Հավանական չենք համարում մեր մասնակցությունը հունիսի 7-ին նախատեսված ընտրություններին. ՀԱՊ

«Փետրվարի 7-ին ՀՀ նախագահ Վահագն Խաչատուրյանի կողմից ստորագրվեց 2026 թ. հունիսի 7-ին համապետական ընտրությունների մասին հրամանագիրը։

ՀՀ նախագահին հիշեցնում ենք, որ ՀԱՊ կուսակցության ղեկավար Արթուր Վարդանյանը 2024 թ. հունիս ամսից գտնվում է անազատության մեջ, ընդորում՝ ապօրինի, անհիմն և շինծու մեղադրանքով և կորզված ցուցմունքների հիման վրա։ Սա ամբողջությամբ ժողովրդական սկզբունքների կոպտագույն խախտում է։

Արդար, ազատ, թափանցիկ և ժողովրդավարության կանոններին ու սկզբունքներին համահունչ ընտրություններ ունենալու համար յուրաքանչյուր ժողովրդավար երկրում պետք է բացառել քաղաքական ճնշումները և քաղբանտարկյալների առկայությունը։ Հաշվի առնելով, որ ամբողջ դատական համակարգը զերծ չէ քաղաքական իշխանության ճնշումներից, հստակ երևում է, որ Արթուր Վարդանյանին անազատության մեջ պահելը քաղաքական որոշման արդյունք է։

 

Սիրելի հայրենակիցներ,

 

Ի պատասխան «Համահայկական Ազգային Պետականություն» կուսակցությանն ուղղված ձեր հարյուրավոր հարցումների և նամակների՝ կապված 2026թ. հունիսի 7-ին կայանալիք համապետական ընտրություններին մեր քաղաքական ուժի մասնակցությանը, տեղեկացնում ենք հետևյալը.

 

Հաշվի առնելով այն հանգամանքը, որ մեր կուսակցության նախագահ Արթուր Վալերիկի Վարդանյանը 2024 թվականից մինչ օրս գտնվում է անազատության մեջ, հավանական չենք համարում մեր քաղաքական ուժի մասնակցությունը հունիսի 7-ին նախատեսված ընտրություններին։

 

Հարկ ենք համարում հիշեցնել, որ ՀԱՊ կուսակցության նախագահ Արթուր Վարդանյանը Հայաստանի Հանրապետությունում գրանցված կուսակցություններից միակ գործող և գրանցված քաղաքական ուժի ղեկավարն է, ով գտնվում է բանտում համապետական ընտրությունների նախաշեմին` ում քաղաքական որոշման արդյունքում մեղադրանք է ներկայացվել 2015թ․ նախկին ռեժիմի դեմ պայքարելու և հեղափոխություն կազմակերպելու մտադրության համար և ով 2024 թվականից մինչ առ այսօր գտնվում է անազատության մեջ։

 

Հատկանշական է, որ «ժողովրդավար Հայաստանի Հանրապետությունում» քաղաքական ուժի ղեկավարին իր քաղաքական գործունեության համար ազատազրկում են` սահմանափակելով ամբողջ ՀԱՊ կուսակցության գործունեությունը, դրանով իսկ ի ցույց դնելով առ այն, որ Հայաստանի Հանրապետությունը դեռևս հեռու է ժողովրդավար, ազատ, թափանցիկ և քաղաքական ճնշումներից զերծ համապետական ընտրություններ իրականացնելուց։

 

Ուստի՝ հաշվի առնելով, մեր կուսակցության և մեր կուսակցության առաջնորդի նկատմամբ քաղաքական ճնշումները, անարդարությունները և սահամանափակումները, հասկանում և գիտակցում ենք, որ քաղաքական դաշտը և գործունեությունը Հայաստանում վերածվել է մենաշնորհի՝ քչերի համար»։