական երգեր՝ Ապրիլյան պատերազմի հերոսներին նվիրված երգեր, ներկայացվեին ազգային պարեր։ Նախատեսվում էր նաեւ հետմահու պարգեւատրումներ։ Քանի որ դեռ միջոցառման օրը հստակեցված չէր, երգիչների ցանկն առայժմ ամբողջական չէ։

—Որդեկորույս ծնողները հրավիրվա՞ծ էին լինելու համերգին:

—Որդեկորույս մայրերն ու հերոսների ընտանիքները միանշանակ հրավիրվելու էին, շատերն արդեն տեղեկացված էին եւ սրտատրոփ սպասում էին միջոցառմանը։

—Ի՞նչ եք պատրաստվում անել: Ամեն դեպքում համերգը կկայանա՞:

— Փորձում եմ ամեն կերպ իրականացնել համերգ-հերոսապատումը, քանի որ որքանով տեղեկացված եմ, պետական մասշտաբով ոչինչ նախատեսված չէ։ Հուսանք, որ դեռ ամեն ինչ կորած չէ։ Իմ գրառումից հետո շատ մարդիկ տարբեր առաջարկներ են անում, հուսամ որեւէ բան կստացվի։

Նանա Սարգսյան

Այս թեմայով Կինոպրեմիերա, նոր միջազգային ֆիլմ և սցենարագրության վարպետության դաս․ Նորա Արմանին Հայաստանում է «Ժողովուրդը սա՛ է ուզում իրականում՝ ոչ թե՝ «Արա՜, վայ-վա՜յ․․․» «Գժանոցից եկել, թագի է արժանացել ու մեր  տունն  է քանդում». ԱՇՈՒՂ ԱԼՄԱՍՏ Ամեն մարդ իրավունք չունի գրիչը ձեռքը վերցնել եվ մեր պատմությունը խեղաթյուրել. ԱՇՈՒՂ ԱԼՄԱՍՏ Հայրենիքի մասին աթոռին նստած չեն խոսում, այլ լինում են սահմանին. ԱՇՈՒՂ ԱԼՄԱՍՏ