Չկա կալանք, կա պատանդի կարգավիճակ` Վեհափառ Հայրապետի ընտանիքի անդամների նկատմամբ. Արմինե Սնդոյան

Արմավիրի մարզի ընդհանուր իրավասության դատարանը Ամենայն Հայոց կաթողիկոսի եղբոր՝ Գևորգ Ներսիսյանի կալանքը ևս 2 ամսով երկարաձգել է։

«Չկա կալանք, կա պատանդի կարգավիճակ Վեհափառ Հայրապետի ընտանիքի անդամների նկատմամբ։ Կալանք լինում է, երբ կա օրենքի խախտում, հանցակազմ։ Եթե այս մարդիկ օրենք չեն խախտել, ընդամենը խաղաղ զրուցել են մոտ 2 րոպե, որը բոլորը տեսել են փաստաբանների կողմից տեղադրված տեսանյութով, այդ ի՞նչ նոր հոդված կա ՀՀ օրենսգրքի մեջ, որ խաղաղ զրույցի համար չորս ամսով կալանավորում են 69 տարեկան մարդուն եւ դեռ հայտնի չէ, թե որքան կերկարացնեն իր որդու կալանքը։

 

Ակնհայտ է, որ էս մարդկանց ՊԱՏԱՆԴ ԵՆ պահում՝ միայն մի բանի համար, որ այս մարդիկ Վեհափառ Հայրապետի ընտանիքի անդամներն են։ Սրանով իշխանությունը փորձում է ճնշումներ գործել կաթողիկոսի վրա, իբր (կոտրելու)։Բայց մի բան չեն հաշվարկել, որ Գարեգին Վեհափառի համար եկեղեցու անսասանությունից ավելի կարևոր բան չկա այս աշխարհում։ Իսկ կոտրելու հարցին ինչ վերաբերվում է, մեկ անգամ գրել եմ՝ Գարեգին Վեհափառը անկոտրում Գրիգորի տղան է, ինչպես Գևորգը եւ Գևորգի տղաներն էլ Գրիքոր պապիի թոռներն են, որոնց նույնպես կոտրել հնարավոր չէ։ Նրանք նույնպես Գարեգին Վեհափառի նման բարուրի տարիքից մինչ օրս ներկա են Սուրբ եւ Անմահ պատարագներին։ Նրանց համար եւս իրենց եկեղեցին եւ հավատը իրենց կյանքից առավել է։

 

Այս չափազանց շինծու գործով քննիչները, մեղադրող դատախազը եւ դատավորը, անգամ սուտ ցուցմունք տվող վկաները մի օր անպայման կկանգնեն օրենքի պատասխանատվության առաջ։ Բայց հաշվի առնելով հիմնական պատվերի նպատակը՝ առաջին հերթին դուք բոլորդ կարժանանաք Աստծո դատաստանին, հանկարծ չկասկածեք», - գրել է ԱՐՄԻՆԵ ՍՆԴՈՅԱՆԸ։