ԲՌՆՑՔԱՄԱՐՏԻ ՄԵԾԱՀԱՍԱԿՆԵՐԻ ՀԱՎԱՔԱԿԱՆԸ ՊԱՏՐԱՍՏ Է ԱՇԽԱՐՀԻ ԱՌԱՋՆՈՒԹՅԱՆԸ

Բռնցքամարտի Հայաստանի մեծահասակների հավաքականը կազմ ու պատրաստ է IBA -ի Աշխարհի առաջնությանը։ Մեր ընտրանին մրցավայր կմեկնի վաղը դեկտեմբերի 1-ին։ Հայաստանը Դուբայում կայանալիք Աշխարհի առաջնությանը կլինի մեծ պատվիրակությամբ։ Մեր կաշվե ձեռնոցի մարտիկների կողքին կլինեն ֆեդերացիայի նախագահ Հովհաննես Հովսեփյանը, առաջին փոխնախագահ Սամվել Գասպարյանը և մեր անվանի ու տիտղոսակիր չեմպիոններ Մեխակ Ղազարյանն ու Սամսոն Խաչատրյանը։ Մեր երկիրը ԱԱ֊ում 13 մասնակից ունի, կան նաև նորեկներ։ Նոյեմբերի 29-ին, Iravunk. com -ի մարզական լրագրողը կրկին այցելել է Երևան, Օլիմպավանում վերջին պարապմունքը անցկացնող մեր բռնցքամարտիկներին հանդիպել ու զրուցել կարևորագույն մրցաշարից առաջ։ Անվանի բռնցքամարտիկ, Փարիզի ՕԽ մասնակից, Աշխարհի փոխչեմպիոն, գերծանր քաշային կարգում հանդես եկող ԴԱՎԻԹ ՉԱԼՈՅԱՆԸ, մեզ հետ զրույցում նշեց. - « 2021-ին Բելգրադում ԱԱ֊ում արծաթե մեդալ նվաճելուց հետո հասկացա, թե փորձը որքան կարևոր է նման խոշոր մրցաշարերի պատրաստվելուց առաջ։ Այս առաջնությանն ավելի գիտակցված եմ մոտեցել, ավելի մեծ ուշադրություն դարձրել մարտավարությանը, ֆիզիկական և հոգեբանական պատրաստվածությանը, վերլուծել հակառակորդներիս։ Դուբայ եմ մեկնելու միայն հաղթանակի համար»։

Մեր մյուս անվանի բռնցքամարտիկ, Եվրոպայի գավաթակիր, Աշխարհի մրցանակակիր, Եվրոպայի փոխչեմպիոն ՆԱՐԵԿ ՄԱՆԱՍՅԱՆՆ էլ նշեց.

- «92 կգ քաշային կարգում եմ հանդես գալու։ Շատ լավ մարզավիճակում եմ գտնվում, շատ լավ ուսումնամարզական հավաքներ անցկացրեցինք թե Գյումրիում, թե այստեղ Օլիմպավանում։ Ամեն ինչ անելու եմ, որ այս անգամ ավելի լավ հանդես գամ ու ոսկե մեդալ նվաճեմ։ Ասեմ, որ մարզումների ժամանակ ավելացրել եմ արագությունս, նախորդ մրցաշարի համեմատ սա մեծ առավելություն կլինի ինձ համար։ Հաղթանակի համար եմ մտնելու ռինգ»։

Իսկ ահա մյուս  կաշվե ձեռնոցի անվանի  մարտիկ  ԲԱՐԵՂԱՄ ՀԱՐՈՒԹՅՈՒՆՅԱՆԸ նշեց.

«Շատ լավ եմ պատրաստվել այս ԱԱ֊ին, հուսով եմ, որ ամեն ինչ շատ լավ է ստացվելու։ Ճիշտ է տարիքով ամենամեծն եմ 36 տարեկան եմ, սակայն տարիքը ինձ չի կարող խանգարել, որպեսզի հաջող հանդես գամ, քանի որ ես շատ լավ մարզավիճակում եմ գտնվում, տրամադրված եմ մարտական։ Իսկ ահա մյուս անվանի մարզիկ ՌԱՖԱՅԵԼ ՀՈՎՀԱՆՆԻՍՅԱՆԸ նշեց.

- «Երկրորդ անգամ եմ մեկնում Աշխարհի առաջնության, խնդիրները վերացրել եմ, շտկել բոլոր թերությունները, հակառակորդներիս ծանոթ եմ, պայքարելու եմ մինչև վերջ հասնելու հաղթանակի»։

Աշխարհի առաջնությունը կկայանա դեկտեմբերի 2-13-ը Դուբայում, կլինի մեծ մրցանակային ֆոնդ։ Թիմը մրցավայր կմեկնի հավաքականի գլխավոր մարզիչ Ռուդիկ Մկրտչյանի և մարզիչ Ռոբերտ Պետրոսյանի գլխավորությամբ։ Դե ինչ, փայլուն հաղթանակներ մեր կաշվե ձեռնոցի մարտիկներին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով Սիրո անունը Հայաստան է․ Սպարտայի ջերմ գրառումը Արարատ-Արմենիայի հետ խաղից հետո Բռնցքմարտի ԵԱ-ում այսօր Հայաստանն ունի 5 բռնցքամարտիկ ԲՌՆՑՔԱՄԱՐՏԻ ԵԱ. ՀԱՅԱՍՏԱՆՆ ՈՒՆԻ 4 ՆԵՐԿԱՅԱՑՈՒՑԻՉ ՀԱՅ ԲՌՆՑՔԱՄԱՐՏԻԿՆԵՐԸ ՄԵԿՆԵՑԻՆ ԲՈՒԼՂԱՐԻԱ ՄԱՍՆԱԿՑԵԼՈՒ ԵՎՐՈՊԱՅԻ ԱՌԱՋՆՈՒԹՅԱՆԸ։ Ես գիտեմ՝ ինչպես հաղթել Արման Ծառուկյանին. Մաուրիսիո Ռուֆի