Ռուսները սպառնում են ամբողջությամբ շրջապատել Զապորոժեի ճակատը (Քարտեզ)

Ներկա փուլում, Պոկրովսկի անկումից հետո, ուկրաինական պատերազմի հիմնական թատերաբեմը դառնում է Զապորոժեի ուղղությունը: Թեեւ հրապարակային քննարկումներում առաջին պլանում է Գուլյայպոլեի գրոհը, բայց դա «մի փոքր» իրականությունից հետ է մնում:

Գուլյայպոլեն, իհարկե, իր կարեւորությունն ունի, եւ այստեղ համառ մարտերը շարունակվում են: Ընդ որում, ռուսներն արդեն քաղաքի կեսից ավելին գրավել են, այս պահին մարտերը կենտրոնի համար են, եւ, ըստ ամենայնի, երկար չեն ձգվի:

Իրականում այս ուղղությամբ հիմնական հարցերը լուծվում են Գուլյայպոլեից հյուսիս` Բրատսկոե փոքրիկ բնակավայրում (Քարտեզ 2): Այս գյուղի ռազմավարական իմաստը հետեւյալն է: Բրատսկոեից մի փոքր հարավ` Տերնովատոեի գոտուց սկսվում է Զապորոժեում ուկրաինական պաշտպանական վերջին ամրացված գոտին: Այն ձգվում է դեպի հարավ` Յանուչար գետի արեւմտյան ափով, Գուլյայպոլեի հատվածից շրջվում է դեպի արեւմուտք` հասնելով մինչեւ Դնեպր գետը: Այսինքն, եթե ռուսները գրավում են Գուլյայպոլեն, անգամ` Օրեխովոն, դրանցից այն կողմմ, միեւնույնն է, ուկրաինական այդ պաշտպանական գիծը դեռ մնում է:

Իսկ ահա Բրատսկոեն պաշտպանական այդ գծից այն կողմ է: Այսինքն, գրավելով այդ փոքրիկ բնակավայրը, ռուսները դուրս են գալիս օպերատիվ տիրույթ` սպառնալով ուկրաինական այդ վերջին պաշտպանական գծի թիկունքին եւ դրանով զրոյացնելով դրա իմաստը (Քարտեզ 3): Եվ այն, որ ներկա փուլում Բրատսկոեի ուղղությամբ մարտերն իրենց թեժությամբ գերազանցում են անգամ Գուլյայպոլեի մարտերին, պատահական չէ:

Բայց ամեն դեպքում, ռուսներն արդեն գրավել են Բրատսկոեի հարակից բնակավայրերը` Անդրեեւկան եւ Գերասիմովկան: Ներկա պահին հարձակումն ընթանում է հենց Բրատսկոեի վրա: Գրավելով այն, կրկնենք, ռուսները դուրս են գալիս Զապորոժեի ներկայիս ողջ պաշտպանական համակարգի թիկունք` սպառնալով ամբողջական շրջապատումով: 

Նաեւ հաշվի առնելով, որ ռուսական ուժերը կտրուկ ակտիվացել են նաեւ ճակատի արեւմտյան թեւում: Գրավելով Ստեպնագորսկը, ռուսական ուժերը գրոհում են Լուկյանովսկ փոքրիկ բնակավայրը, որից հետո կհարվածեն Մագդանովկա - Պոլտավկա ուղղությամբ` անմիջական սպառնալիք ստեղծելով Օրեխովոյի թիկունքին: Սա, Օրեխովոյի եւ Գուլյայպոլեի ուղղությամբ գրոհները կաշկանդում են ուկրաինական ուժերին, հնարավորություն տալով ռուսներին` զարգացնել հիմնական հարձակումը Բրատսկոեի վրա:

Այս թեմայով Ռուսները զանգվածաբար տեխնիկա և անձնակազմ են տեղափոխում Զապորոժե և Դոնեցկի հյուսիս. Ուկրաինական աղբյուրներ Ռուսական բանակը հարձակվում է դեպի Զապորոժե (Քարտեզ) Ռուսական բանակը կարող է զարգացնել հարձակումը Զապորոժե քաղաքի ուղղությամբ (Քարտեզ) Ռուսական սավառնող-կառավարվող ավիառումբերն արդեն հասնում են Զապորոժե (Տեսանյութ)