Մեզ դիմած երեխաների կողքին ենք միշտ`լինի ամանոր, թե մեկ այլ տոն. Անաիս Սարդարյանն

Ամանորյա հրաշքին սպասում են բոլորը՝ մեծ, փոքր, իսկ հրաշքները լինում են այնքա՜ն տարբեր` սկսած մեծ երազանքներից մինչեւ հասարակ խաղալիք: Ցավոք, ներկայիս Հայաստանում ոչ բոլորն են կարողանում իրենց երեխաների համար այդ հրաշքներն ապահովել: Թերեւս, անհատների միջոցով, որոշ չափով այդ բացը լրանում է ու այդ անհատներից մեկը դերասանուհի ԱՆԱԻՍ ՍԱՐԴԱՐՅԱՆՆ է: Թե ինչպես, «Իրավունք»-ը մանրամասներ է պարզել հենց նրանից:

—2020 թվականից մինչ օրս զոհված հերոսների երեխաների համար կազմակերպում եմ անմոռանալի եւ հետաքրքիր միջոցառումներ: Ցավոք, նման ընտանիքների թիվը գնալով շատացավ 2022-ին: 2023-ին Արցախի կորստի եւ սեպտեմբերի պատերազմի հետեւանքով կրկին թիվը ավելացավ եւ այսօր ունենք 1868-ից ավելի երեխա, որոնց համար ամանորյա նվերներ ենք պատրաստում: Ցանկանում եմ ասել, որ գումար չեմ հավաքում, չեմ էլ հավաքել եւ երբեք չեմ հավաքելու: Մենք հավաքում ենք նվերներ, որոնք հայ ժողովուրդը բերում է, իսկ մենք դա սիրով նվիրում ենք այդ ընտանիքներին՝ որպես միջնորդ: Ամանորյա միջոցառումը, ըստ նախնական պայմանավորվածության, հավանաբար, կանենք «Տաշիր» արենայում: Կլինի հետաքրքիր շոու ծրագիր՝ լի նվերներով:

Ինձ մշտապես օգնել են 500-ից ավելի կամավորներ, որոնք սովորական մարդիկ են՝ ուսանողներ, ճիշտ արժեքներով դաստիարակված երիտասարդներ: Այս պահին աշխատում են 7-ական խմբերով, որպեսզի հասցնենք: Ասեմ նաեւ, որ կամավորների թիվը գնալով ավելանում է, ինչը շատ գովելի է: Կարեւորը գնահատելն է այն, որ հերոսներն այս կյանքում մեզ տվել են ամենաթանկը՝ իրենց կյանքը: Մենք էլ պետք է ամեն բան անենք իրենց երեխաների համար, թեկուզ ֆիզիկական գործի տեսքով: Այս ամենի իմաստը նրանում է, որ զոհված ծնողի փոխարեն՝ մի բան գոնե մենք կարողանանք անել: Ներկա պահի դրությամբ, նաեւ ունենք գրանցված 200-ից ավելի արցախահայ երեխա: Հայաստանի ցանկացած անկյուններից մեզ դիմած երեխաների կողքին ենք միշտ՝ անկախ նրանից լինի Ամանոր, թե մեկ այլ տոն:

ՆԱՆԱ ՍԱՐԳՍՅԱՆ

Այս թեմայով Մեզ դիմած երեխաների կողքին ենք միշտ`լինի Ամանոր, թե մեկ այլ տոն. Անաիս Սարդարյան Չէ, սա 37 թիվը չի, սա հենց 1915 թվի կրկնությունն է.Անաիս Սարդարյան Մոդել Լուսինե Հայրապետյանը Դուբայի օդանավակայանից տեսանյութ է հրապարակել Անաիս Սարդարյանի հետ Դոն Պիոպոյի սարքած գործի արդյունքով ամուսինս կալանքի տակ է. Անաիս Սարդարյան