Երբեք ուշ չէ գտնել երկրորդ կեսին. առաջնախաղ Պարոնյանում

Երեւանի Հակոբ Պարոնյանի անվան երաժշտական կոմեդիայի պետական թատրոնում կայացավ Արմեն Կարապետյանի «Անհաջող ժամադրություն» խելահեղ կատակերգության առաջնախաղը։ Բեմադրությունն ու երաժշտական ձեւավորումն իրականացրել է Ավետիս Շահինյանը, բեմանկարչությունն ու զգեստների ձեւավորումը՝ Գագիկ Բաբայանը։ Ներկայացման մեջ խաղում են Սամսոն Ստեփանյանը, Մարգարիտա Խաչատրյանը, Տիգրանուհի Տեր-Մարկոսյանը եւ ներկայացման հեղինակ Արմեն Կարապետյանը։

Սյուժեն պատմում է միջին տարիքի երկու մարդկանց մասին, ովքեր, տարիների հիասթափություններից հետո, այլեւս չեն հավատում «պատահական երջանկություններին»։ Սակայն մեկ մայրական նախաձեռնություն անսպասելիորեն վերածվում է նոր շրջադարձի՝ լի հումորով, զվարճալի բախումներով, անկեղծ զրույցներով եւ հոգեբանական բացահայտումներով։

«ՅՈՒՐԱՔԱՆՉՅՈՒՐ ՄԱՐԴ ՊԵՏՔ Է ԼԻՆԻ ԵՐՋԱՆԻԿ»

Ինչպես նշում է հեղինակ ԱՐՄԵՆ ԿԱՐԱՊԵՏՅԱՆԸ՝ ներկայացման բուն գաղափարը այն է, որ յուրաքանչյուր մարդ պետք է լինի երջանիկ։

«Ինչ ճանապարհով կհասնի այդ երջանկությանը՝ դա արդեն սեփական ընտրությունն է։ Մենք այս ներկայացումով ցույց ենք տալիս երջանկության հասնելու հնարավոր ճանապարհներից մեկը՝ դուրս ստերեոտիպային ու մակերեսային պատկերացումներից։ Կարեւոր է տեսնել դիմացինի ներսը, հոգին, գնահատել նրա ինտելեկտուալ ունակությունները։ Ինչպես ասում են՝ նմանը նմանին է գտնում, եւ մենք ուզում ենք ցույց տալ այդ բնական համընկնումը»,- նշեց նա:

Արմեն Կարապետյանը նաեւ ընդգծեց, որ ներկայացումը պատմություն է մարդու ներքին պայքարի մասին. «Թեպետ հերոսներն անցել են անհաջող փորձերով, նրանք չեն հանձնվել։ Նրանց մեջ կա շարունակական պայքար՝ երջանկությունը գտնելու համար։ Եվ հենց այդ պայքարի ընթացքում է, որ նրանք բացահայտում են միմյանց իրական բնույթը, գտնում ընդհանուր գծեր ու կամաց-կամաց մոտենում իրար»։

Ներկայացման վրա աշխատանքը տեւել է մոտ երկու ամիս՝ կերպարների բնավորությունների, մասնագիտությունների եւ ընդհանուր սյուժետային կառուցվածքի մանրակրկիտ մշակմամբ։

«ՄԻԱՅՆԱԿ ԼԻՆԵԼԸ ՎԵՐՋՆԱԿԱՆ ՎԻՃԱԿ ՉԷ»

Ըստ ռեժիսոր ԱՎԵՏԻՍ ՇԱՀԻՆՅԱՆԻ, ներկայացման ստեղծման ընթացքում նպատակ են դրել այնպես անել, որ հանդիսատեսը զգա պատմության կենսական ու մարդկային լիցքերը։

«Մենք գիտակցաբար հրաժարվեցինք բարդ ձեւականություններից՝ ընտրելով պարզության ու անկեղծության գեղագիտությունը։ Դա մեզ հնարավորություն տվեց կենտրոնանալ մարդու ներաշխարհի, հարաբերությունների նրբությունների եւ հոգեբանական շարժառիթների վրա։ Ներկայացման գլխավոր ուղերձը շատ հստակ է. երբեք ուշ չէ գտնել զուգընկերոջը, երբեք ուշ չէ նոր սկիզբ ունենալ։ Մարդը ցանկացած տարիքում կարող է գտնել իր երջանկությունը, եթե համարձակվում է բացվել, անկեղծ լինել եւ վստահել դիմացինին։ Մենք ուզում ենք հիշեցնել, որ միայնակ լինելը վերջնական վիճակ չէ», - շեշտեց նա։

Ռեժիսորի գնահատմամբ՝ երբ մարդիկ փորձում են ճանաչել միմյանց ոչ թե արտաքին շաբլոնների, այլ հոգեւոր ու ինտելեկտուալ համապատասխանության միջոցով, այդ ժամանակ է ձեւավորվում իրական կապը. «Այս գաղափարներն են շարժող ուժը յուրաքանչյուր տեսարանում՝ հումորի, լարվածության եւ անկեղծության համադրությամբ։ Համոզված եմ, որ հանդիսատեսը կնկատի նաեւ այս հոգեբանական շերտերը եւ յուրաքանչյուր դիտումից հետո ինչ–որ բան կվերցնի իր անձնական փորձության համար»:

Նշենք, որ ներկայացման տեւողությունը 1 ժամ 20 րոպե է, այն նախատեսված է 14 տարեկանից բարձր հանդիսատեսի համար: Թերեւս լավագույն ժամադրության վայրը՝  «Անհաջող ժամադրություն» ծածկագրով: Ի դեպ, առաջնախաղից հետո դահլիճում տիրող ջերմ ծափողջույններն ապացուցում էր՝ աստղաբաշխական հատուկ էֆեկտներ պետք չեն, երբ բեմի վրա կա կենդանի էներգիա, ազնիվ խաղ եւ պատմություն, որն ընդգծում է ամենատարրական ճշմարտությունը՝ երջանկությունը ոչ թե պատհականություն է, այլ ընտրություն։ Իսկ ընտրելու կարողությունը, ինչպես հիշեցնում է ներկայացումը, չի սահմանափակվում տարիքով, փորձությամբ կամ նախորդ հիասթափություններով։

Այո՛, Պարոնյանի թատրոնը, ներկայացնելով այս նոր կատակերգությունը, եւս մեկ անգամ բացում է իր դուռը այն հանդիսատեսի առաջ, որը ցանկանում է ոչ միայն ծիծաղել, այլ նաեւ մտածել, զգալ եւ գուցե սեփական կյանքի համար նոր մեկնարկային կետ գտնել։

Այս թեմայով Սի Ցզինպինը 10 տարվա ընթացքում առաջին անգամ պետական ​​այցով կժամանի Միացյալ Նահանգներ Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Պետությունը չպետք է քաղաքացու փոխարեն որոշի՝ նրա վիշտը ֆինանսապես «բավարար ծանր» է, թե ոչ Փաշինյանը նպատակ ունի կտրել թաղման նպաստները ՀՐԱՏԱՊ. ԴՕԿ կուսակցության պատվավոր նախագահ Վարդան Ղուկասյանի հայտնի փաստաբանը հայտարարությամբ է հանդես եկել