Ապրիլի 1-ից ում թոշակը ինչքանով կբարձրանա

Կառավարության՝ մարտի 5-ի նիստին ԱՍՀ նախարար Արսեն Թորոսյանը ներկայացրեց գործադիրի երկու որոշումներում փոփոխություններ կատարելու նախագծերը, որոնց արդյունքում ապրիլի 1-ից կենսաթոշակառուների ճնշող մեծամասնության համար կենսաթոշակը բարձրանալու է:

«623,353 հոգու համար կենսաթոշակը բարձրանալու է 10 հազար դրամ և ավելի, մնացած 39,594 հոգու համար կենսաթոշակը բարձրանալու է շուրջ 8500 դրամով: Դրանք հիմնականում երկարամյա զինվորական կենսաթոշակ ստացող մեր քաղաքացիներն են, որոնց կենսաթոշակն արդեն իսկ միջինում կազմում է 95 հազար դրամ»,- ասաց նա:

Նախարարը տեղեկացրեց, որ նախատեսված է նաև հաշմանդամություն ունեցող անձանց նպաստի բարձրացում ուղիղ 10 հազար դրամով: Առաջին, երկրորդ, երրորդ խմբերի և ֆունկցիոնալության խորը, ծանր ու միջին սահմանափակում ունեցող քաղաքացիների նպաստներն այսօր 39 հազար, 37,5 հազար և 36 հազար դրամ է, դրանք կդառնան 49 հազար, 47,5 հազար և 46 հազար դրամ:

Վարչապետ Նիկոլ Փաշինյանն այս համատեքստում շնորհակալություն հայտնեց ՀՀ-ում աշխատող, հարկ վճարող քաղաքացիներին, և ոչ միայն ՀՀ քաղաքացիներին, այլև օտարերկրացիներին, որոնք աշխատում են ՀՀ-ում և հարկեր են վճարում: Փաշինյանը նաև շնորհակալություն հայտնեց պետական կառավարման համակարգի գործընկերներին, որոնք, ըստ վարչապետի, իրենց աշխատանքով հնարավոր են դարձրել այն, որ ի հեճուկս բոլոր կանխատեսումների՝ 2025 թվականի տնտեսական աճը լինի ոչ թե 5,1 տոկոս, այլ ավելի բարձր:

«Սա չափազանց կարևոր որոշում է ՀՀ քաղաքացիների համար մեր սոցիալական քաղաքականության արդյունքները կապիտալիզացնելու [առումով]:

Այսպիսով՝ մենք 2021-ին մեր ստանձնած պարտավորությունն այս համակարգերով կատարում ենք, այսինքն՝ նվազագույն կենսաթոշակն ավելի է պարենային զամբյուղից, և միջին կենսաթոշակն ավելի է սպառողական զամբյուղի արժեքից»,- ասաց նա՝ միաժամանակ ընդգծելով, որ այս գործընթացի մի մաս է նաև հետվճարը:

Այս թեմայով Ինչպես և ինչու է կենսաթոշակները բարձրացնելու որոշում կայացվել. Փաշինյանի պարզաբանումը Ո'չ, ռիսկեր չկան թոշակների բարձրացման հետ կապված, թողե'ք. ֆինանսների նախարար Ի ՞ նչ է երեխաների կրթավճարների կուտակային ներդրումային համակարգը Ապրիլի 1-ից կենսաթոշակներն ու նպաստները՝ բացառապես անկանխիկ եղանակով. Թորոսյանը մանրամասներ է հայտնել 208 մլն դոլարի հավելյալ բեռ պետյուջեի վրա. Ֆիննախը թոշակների բարձրացումը ռիսկային է համարում․ «Հետք»