Քոչարյանը ոչ թե հավատում է, որ ընտրություններով կարող է գալ իշխանության, այլ հույս ունի նորից ձայներ գնել. Խաչատրյան

ՀՀ երկրորդ նախագահ Ռոբերտ Քոչարյանը հարցազրույց է տվել եւ անդրադարձել 44-օրյա պատերազմի պատճառներին, իշխանության՝ այդ օրերին թույլ տված սխալներին, խոսել է 2020-ի նոյեմբերի 9-իեւ 2025-ի օգոստոսի 8-ի վաշինգտոնյան փաստաթղթերից։ «Իրավունք»-ի հետ զրույցում հարցազրույցից իր տպավորությունների մասին է խոսել Երեւանի ավագանու «Հանրապետություն» խմբակցության ղեկավար ԱՆԻ ԽԱՉԱՏՐՅԱՆԸ:

«ՀՈԿՏԵՄԲԵՐԻ 27-ՈՎ ՍԿՍՎԱԾ ՈՒ ՄԱՐՏԻ 1-ՈՎ ԻՐ ՊԱՇՏՈՆԱՎԱՐՈՒՄՆ ԱՎԱՐՏԱԾ ՄԵԿՆ ԸՆԴՀԱՆՐԱՊԵՍ ԻՐԱՎՈՒՆՔ ՉՈՒՆԻ ԽՈՍԵԼ ԽԱՂԱՂՈՒԹՅԱՆ ՄԱՍԻՆ»

— Ըստ ՀՀ երկրորդ նախագահի` Հայաստանի Հանրապետությունում ամենից խաղաղ տարիները եղել են հենց իր նախագահության տարիները․ ունեցել ենք ամենից քիչ զոհեր, ընդհանրապես տարածքային կորուստներ չենք ունեցել եւ ունեցել ենք մի շարք այլ հաջողություններ տնտեսական ոլորտում։ Ի՞նչ կասեք այս մասին:

— Ես այդ տարիների մասին բոլորովին այլ ընկալում ունեմ՝ հոկտեմբերի 27-ով սկսված ու մարտի 1-ով իր պաշտոնավարումն ավարտած մեկն ընդհանրապես իրավունք չունի խոսել խաղաղության ու տնտեսական հաջողությունների մասին: Ռոբերտ Քոչարյանը ՀՀ տնտեսական ու մարդկային ներուժը հանել էր վաճառքի՝ գնելու իր իշխանությունը, նրա պատկերացրած խաղաղությունը ՌԴ-ին հանձնված մոնոպոլիաներն էին, նույնիսկ պաշտոնավարման վերջին օրերին հասցրեց 20 տարով ՌԴ-ի կոնցեսիոն կառավարմանը հանձնել հայկական երկաթուղին, արդեն չեմ ասում Իրան-Հայաստան գազատարի տրամաչափը նեղացնելու ու, ի վերջո, դարձյալ ՌԴ-ին՝ Գազպրոմին, հանձնելու «Գույք պարտքի դիմաց»-ի մասին, որ խայտառակ համաձայնագիր էր, նույնիսկ ՀՀ պաշտպանական արդյունաբերությունը օտարելու փաստաթղթում կետ չկար հետագա պարտադիր շահագործման մասին: Սա՞ էր խաղաղությունը: Թե՞ բանակի զարգացումը կասեցնելն էր խաղաղությունը: Գուցե 2004-ի ապրիլի 12-ն էր «խաղաղությունը», որ դե ֆակտո պատերազմ էր ժողովրդի դեմ: Հենց այդ օրը «Հանրապետություն» կուսակցության գրասենյակը ու գրասենյակում գտնվողներին, այդ թվում՝ Արտակ Զեյնալյանին ու ինձ վայրագ ծեծելով տարան ոստիկանություն: Դա՞ է Ռոբերտ Քոչարյանի «խաղաղությունը»: Աներկբա է, որ Ռոբերտ Քոչարյանի պաշտոնավարման տասնամյակը եղել է ՀՀ ռազմական, տնտեսական, ամենակարեւորը՝ ինքնիշխանության նահանջի 5+5 տարիների ժամանակաշրջան, որի ամենաբնորոշ բնութագիրը փաստն է, որ նա երբեւէ չի ընտրվել:

«ՇԱՏ ԲՆՈՒԹԱԳՐԱԿԱՆ Է, ՈՐ ՔՈՉԱՐՅԱՆԸ ՇՈԿ Է ԱՊՐՈՒՄ ՈՉ ԹԵ ԻՐ ՀԱՅՐԵՆԻՔԻ ՄԻ ՄԱՍԻ ԿՈՐՍՏԻ ՀԱՄԱՐ, ԱՅԼ՝ ԻՐ ԻՇԽԱՆՈՒԹՅԱՆ ՉԳԱԼՈՒ»

— Ռոբերտ Քոչարյանն ասում է, որ իր համար ամենամեծ շոկը եղել է 2021 թվականի ընտրությունների արդյունքները, որովհետեւ պարտություն բերած, այդքան մեծ զոհեր բերած մարդը չպիտի վերընտրվեր։ Ինչպե՞ս հասկանալ, որ նման շոկ ապրած քաղաքական գործիչը կրկին հավատում է, որ ընտրություններով հնարավոր է հասնել այս իշխանության փոփոխության եւ գալ իշխանության:

— Ամենամեծ շոկը Ռոբերտ Քոչարյանի համար պետք է լիներ հենց 2020-ի պարտությունը, բայց նա հազիվ թե շոկ ապրեր սպանված զինվորների ու քաղաքացիների համար: Կամ ընդուներ, որ ինքն էլ է մեղավոր: Գիտե՞ք, շատ բնութագրական է, որ Ռոբերտ Քոչարյանը շոկ է ապրում ոչ թե իր հայրենիքի մի մասի կորստի համար, այլ՝ իր իշխանության չգալու: Նրա պես շոկ ապրել է մեկ էլ ՌԴ նախկին նախագահ Դմիտրի Մեդվեդեւը... Հավատացեք՝ Ռոբերտ Քոչարյանը ոչ թե հավատում է, որ ընտրություններով կարող է գալ իշխանության, այլ հույս ունի, որ նորից ձայներ է գնելու, մոլորեցնելու, ստելու է ու ապավինելու է իր մայր Ռուսիային ու Հայաստանում գործող տրոյական ձիերի 5-րդ շարասյանը: Չի ստացվելու: «Խորտակված պատրանքներ» մաս 2՝ առաջարկում եմ այս վերնագրով գիրք գրել 2026-ի ընտրություններից հետո:

— Եթե մեր ժողովուրդն ուզում է իմանալ ճշմարտությունը, ուրեմն՝ պետք է իր ընտրությունը ճիշտ անի 2026 թվականին այս չարությամբ լցված իշխանությունը չպետք է իշխանության գա։ Այս համոզմանն է Ռոբերտ Քոչարյանը: Այս մտքի հետ համամի՞տ եք:

— Զարմանալին Ռոբերտ Քոչարյանի տեսակետը չէ, զարմանալին այն է, որ նման հարց տալիս եք ինձ՝ «Հանրապետություն» կուսակցության բազմամյա անդամի, որ տասնյակ առիթներ է ունեցել թե Ռոբերտ Քոչարյանի, թե իր տասնամյակի մասին կարծիք հայտնելու: «Մինչեւ քոքը մաշցնելու» թեզն էլ, երեւի, մեծ մարդասիրության դրսեւորում էր՝ ըստ Ռոբերտ Քոչարյանի: Այո, 2026-ին իշխանության չպետք է գան չարությամբ լցված ուժերը, եւ դա առաջին հերթին վերաբերում է հենց Ռոբերտ Քոչարյանին, որ ոչ միայն չարության, այլեւ Արցախի ու Հայաստանի նկատմամբ թշնամանքի էտալոն է:

ՆԱՆԱ ՍԱՐԳՍՅԱՆ

Այս թեմայով Գերմանիայից ժամանած բժշկին թույլ չեն տվել «Երևան-Կենտրոն» ՔԿՀ-ում զննել Գագիկ Խաչատրյանին․ հայտարարություն ՇՏԱՊ. Որպես անհետ կորած որոնվում է 2011թ. ծնված Անի Գևորգյանը Գագիկ Խաչատրյանի փաստաբանները պարզաբանում են ներկայացրել 193 գույքի և պարտատոմսերի վերաբերյալ Փաշինյանը սկսեց «ձեռ առնել» Սուրիկ Խաչատրյանին. «Մարդու իրավունքների մեծ պաշտպան է» Նեկրոդատավարությունների երկիր Հայաստան