Խնդրանքս ու հորդորս Ավինյանին՝ ՔՊ նախընտրական շտաբի պետն ինքը լինի. Գեւորգ Ստեփանյան

Տրանսպորտի թանկացումից անցավ ուղիղ մեկ տարի: Այս մասին «Իրավունք»-ը զրուցել է Երեւանի ավագանու «Մայր Հայաստան» խմբակցության անդամ ԳԵՎՈՐԳ ՍՏԵՓԱՆՅԱՆԻ հետ:

— Տրանսպորտի թանկացումը մնաց երեւանցու ուսերին ու մեկ տարի է, ինչ քաղաքացին, կարծես, համակերպված վճարում է 150 դրամ՝ տրանսպորտի համար: Ի՞նչ կասեք այս մասին:

— Դա ապօրինի թանկացում էր: Ասացին, եթե չթանկացնենք, մեր բոլորի երեխաները չեն կարողանալու նոր, վերանորոգված մանկապարտեզներ գնալ: Հիմա ո՛չ նոր մանկապարտեզ ունենք, ո՛չ էլ բարեփոխված տրանսպորտ: Մարդիկ նորից կանգառներում կանգնած ժամերով տրանսպորտին են սպասում, իսկ տրանսպորտի վիճակը՝ թե՛ արտաքին, թե՛ ներքին առումով կարող են բոլորը տեսնել:

Ինչ վերաբերում է համակերպմանը, ես հակառակը կասեմ. ո՛չ, չեն համակերպվել, որովհետեւ մեծ թերհավաքագրումներ է լինում: 2025 թվականի ավարտին մոտ երեքուկես միլիարդ դրամ կառավարությունն իր բյուջեից տվեց Տիգրան Ավինյանի քաղաքապետարանի բյուջեին, որ կարողանան ծախսերը փակել: Դա հենց այդ նույն թերհավաքագրման արդյունքն է: Մարդիկ չեն մուծում եւ շատ ճիշտ են անում, քանի որ նրանք ասում էին թանկացնում ենք 150 դրամ, փոխարենը դուք սմարթ եւ տաքացվող կանգառներ կունենաք: Բայց բերել, Կենտրոն վարչական շրջանում մի երկու բաց կանգառներում էկրաններ են տեղադրել, իբր քաղաքացին նայի, տեսնի, թե երբ է գալու տրանսպորտը, մինչդեռ էկրանին գրվում է 20 րոպե, բայց տրանսպորտը գալիս է 40 րոպեից:

Տիգրան Ավինյանն, իր ողջ փոքր խմբակով, ամբողջությամբ տապալել է կառավարումը՝ հասարակ տրանսպորտային բարեփոխումներից մինչեւ ձնամաքրման աշխատանքներ: Այս ձնամաքրման չկատարած աշխատանքներից հետո, ուղիղ 15 օր անց կտեսնենք, որ Երեւանում չի մնալու նորմալ ասֆալտ՝ ամբողջությամբ փոսեր են գոյանալու, քանի որ ի սկզբանե արել էին անորակ ասֆալտապատում: Լավ գիտենք, որ ասֆալտի մեջ իրենց սիրած փողն է: Նրանք 3-4 ամիսը մեկ նույն արած ասֆալտը քանդում են նորից կառուցում: Մարդիկ եկել են փող աշխատելու համար, ուրիշ ոչինչ չեն անում:

— Բայց համաձայնեք, որ քաղաքացին բոյկոտեց, ունեցավ 10 հազար դրամի տուգանք եւ չվճարելու դեպքում խնդիրներ՝ հարկային դաշտում, իսկ ընդդիմությունը չկանգնեց նրա կողքին: Ինչո՞ւ:

— Վստահեցնում եմ, որ «Մայր Հայաստան» խմբակցությունը մոտավոր 20-30 քաղաքացու իրավական աջակցություն է ցուցաբերել, եւ վերջիններս շատ գոհ են մնացել: Չվճարող քաղաքացիների թիվը շատ է, հակառակ դեպքում ինչո՞ւ ամեն երկուշաբթի գործակարգավորական նիստի ընթացքում, տրանսպորտի ՓԲԸ տնօրենն իր զեկույցներում, պատշաճ կերպով թվերը չի ներկայացնում: Նրանք լավ գիտեն, որ թերհավաքագրում է, սակայն շարունակում են խաբել՝ մինչեւ հասկանան ինչ է լինելու: Մարդկանց այն տոկոսը, որը չի վճարում, այդպես էլ չի վճարելու: Իսկ մեր հասարակությունը համախմբված չեղավ, ինչի հետեւանքով թանկացավ տրանսպորտը, գույքահարկը, աղբահանությունն անձից դարձավ քառակուսիով: Դրա համար էլ այս իշխանությունը մտածում է՝ ինչ էլ անենք, ձայն չեն հանելու, ընդամենը մի քանի օր կհայհոյեն, կանցնի կգնա: Կարծում եմ՝ այս ամենի պատասխանը երեւանցին ՔՊ-ին եւ Տիգրան Ավինյանին տալու է հունիսի 7-ին՝ համապետական ընտրություններին մեծ մասնակցություն ցուցաբերելով եւ մերժելով նրանց: Իսկ Տիգրան Ավինյանը չի տիրապետում իրավիճակին, ուստի՝ անպայման նշեք իմ խնդրանք ու հորդորը Ավինյանին՝ անպայման ՔՊ կուսակցության նախընտրական շտաբի պետը թող ինքը լինի:

ՆԱՆԱ ՍԱՐԳՍՅԱՆ

Այս թեմայով «30 տարի այդտեղ ապրել են, հիմա որոշել են քանդել». 11-հոգանոց ընտանիքը մնացել է դրսում. Ստեփանյան Մեր քաղաքացիներն արդեն էլ ոչ մի բանի չեն հավատում. սա շատ վատ տեղ է տանելու Հայաստանին. Ստեփանյան Սկսեցին խոսել «արա»-ով, «բոմժեր կբոմժացնենք»-ով, «բոքսի տանձիկ կսարքենք»-ով․ Ստեփանյան ՇՏԱՊ. Գեւորգ Սուջյանը դատարան է դիմել «Հրապարակ». Գեւորգ Փարսյանը ընտրություններից հետո մեկուսացել է, գրեթե չի շփվում ոչ մեկի հետ