Աշխատանքներ են տարվում ինքնակամ տեղադրված հուշաքարերի ապամոնտաժման ուղղությամբ. Aysor.am

2022 թվականի հուլիսի 7-ի կառավարության նիստում վարչապետ Նիկոլ Փաշինյանը հայտարարել էր՝ «Հայաստանում տարերային կամ խուճապային տեմպերով ինչ-որ խաչեր են հայտնվում»։ Վարչապետը հանձնարարական էր տվել ուսումնասիրել գործընթացն ու գնահատական տալ։

2024 թվականին Aysor.am-ն այս հարցով դիմել էր Տարածքային կառավարման և ենթակառուցվածքների նախարարություն՝ հետաքրքրվելով,թե ինչ փուլում է վարչապետի հանձնարարականը։

ՏԿԵՆ-ից պարզաբանել էին. «ՀՀ վարչապետի հանձնարարությամբ իրականացվում է առանց նշված պահանջների պահպանման տեղադրված խաչերի, խաչքարերի ու հուշակոթողների գույքագրում, որի արդյունքներով կներկայացվեն համապատասխան առաջարկություններ»։

Այս օրերին այս թեման կրկին ակտուալ է դարձել։ Տեր Նարեկ քահանա Սարգսյանը, օրինակ, հայտնել էր՝ լուր է տարածվել, թե մեր գյուղերում և գյուղերին հարակից լեռների վրա տեղադրված խաչերը պետք է ապամոնտաժվեն։

«Վստահաբար օրվա ապազգայիններն այս քայլով ցանկանում են ստուգել մեր քրիստոնյա հայ ժողովրդի՝ սրբությունների նկատմամբ զգայունությունը, ասել է թե՝ ժողովրդի արձագանքը։ Եվ, կարծում եմ, որ եթե սա ձախողենք, հաջորդիվ ոչ միայն կապամոնտաժեն մեր Սուրբ Եկեղեցիների վրա դրված խաչերը, այլև դրանք կվերածեն ոչ քրիստոնեական տաճարների»,- նշել էր Տեր Նարեկը։

Aysor.am-ը գրավոր հարցում է ուղարկել Տարածքային կառավարման և ենթակառուցվածքների նախարարություն՝ խնդրելով պարզաբանել՝ երեք տարի է անցել Նիկոլ Փաշինյանի հանձարարականից՝ կատարվե՞լ է ուսումնասիրություն ու ո՞րն է գնահատականը, կա՞ թիվ, թե այս ընթացքում որքան խաչեր են ապամոնտաժվել, ապամոնտաժման գործընթացը շարունակվո՞ւմ է։

ՏԿԵՆ-ից հայտնել են, որ կատարում են Նիկոլ Փաշինյանի հանձնարարականը։

«Իրավասու մարմինների կողմից աշխատանքներ են տարվում ինքնակամ տեղադրված հուշաքարերի ապամոնտաժման ուղղությամբ։ Աշխատանքները կրում են շարունակական բույթ»,- Aysor.am-ի հարցմանն ի պատասխան՝ նշել են նախարարությունից։

Այս թեմայով «Մնացել ենք պատմության ու մեծերի ավանդած դասերին անհաղորդ». Արգամ Այվազյան Նախիջեւանում հայկական եկեղեցիների տեղերում մզկիթներ են կառուցել Թուրքիայում ճանապարհաշինարարական աշխատանքների ժամանակ հայտնաբերվել են հայկական խաչքարեր