Սահմանադրական կարգի տապալման դասական օրինակ. Վանեցյանը՝ Փաշինյանի ու նրան աջակցող եպիսկոպոսների ընդունած ծրագրի մասին

Գարեգին 2-րդին կաթողիկոսական գահից զրկելու գործողությունների ծրագրի ընդունումը Փաշինյանի եւ նրան աջակցող եպիսկոպոսների կողմից ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը սահմանադրական կարգի տապալման դասական օրինակ է համարում։

Նա իր ֆեյսբուքյան էջում գրառում է կատարել՝ արձագանքելով տեղի ունեցածին։   

«Հայաստանյայց Առաքելական Սուրբ Եկեղեցու իբր բարենորոգման այն հերթական արարը, որին քիչ առաջ ականատես եղանք, կարելի է գնահատել՝ որպես սահմանադրական կարգի տապալման դասական օրինակ, որին իրավապահ համակարգը, կարծում եմ՝ պետք է անդրադառնա:

Բայց այս ամենում մի կարևոր հանգամանք կուզենայի շեշտել։ Ն. Փ.-ն բազմաթիվ անհաջող փորձերից հետո հասկացել է, որ իր ուժերից վեր է «կայծակնային» արագությամբ հեռացնել Վեհափառին և կազմաքանդել հայկական հոգևոր-ազգային ամենահին կառուցակարգերից մեկը, ուստի դիմում է հայտնի հին մեթոդին՝ անհասկանալի և ոչ լեգիտիմ հանձնաժողովներով և համակարգող խորհուրդներով կոծկել իր հերթական տապալումը։

Բացի այս, դրանց ստեղծմամբ, Ն.Փ.-ն պաշտոնապես մեկնարկում է Հայաստանյայց Առաքելական Եկեղեցու պառակտման գործընթացը և որպես կառավարության փաստացի ղեկավար, գլխավորելով այդ համակարգող խորհուրդ կոչեցյալը, կրում ուղիղ պատասխանատվություն հնարավոր բոլոր հետևանքների համար:

Առաքելական մեր Սուրբ Եկեղեցին սրանից ավելի դժվարին փորձությունների և պայքարի միջով է անցել, այս մեկից էլ վստահաբար պատվով դուրս կգա։

Հենց դրա համար Վեհափառ Հայրապետին որդիաբար խնդրում եմ մեր Սուրբ Եկեղեցուն անմնացորդ աջակցելու հորդորով դիմել հավատավոր ազգին և այս փուլում առնվազն պաշտոնանկ անել տիրադավերին։

Ամեն հայի սրտից բխած,
Լսիր այս ձայն, ո՜վ Աստված.
Երկար կյանք տուր Հայրապետին,
Երկար օրեր Հայոց Հոր.
Տեր, անսասան պահիր դու միշտ
Քո իսկ հիմնած Մայր Աթոռ»,– գրել է նա։

Այս թեմայով ԱԱԾ նախկին տնօրեն Արթուր Վանեցյանն առողջական լուրջ խնդիրներ ունի Վանեցյանի «Հայրենիք»-ը չի մասնակցի առաջիկա ԱԺ ընտրություններին Ձերբակալվել է «Հայրենիք» կուսակցության գլխավոր քարտուղար Խաչիկ Գալստյանը Որդուս փոխարեն ես կարձագանքեմ այս անբարո հրապարակմանը. Արթուր Վանեցյանը հերքել է կեղծ լուրերը Ուստա, չալե՛…ներքաղաքական զուռնա-դհոլ