ՄԻՋԱԶԳԱՅԻՆ ՈՒՇՈՒԻ ՖԵԴԵՐԱՑԻԱՆ ՀԱՅ ՄԱՐԶԻԿԻՆ ՃԱՆԱՉԵԼ Է ԼԱՎԱԳՈՒՅՆ ՈՒՇՈՒԻՍՏ

 Հայաստանի Ավանդական Ուշու - սանդայի մեծահասակների հավաքականի անդամ, առաջատար մարզիկ, Եվրոպայի մեծահասակների չեմպիոն, Աշխարհի մեծահասակների բրոնզե մեդալակիր ԱՐՍԵՆ ԲԱՂՐՅԱՆՆ վերջերս ճանաչվել է 2025 թվականի լավագույն ուշուիստ Միջազգային ուշուի ֆեդերացիայի վարկածով։ Միջազգային ուշուի ֆեդերացիան /IWUF /նրան ճանաչել է 2025-ի լավագույն ուշուիստ սանդայի գծով ընդգծելով թե նրա մարզական նվաճումները, թե անձնական որակները։ IWUF -ի հայտարարության մեջ նշվում է, որ Արսեն Բաղրյանը համարվում է Հայաստանի ամենաուժեղ մարզիկներից մեկը աչքի ընկնելով բացառիկ ֆիզիկական տվյալներով, բարձր կարգապահությամբ և օրինակելի մարդկային հատկանիշներով։ Արսենն ուշու - սանդայով սկսել է զբաղվել վաղ տարիքից և իր մարզական կարիերայի ընթացքում բազմիցս դարձել է Հայաստանի չեմպիոն, ինչպես նաև հաղթել է ազգային, Եվրոպական և միջազգային մրցաշարերում։ 2025-ին նա նվաճել է Եվրոպայի չեմպիոնի տիտղոսը, ինչը ևս մեկ անգամ հաստատել է նրա կայունությունն ու բարձր դասը։ IWUF-ի կողմից տրված այս ճանաչումը դարձավ փայլուն մրցաշրջանի տրամաբանական եզրակացությունը և ամրապնդեց հայ մարզիկի դիրքը որպես համաշխարհային ուշուի առաջատարներից մեկը։

Iravunk. com -ի մարզական լրագրողը կապ է հաստատել ու զրուցել ԱՐՍԵՆ ԲԱՂՐՅԱՆԻ հետ։

- Շնորհավորում ենք, Արսեն, լավագույն մարզիկ ճանաչվելու և ՀՀ սպորտի վարպետի կոչման արժանանալու առթիվ։

- Շատ շնորհակալ եմ։ Անկեղծ ասած, այս տիտղոսը շատ ոգևորիչ ու պարտավորեցնող է ինձ համար։ Մեր երկրից միակ մարզիկը ես էի, որ ընդգրկված էի այդ ցանկում. Աշխարհի 9 լավագույն մարզիկներից 1-ը ես եմ, դա որոշվել է քվեարկության միջոցով։ Շատ ուրախ եմ, կաշխատեմ շարունակել իմ նվաճումները։ Անցած տարին ինձ համար բավականին հաջող էր, դարձա մեծահասակների Եվրոպայի չեմպիոն և Աշխարհի բրոնզե մեդալակիր։ Աշխարհի առաջնությունից միայն ինձ հաջողվեց մեդալ բերել Հայաստան։ Ես 60 կգ քաշային կարգում եմ հանդես գալիս։ Հայաստանի Ավանդական ուշու - սանդայի ֆեդերացիայի նախագահը Ռուստամ Ալավերդյանն է։

- Հիշարժան հաղթանակներ ունեցել ես։

- Երիտասարդների առաջնություններում հաղթել եմ թուրք և ադրբեջանցի մրցակիցների։

- Արսեն, տեղյակ եմ, որ ծնունդով Արցախից ես։

- Այո, հենց մայրաքաղաք Ստեփանակերտում էինք բնակվում։ Ցավոք, 2023-ին, երբ ամբողջությամբ հայաթափվեց Արցախը, մենք էլ հազարավոր արցախցիների հետ հարկադրաբար բռնեցինք գաղթի ճամփան ու այժմ Երևանում վարձով ենք ապրում։ Ինչ էլ լինի, երբեք չենք կարող համակերպվել Արցախի ծանր կորստի հետ։

- Իսկ այս տարվա ծրագրերի մասին ինչ կասես։

- Մայիս ամսին Չինաստանում կկայանա Աշխարհի գավաթի խաղարկությունը, ապա Եվրոպայի առաջնությունը Ֆրանսիայում։ Մեզ պետությունը, մեր ֆեդերացիան աջակցում են, որ գնանք, մասնակցենք։ Բայց ավելի լավ կլիներ, որ մեզ պետությունը, կամ Սպորտի նախարարությունը ամսական թոշակ, գումար տրամադրեին, որպեսզի սպորտը չթողնենք ու երկրորդ աշխատանքի մասին մտածենք։

- Ավանդական ուշու - սանդան մեր երկրում զարգացած մարզաձև կարող ես համարել։ - Իհարկե, բավականին զարգացած է Հայաստանում։ - Շնորհակալություն, Արսեն, մեզ ժամանակ տրամադրելու համար։

- Զգացված եմ ուշադրության համար։ Անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո Բռնցքմարտի ԵԱ-ում այսօր Հայաստանն ունի 5 բռնցքամարտիկ ԲՌՆՑՔԱՄԱՐՏԻ ԵԱ. ՀԱՅԱՍՏԱՆՆ ՈՒՆԻ 4 ՆԵՐԿԱՅԱՑՈՒՑԻՉ ՀԱՅ ԲՌՆՑՔԱՄԱՐՏԻԿՆԵՐԸ ՄԵԿՆԵՑԻՆ ԲՈՒԼՂԱՐԻԱ ՄԱՍՆԱԿՑԵԼՈՒ ԵՎՐՈՊԱՅԻ ԱՌԱՋՆՈՒԹՅԱՆԸ։ Ես գիտեմ՝ ինչպես հաղթել Արման Ծառուկյանին. Մաուրիսիո Ռուֆի