ԱՆ-ն անդրադարձել է առողջության ապահովագրության վերաբերյալ քաղաքացիների հարցերին

Առողջության համընդհանուր ապահովագրության փոխհատուցմամբ բուժօգնություն կարելի է ստանալ թե՛ պետական, թե՛ մասնավոր բուժհաստատություններում՝ ապահովագրության վկայագրով:

ՀՀ առողջապահության նախարարությունը ներկայացրել է հունվարի 1-ից փուլային տարբերակով ներդրվող՝ առողջության համընդհանուր ապահովագրության համակարգի վերաբերյալ քաղաքացիներին հուզող հարցերի պատասխանները:

Առաջին փուլով ապահովագրական համակարգում ընդգրկվելու են ՀՀ քաղաքացի և ռեզիդենտ մինչև 18 տարեկանները, առանց ծնողական խնամքի մնացած 18-23 տարեկանները, առանց ծնողական խնամքի մնացած առկա ուսուցմամբ սովորող մինչև 26 տարեկանները, 65 + տարիքի քաղաքացիները, հաշմանդամության 1-3-րդ խումբ ունեցող քաղաքացիները, ֆունկցիոնալության խորը, ծանր, միջին սահմանափակում ունեցող անձինք, զոհված զինծառայողների ընտանիքների անդամները, Չեռնոբիլի ատոմակայանի վթարի վերացման աշխատանքների մասնակիցները, Համաշխարհային պատերազմի մասնակիցները և նրանց հավասարեցված անձինք, բռնադատվածները, հաշմանդամության զինվորական կենսաթոշակ ստացող նախկին զինծառայողները, հաշմանդամություն ունեցող երեխայի ծնողներից մեկը, որդեգրողը, խնամակալը կամ հոգաբարձուն, անապահովության միավոր կամ աստիճան ունեցող ընտանիքի անդամը՝ կառավարության որոշմամբ սահմանված դեպքերում և կարգով, 200 001 դրամ և ավելի աշխատավարձ ստացողները, 2 400 001 դրամ և ավելի համախառն եկամուտ ունեցող ԱՁ-ներ և նոտարները:

Ապահովագրական փաթեթը բոլորի համար նույնն է լինելու, արժեքը` տարեկան 129 600 դրամ, ամսական` 10 800 դրամ:

Ապահովագրության փաթեթում ներառված հիվանդությունների, ախտորոշումների, սքրինինգների, ինչպես նաև դեղերի կոնկրետ ցանկերը հասանելի կլինեն «Արմեդ» հավելվածում, Առողջապահության նախարարության և Ապահովագրության հիմնադրամի պաշտոնական կայքերում:

Քաղաքացին SMS հաղորդագրությամբ տեղեկացվելու է, որ ներառվել է ապահովագրության համակարգում, և անհրաժեշտ է համաձայնություն տալ։ Ապա քաղաքացին պետք է գրանցվի «Արմեդ» հավելվածում և մեկ սեղմումով համաձայնություն տա պետության կողմից ապահովագրվելուն։ Եթե քաղաքացին չունի հասանելիություն էլեկտրոնային հավելվածին, ապա նա իր ընտանեկան բժշկի, ամբուլատոր թերապևտի, բուժքրոջ միջոցով ևս կարող է հաստատել իր համաձայնությունը:

Նախարարությունից նաև պարզաբանել են՝ եթե քաղաքացին ներառվել է ապահովագրության համակարգում և որոշակի ժամանակ անց դարձել է գործազուրկ, նա շարունակելո՞ւ է վճարել ապահովագրության համար:

«Քաղաքացին գործազուրկ դառնալով` հաշվառվում է ժամանակավոր անաշխատունակության համակարգում, որտեղից էլ որոշ ժամանակ որոշակի գումար է ստանում, ուստի այդ ամիսներին ապահովագրության համար ևս պետք է վճարի: Քաղաքացին մեկ անգամ մտնելով ապահովագրության համակարգ` մնում է համակարգում 12 ամիս` անկախ նրանից, թե այդ 12 ամիսներին համապատասխանում է համակարգում ներառվելու պահանջներին»,-հայտնել են գերատեսչությունից:

Մանրամասներին կարելի է ծանոթանալ Առողջապահության նախարարության կայքում:

Այս թեմայով Անահիտ Ավանեսյան, իսկ դուք պատրաստ ե՞ք Գյումրու բժշկական կենտրոնի և «Էրեբունի» ԲԿ-ի միջև համագործակցության հուշագիրը վկայում է Ձեր հեռատեսության և համակարգային մտածողության մասին Ուղեգրումների սահմանափակումը կարող է հանգեցնել հիվանդների ուշացած հոսպիտալացման, բժիշկները կարող են խուսափել որոշումներ կայացնելուց Շնորհակալ ենք Հիպոկրատի նվիրյալներ «Ժողովուրդ». Առողջապահական ապահովագրության համակարգի վեջը հավանաբար ընտրություններից հետո կգա