Որոշեցի ռիսկի գնալ և ընդունել այս մենամարտը. չեմպիոնի մեծ վերադարձը MMA ռինգ

Մարտի 28-ին «Տաշիր արենայում» կայանալիք Hype Fighting մրցաշարը սպորտային աշխարհի ուշադրության կենտրոնում է։ Օրվա գլխավոր իրադարձություններից մեկը կարատեի աշխարհի և Եվրոպայի չեմպիոն, WKN վարկածի հաղթող և MMA-ում անպարտելի ռեկորդակիր (7-0) Հայաստանի կարատեի միության հիմնադիր Կամո Ունանյանի վերադարձն է։

Սակայն այս մենամարտը սովորական մարզական հանդիպում չէ։ Սա Կամոյի առաջին ելույթն է 2025 թվականի օգոստոսին ենթարկված ողնաշարի ծանր վիրահատությունից հետո, որը լուրջ վտանգի տակ էր դրել նրա մարզական հետագա կարիերան։

Չնայած լիարժեք վերականգնման փուլի դժվարություններին՝ մարզիկը որոշել է չսպասել և ուժերը փորձել հենց այս մրցաշարում։

«Hype Fighting -ը առաջարկում էր մասնակցել, սակայն ես մտավախություն ունեի՝ արդյո՞ք ֆիզիկապես պատրաստ կլինեմ, թե՞ ոչ»,- անկեղծանում է Կամո Ունանյանը և հավելում․«Ողնաշարի վնասվածքից ու վիրահատությունից հետո և՛ դժվար է, և՛ շատ վտանգավոր նման բարձր մակարդակի մրցաշարում մենամարտելը, քանի որ դեռ լիարժեք չէի վերականգնվել ու չէի սկսել մարզումներս։ Բայց քանի որ արդեն 1 տարի 8 ամիս MMA սպորտաձևում մենամարտ չէի ունեցել, որոշեցի ռիսկի գնալ և ընդունել այդ մենամարտը»։

Կամոյի մրցակիցն իրանցի մարզիկ Ամիր Բահրամնեդջանն է, ով բավականին հաջող փորձ ունի թե՛ բոքսում, թե՛ MMA-ում (4 հաղթանակ, 2 պարտություն)։ Սակայն հայ չեմպիոնի համար մրցակցի անունն ու փորձը երկրորդական են. նրա համար առաջնայինը սեփական կամքի դրսևորումն է․«Անկեղծ ասած՝ ինձ համար տարբերություն չկա, թե ով է մրցակիցս։ Ես, ինչպես բոլոր մարտերում, տրամադրվում եմ մարտական։ Ով էլ լինի՝ նպատակը մեկն է՝ հաղթանակ»։

Ողնաշարի ծանր վիրահատությունից հետո Կամոն ոչ միայն չի ընկրկել, այլ նաև հաստատակամ է՝ այս տարի մասնակցելու է թե՛ կարատեի և թե՛ MMA-ի հեղինակավոր մրցաշարերին՝ ապացուցելով, որ կամքի ուժը սահմաններ չունի։

Թե ինչպիսի ընթացք կունենա չեմպիոնի վերադարձը, ցույց կտա մարտի 28-ը, սակայն նրա որոշումը՝ վերադառնալ ռինգ նման ծանր փորձությունից հետո, արդեն իսկ հաղթանակ է։

Այս թեմայով 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Մեծ Բրիտանիան ներկա տեսքով կարո՞ղ է աշխարհի քարտեզներից վերանալ Լիտվան կանհետանա աշխարհի քարտեզից. Մեդվեդև Նվազագույնը 100 հազար դրամ․Ինչ գին ունի սեպտեմբերի 1-ը «Եհովայի վկաներ» կազմակերպության հայաստանյան գրասենյակը բացահայտում է մարզահամերգայինում տեղի ունեցած համաժողովների նպատակը