Երեւան քաղաքը այս մարդիկ դիտարկում են որպես սեփական գրպանը լցնելու միջոց. Գեւորգ Ստեփանյան

Երեւանի քաղաքապետ Տիգրան Ավինյանը, խոսելով վերջին օրերին Երեւանում օդի աղտոտվածության բարձր ցուցանիշների մասին, ասաց, որ այն բնորոշ է ոչ միայն Երեւան քաղաքին, այլ նաեւ Երեւանին հարակից Արարատյան գոգավորությունում գտնվող Արարատի, Արմավիրի, Արագածոտնի մարզերին եւ հարակից տարածաշրջաններին: Օդի աղտոտվածությունն այս տարածաշրջանում ունի խիստ սեզոնային բնույթ ու պայմանավորված է առավելապես աշխարհագրական գործոններով: Բնականաբար, այս ամենը քաղաքացիների շրջանում բողոքի եւ քմծիծաղի առիթ հանդիսացավ: Թե Ավինյանի այս հայտարարությունը ինչպես ընդունեցին Երեւանի քաղաքի ավագանու անդամները, «Իրավունք»-ը պարզեց Երեւանի ավագանու «Մայր Հայաստան» խմբակցության անդամ ԳԵՎՈՐԳ ՍՏԵՓԱՆՅԱՆԻՑ:

— Ինչպե՞ս կմեկնաբանեք Տիգրան Ավինյանի հայտարարությունն առ այն, որ օդի ռեկորդային աստիճանի հասած աղտոտվածությունը պայմանավորված է եղանակային պայմաններով:

— Նախ կցանկանամ փոքրամասնությամբ ձայն հավաքած քաղաքապետին հիշեցնել, որ ինքն արդեն փրփուրներից է կախվում եւ հիմա էլ մեղադրում է եղանակին կամ եղանակային պայմաններին: Մեղադրում է, թե Երեւանը ինչ դիրքում է գտնվում, հետո մեղավոր կլինեն քաղաքացիները, որ տերեւներ են վառում: Այսինքն, իրենց սիրած 30 տարիների ընթացքում, քաղաքացիներն ընդանրապես տերեւներ չէ՞ին այրել… Ստացվում է, որ բոլորը մեղավոր են՝ բացի իրենցից, սակայն միակ մեղավորն ու պատասխանատուն ՔՊ-ն է՝ իր 9 տոկոս ձայն ստացած Տիգրան Ավինյանի հետ միասին:
Երեւան քաղաքում աջ ու ձախ, առանց հաշվարկ անելու, բաժանեցին շինթույլտվություններ: Եվ եթե նայեք քաղաքի շինարարությանը, 50 տոկոսը կանգնած է: Շինհրապարակներում խայտառակ իրավիճակ է եւ մի թեթեւ քամուց, ողջ քաղաքը ծածկվում է փոշու մեջ:

Երկրորդ հիմնավոր պատճառը մեքենաների խցանումներն են: Մեքենաներն այն կարգի խցանված են, որ գազի արտանետումը բավական է օդի աղտոտվածության սանդղակը բարձանալու համար: Հետեւաբար, ինչ էլ խոսի եւ ասի Ավինյանը, միեւնույնն է, դա իրենց անմիջական մեղքով է եղել, եւ քաղաքացիներին թող չմեղադրեն ոչնչի մեջ: Պետք է հստակ փաստել, որ Երեւան քաղաքը խայտառակ վիճակում է գտնվում, եւ դա միայն փոշին չէ: Այսինքն՝ խցանումներն այն աստիճանի են հասել, որ իրենց վարչապետն է մնում խցանումների մեջ, իրենք էլ են այս օդը շնչում, եւ կարծում եմ՝ հասկացել են, որ սա խայտառակ վիճակ է: Իրենք «բում» սարքեցին, թե բա՝ պետք է տալ շինթույլտվություններ, թող բիզնեսը զարգանա եւ այլն, սակայն այդ իրենց ասած «բումն» էլ պայթեց ու շինհրապարակները մնացել են կիսատ: Շուտով կսկսվեն տեղումները, այդ ժամանակ կտեսնենք, թե ինչ վիճակի մեջ կհայտնվի մայրաքաղաքը: Երեւան քաղաքը այս մարդիկ դիտարկում են որպես սեփական գրպանը լցնելու միջոց: Նրանք ո՛չ Երեւանն են սիրում, ո՛չ էլ` երեւանցիներին:

— Ասում են՝ եղանակային է խնդիրը, սակայն ամռանն էլ նմանատիպ խնդրի առաջ բախվեցինք, երբ այրվեց Նուբարաշենի աղբավայրը…

— 2018 թվականին, երբ խաբելով եկան իշխանության, այդ պահից մինչ օրս ասում են, որ Նուբարաշենի աղբավայրում պիտի վերամշակման գործարան սարքեն: Սակայն իրենք սովորական ասֆալտապատում եւ փոսալցում չեն կարողանում անել: Ասեմ, որ աղբավայրը չեն սարքելու, փոխարենը այլ վայր կգտեն, կասեն հիմա էլ այդ վայրը օգտագործեք որպես աղբավայր:

— Անդրադառնանք խցանումներին: Այս անտանելի խցանումների հանգուցալուծումը ինչպե՞ս եք տեսնում:

— Ինքս ամեն օր եմ բախվում այդ խնդրի հետ: Քիչ առաջ 57 րոպե, առանց պատճառի, մնացել եմ խցանման մեջ: Սակայն ինչ արեցին ՔՊ-ականները, կարմիր գծերը դարձրին 160 հազար դրամ, իբրեւ թե դա կլուծի խցանումների հարցը: Տեսնում ենք՝ ինչպես լուծվեց: Փոխարենը ժողովրդից հավաքեցին 2 միլիարդ 100 միլիոն դրամ եւ մսխեցին՝ այդ գումարից ընդամենը ծախսելով 10 հազար դրամ ներկերի վրա: Ստացվեց` երեւանցին կրկին դարձավ տուգանքի մատերիալ: 2023 թվականից գոռում ենք, լուծում առաջարկում, հորդորում չստել եւ չխաբել մարդկանց՝ իբր կարմիր գծերի թանկացումը կլուծի խցանումների հարցը: Մենք բազում առաջարկներով ենք հանդես եկել, սակայն չեն լսել: Իրենք իրենց լավ են զգում, քանի որ երբ անցնում են փողոցով, իրենց համար փակվում են փողոցները, եւ ստիպված չեն լինում հասարակ քաղաքացու նման ժամերով մնալ խցանումների մեջ:

Նույն կերպ չլսեցին տրանսպորտի թանկացման հարցում ու հիմա եկան հասան նրան, որ Երեւանի բյուջեում թերհավաքագրում է եղել: Մարդիկ չեն վճարել, բոյկոտել են եւ շատ լավ են արել: Հիմա, օրեր առաջ, իրենց վարչապետը, ստիպված ՀՀ պետբյուջեից՝ պահուստային ֆոնդից 3 միլիարդ դրամ տվեց քաղաքապետին, որ խայտառակ չլինի: Մեկ ամսից կտեսնեք` ավտոբուսների վիճակն ինչ է լինելու: Ո՛չ ձմեռային անվադողեր ունեն, ո՛չ բյուջե: Իսկ քաղաքացին այս եղանակին 45 րոպե ստիպված սպասում է ավտոբուսի: Բարեփոխման անվան տակ իբրեւ պիտի լինեին սմարթ կանգառներ, մարդիկ պետք է 15 րոպեից ավել չսպասեին, սակայն ո՞ր մի ասածն է իրականացրել փոքրամասնության ձայներ հավաքած քաղաքապետը:

ՆԱՆԱ ՍԱՐԳՍՅԱՆ

Այս թեմայով «30 տարի այդտեղ ապրել են, հիմա որոշել են քանդել». 11-հոգանոց ընտանիքը մնացել է դրսում. Ստեփանյան Մեր քաղաքացիներն արդեն էլ ոչ մի բանի չեն հավատում. սա շատ վատ տեղ է տանելու Հայաստանին. Ստեփանյան Սկսեցին խոսել «արա»-ով, «բոմժեր կբոմժացնենք»-ով, «բոքսի տանձիկ կսարքենք»-ով․ Ստեփանյան ՇՏԱՊ. Գեւորգ Սուջյանը դատարան է դիմել «Հրապարակ». Գեւորգ Փարսյանը ընտրություններից հետո մեկուսացել է, գրեթե չի շփվում ոչ մեկի հետ