Եթե անձրև այդպես էլ չգա, ստիպված կլինենք տարհանել Թեհրանը․ Իրանի նախագահ

Իրանի նախագահ Մասուդ Պեզեշքիանը զգուշացրել է Թեհրանի հնարավոր տարհանման մասին, եթե երկարատև երաշտի պատճառով առաջացած ջրային ճգնաժամը ավելի վատթարանա։

Իթիմադ թերթի փոխանցմամբ՝ Պեզեշքիանը այս հայտարարությունն արել է երկրի արևմուտքում գտնվող Սանանդաջ քաղաք կատարած աշխատանքային այցի ժամանակ։ Տեղական իշխանությունների հետ հանդիպման ժամանակ ելույթ ունենալով՝ նա անդրադարձել է երկրում առկա մի շարք տնտեսական և սոցիալական խնդիրների։

Պեզեշքիանը նշել է, որ բարձր գնաճը ներքին կառավարման սխալների և արտաքին պատժամիջոցների արդյունք է։ «Գնաճի և բարձր գների պատասխանատվությունը կրում են խորհրդարանը և կառավարությունը։ Աշխատանքներն ընթացքի մեջ են, բայց ֆինանսական սահմանափակումները մեզ խանգարում են ավարտել նախագծերը», - ընդգծել է նախագահը։

Նա հատուկ ուշադրություն է դարձրել բազմամյա երաշտի պատճառով ջրամատակարարման հետ կապված ճգնաժամային իրավիճակին։ «Իրանը բախվում է բնական մարտահրավերների՝ տեղումների դեֆիցիտի և ջրային ռեսուրսների սպառման, որոնք հղի են լուրջ հետևանքներով», - ասել է Պեզեշքիանը։

Ընդգծելով ջրի և էներգիայի խիստ խնայողության և ռեսուրսների ավելի ռացիոնալ կառավարման հրատապ անհրաժեշտությունը՝ նախագահը կենտրոնացել է մայրաքաղաքում տիրող մտահոգիչ իրավիճակի վրա։ «Եթե մոտ ապագայում անձրև չգա, մենք ստիպված կլինենք Թեհրանում ջրի խիստ սահմանափակումներ մտցնել հաջորդ ամսվանից սկսած։ Իսկ եթե տեղումներ այդպես էլ չլինեն, պաշարները կսպառվեն, և մենք ստիպված կլինենք սկսել քաղաքի տարհանում», - հայտարարել է Իսլամական Հանրապետության նախագահը։

Թեհրանը ջրով մատակարարվում է հինգ խոշոր ջրամբարներից՝ Լարից, Մամլուից, Էմիր Քեբիրից, Թալիկանից և Լաթիանից, որոնցից ամենամեծը Էմիր Քեբիրի ամբարտակն է։

Վերջին հինգ տարիների ընթացքում երկրում տեղումների կայուն նվազում է նկատվել։ Օդերևութաբանական տվյալների համաձայն՝ այս տարի Թեհրանում տեղումների քանակը 40%-ով պակաս է եղել, քան սեզոնային միջին ցուցանիշը։ Գարնանը և ամռանը անձրևների գրեթե լիակատար բացակայությունը հանգեցրել է ջրամբարների ջրի մակարդակի աղետալի նվազմանը։

Այս թեմայով Եվրասիայի աշխարհաքաղաքական քարտեզը մտնում է նոր վերաձևավորման փուլ.Թեհրան–Մոսկվա–Երևան ռազմավարական եռանկյունի Հայաստանը՝ հակաիրանական ահաբեկչության թիրա՞խ Պուտինը շուտով կարող է այցելել Թեհրան Թեհրանը ոտնձգություններ թույլ չի տա Հայաստանի և Իրանի սահմանի նկատմամբ Պուտինը կմեկնի Թեհրան