«Արցախ» ստեղծագործությունը միշտ էլ խերով է եղել. Արա Գեւորգյան

«ՀՊԱՐՏՈՒԹՅՈՒՆՍ, ԷԼ ԱՎԵԼԻ Է ԲԱԶՄԱՊԱՏԿԵԼ` «ԱՐՑԱԽՍ» ՉՈՐՐՈՐԴ ԱՆԳԱՄ Է ՀՆՉՈՒՄ ՕԼԻՄՊԻԱԿԱՆ ԽԱՂԵՐՈՒՄ»

Ադրբեջանի Ազգային օլիմպիական կոմիտեն կրկին հիստերիայի մեջ է եւ իր բողոքն է հայտնել 25-րդ ձմեռային օլիմպիական խաղերում Հայաստանը ներկայացնող գեղասահորդներ Նիկիտա Ռախմանինի եւ Կարինա Ակոպովայի կողմից իրենց մրցութային ծրագրում կոմպոզիտոր Արա Գեւորգյանի «Արցախ» երաժշտական ​​ստեղծագործության օգտագործման կապակցությամբ։ 

Հիստերիան դեռ բավական չէ, մի հատ էլ Ադրբեջանի օլիմպիական կոմիտեն բողոք է ներկայացրել հայ մարզիկների դեմ Միջազգային օլիմպիական կոմիտեին՝ պատճառաբանելով, թե «Արցախ» անվանումն արտացոլում է, իբր, Ադրբեջանի Հանրապետության միջազգայնորեն ճանաչված տարածքների նկատմամբ Հայաստանի կողմից իրականացվող անօրինական եւ անջատողական քաղաքականության գաղափարախոսական էությունը, որն այն վարել է տարիներ շարունակ։

Նկատենք, որ ՀՀ վաստակավոր արտիստ Արա Գեւորգյանի «Արցախ» ստեղծագործությունը մշտապես ջղաձգումների մեջ է գցել թշնամի պետությանը եւ անգամ ՌԴ-ում Ադրբեջանի դեսպան Բյուլբյուլօղլին դեռ 2007 թվականին է ներողություն խնդրել հեղինակից՝ այն ժամանակվա մշակույթի նախարարի միջոցով երգի հեղինակային իրավունքների մասով դատական գործը պարտվելուց հետո:

Վերադառնալով 25-րդ օլիմպիական ձմեռային խաղերին՝ պետք է նշել, որ կոմպոզիտոր Արա Գեւորգյանը պաշտոնապես թույլատրել է, որպեսզի օլիմպիական խաղերում Հայաստանը ներկայացնող գեղասահորդներ Նիկիտա Ռախմանինն ու Կարինա Ակոպովան ելույթ ունենան «Արցախ» ստեղծագործության ներքո։ «Իրավունք»-ն այս մասին զրուցել է նրա հետ:

— Պարոն Գեւորգյան, կրկին Ադրբեջանը ընկել է հիստերիայի մեջ՝ լսելով «Արցախ» բառն ու համանուն ստեղծագործությունը: Ինչպե՞ս կմեկնաբանեք:

— Չգիտեմ՝ ինչպես մեկնաբանեմ դա, սակայն այս անգամ գոնե կարող եմ հպարտությունս էլ ավելի բազմապատկել, քանի որ «Արցախ» ստեղծագործությունս չորրորդ անգամն է հնչում Օլիմպիական խաղերում: Մինչ սա, նման բողոքներ չեն եղել: Այս անգամ բողոքում են, սակայն, էլ չեն ասում, դա իրենց երաժշտությունն է: Գոնե այս մասով, Փառք Աստծո համոզվեցին, որ այդ երաժշտությունը պատկանում է ինձ, հեղինակային իրավունքները պահպանված են Ամերիկայի Միացյալ Նահանգների կոնգրեսի գրադարանում եւ քանի որ այդքան իմ պայքարելուց հետո կարողացա համոզել եւ ապացուցել, որ դա իմ սեփական երաժշտությունն է, գոնե այդ հարցում լավ է՝ չեն ասում, որ իրենցից ենք գողացել:

Այսօր ասում են, թե՝ այդ «անջատողականների» երաժշտությունը լավ կլինի չօգտագործեն: Սակայն, կարծում եմ, իրենց ասածին Օլիմպիական կոմիտեն ոչ մի ընթացք չի տա, որովհետեւ մեր գեղասահորդները՝ Նիկիտա Ռախմանինը եւ Կարինա Ակոպովան, ինձանից վերցրել են թույլատվություն, եւ ես սիրով տվել եմ այն՝ գրավոր կերպով, որն էլ ներկայացրել եմ Օլիմպիական կոմիտեին, եւ գեղասահորդներն արդեն մարզումներն անցկացնում են այդ ստեղծագործության ներքո:

Եթե, օրինակ, ՄՕԿ-ն արգելք հանդիսանար այդ բողոքից հետո, ապա թույլ չէր տա, որ մարզիկները մարզվեին այդ ստեղծագործության տակ: Տա Աստված, որ մեր գեղասահորդները մասնակցեն եւ պատվով դուրս գան: «Արցախ» ստեղծագործությունը միշտ էլ խերով է եղել: Պետք չի երաժշտությունը կապել որեւէ քաղաքականության հետ:

ՆԱՆԱ ՍԱՐԳՍՅԱՆ

Այս թեմայով Եթե շարունակենք կոպիտ սխալների շարքը, կհայտնվենք ծայրահեղ ծանր վիճակում. Արա Մարջանյան Վարչական դատարանը բավարարել է Հայաստանյայց առաքելական սուրբ եկեղեցու հայցը Հովհաննավանքի գործով Առողջ բանականությունը հուշում է, որ այս ընտրություններում մի բան այն չէր. Պողոսյան Հայաստանի համար Ռուսաստանի հետ հարաբերությունները փչացնելը հանցագործություն կլինի. Արա Աբրահամյան Պետք չէ վախենալ մեր պատմությունից. կայացավ Ռայմոնդ Հարություն Գեւորգյանի հիմնարար աշխատության շնորհանդեսը