ԵՐԿԱՐԱՏԵՎ ԴԱԴԱՐԻՑ ՀԵՏՈ ՄԻՀՐԱՆ ՀԱՐՈՒԹՅՈՒՆՅԱՆՆ ԻՐ ԱՌԱՋԻՆ ՀԱՂԹԱՆԱԿԸ ՏՈՆԵՑ

Վերջերս ԱՄՆ Լոս Անջելես քաղաքում կայացած Խառը մենամարտերի Upnext Fighting 30 մրցաշարում, Ռիոյի Ամառային Օլիմպիական խաղերի փոխչեմպիոն, Եվրոպական խաղերի փոխչեմպիոն, հունահռոմեական ոճի ըմբշամարտի Հայաստանի հավաքականի նախկին անդամ, այժմ Մոսկվայում բնակվող ՄԻՀՐԱՆ ՀԱՐՈՒԹՅՈՒՆՅԱՆԸ երկարատև դադարից հետո իր առաջին հաղթանակը տոնեց։ 66,5 կգ քաշային կարգում Հարությունյանը մենամարտեց ամերիկացի Շեյն Տորեսի հետ ու հաղթեց վաղաժամ մրցավարների միաձայն որոշմամբ։

Մենամարտը կանգնեցվեց չորրորդ ռաունդում։ Հաղթանակից հետո ՄԻՀՐԱՆԸ այսպես է մեկնաբանել. «Շատ բարդ մենամարտ էր։ Հակառակորդս բավականին ուժեղ էր։ Ինձ այս հաղթանակը բարդ տրվեց, քանի որ ես երկար ժամանակ չէի մենամարտել, չէի մարզվում, ոչինչ չէի անում, մարզում էի երեխաներին, որոշեցի վերադառնալ և նորից պայքարել։ Այս հաղթանակի համար շնորհակալ եմ իմ թիմին, մարզիչներին, իմ մենեջերին մենամարտի հնարավորություն տալու համար»։

Նշենք, որ Օլիմպիական փոխչեմպիոնը օկտագոնում հաղթանակը նշեց իր 1-ամյա որդու հետ միասին։ Հարությունյանը օկտագոնից բացակայում էր շուրջ 2 տարի։ Նախորդ մենամարտը տեղի էր ունեցել 2023-ի օգոստոսի 22-ին կրկին Լոս Անջելեսում, որտեղ Միհրանը վաղաժամ, հենց մենամարտի առաջին ռաունդում հաղթել էր ԱՄՆ ներկայացնող «Տարզան» մականվամբ 40-ամյա Դավիդ Դուգլասին։ 37-ամյա Միհրան Հարությունյանը MMA -ում անցկացրել է 8 մենամարտ, տարել 7 հաղթանակ և կրել 1 պարտություն։ 2015-ին 4 մարզիկների ու մարզչական անձնակազմով Հայաստանի հունահռոմեական ոճի ըմբշամարտի հավաքականը ելույթ է ունեցել Բաքվում Եվրոպական առաջին խաղերում, որտեղ Միհրանը զբաղեցրել է երկրորդ տեղը չեմպիոնի տիտղոսի նվաճման համար պայքարում զիջելով ռուս ըմբիշին։ Բաքվի մրցաշարից վերադարձած մեր հավաքականի պատվիրակությանը դիմավորեցին հերոսների պես։ Միհրանը Ռիո դե Ժանեյրոյում 2016-ին կայացած ՕԽ-ի ժամանակ նվաճել է արծաթե մեդալ։ 2018-ից սկսել է զբաղվել խառը մենամարտերով։ Նույն 2018 թվականի մայիսին ՌԴ Ռոստով քաղաքում կայացած FIGHT Night Global մրցաշարում հաղթել է Ալի Յուսուֆին, իսկ նույն թվականի դեկտեմբերին կայացած «Վոլգայի» մրցաշարում պարտության է մատնել Եվգենի Պերեպելինինին։ Միհրանը մենամարտերի ժամանակ հանդես է գալիս «Մաեստրո» մականվամբ։ Հատկանշական է, որ Միհրանը կամավորագրվել և մասնակցել է 2020 թվականի Արցախյան 44-օրյա ահաբեկչական պատերազմին, մասնավորապես Շուշիի և հարակից տարածքների համար մղվող թեժ մարտերին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով 12.92 միլիարդ դրամ՝ սպորտին․ 2027-ին ինչպե՞ս է ծախսվելու պետական փողը Հայաստանի հավաքականը ծանր կորուստ ունի Ազգերի լիգայի վճռորոշ խաղերից առաջ Ըմբշամարտի ԱԱ. Նարեկ Հարությունյանն ու Հրայր Ալիխանյանը պարտվեցին մեկնարկում ԱԱ. Արսեն Հարությունյանը մեկնարկեց վստահ հաղթանակով՝ 10:0 Հայ բռնցքամարտիկները Թուրքիայից կվերադառնան երկու մեդալով