Սերժ Սարգսյանին վերաբերող երկու քրգործերը միացվեցին մեկ վարույթում․ դատավորը Գիվի Հովհաննիսյանն է

Հակակոռուպցիոն դատարանում այսօր՝ հոկտմբերի 29-ին, դատավոր Խաչիկ Ղազարյանի նախագահությամբ տեղի ունեցավ ՀՀ 3-րդ նախագահ Սերժ Սարգսյանի, Բարսեղ Բեգլարյանի և Գևորգ Հարությունյանի գործով դատական նիստը։

24News-ի փոխանցմամբ, Սերժ Սարգսյանի պաշտպան Ամրամ Մակինյանը միջնորդություն ներկայացրեց դատարանին, որով առաջարկեց այս գործը և Հակակոռուպցիոն դատարանում Սերժ Սարգսյանի մյուս քրեական գործը, որը քննում է դատավոր Գիվի Հովհաննիսյանը, միացվի մեկ վարույթում։

«Պաշտպանական կողմը գտնում է, որ առկա են երկու քրեական գործերը մեկ վարույթում միացնելու հիմքեր։ Մեկ վարույթում կարող են միացվել նույն անձի կողմից մեկից ավելի ենթադրյալ հանցանքներ կատարելու վերաբերյալ վարույթները։ Նույն դատարանում մեկից ավելի դատավորների մոտ գտնվող վարույթները միացվում են տվյալ դատարանի նախագահի որոշմամբ՝ դատավորներից մեկի դիմումի հիման վրա։ Վարույթները միացնելու դեպքում մեղադրանքը քննում է այն դատավորը, որը քրեական գործն ավելի վաղ է ընդունել վարույթ։ Վարույթների միացումը չի կարող բացասաբար անդրադառնալ վարույթի արդարացիության վրա, հակառակը՝ դատարանը նվազագույն դատական ծախսերի կատարումով կարոք է քննել այս գործերի վերջնական ընթացքը։ Ուստի, միջնորդում եմ՝ Ձեր վարույթում քննվող դատական գործը միացնել Գիվի Հովհաննիսյանի վարույթում քննվող գործին»,-դատարանում ասաց Ամրամ Մակինյանը։

Նշենք, որ Խաչիկ Ղազարյանը հանդիսանում է Հակակոռուպցիոն քրեական դատարանի նախագահ, այդ իսկ պատճառով միջնորդությունը ներկայացվեց նրան։ Դատավարության մյուս կողմերը չառարկեցին երկու քրեական գործերը միացնել։ Դատավորն ընդգծեց, որ գործի ծավալն ավելի կմեծանա և քննությունն ավելի երկար կտևի։

Հանրային մեղադրողը նշեց, որ սա վարույթն իրականացնող մարմնի կազմակերպչական լիազորություններից մեկն է։

«Քանի որ այս գործի դատաքննությունը նորից է սկսվում, ես կարծում եմ, որ գործերի միացումը որոշակիորեն կարող է անդրադառնալ արդար դատաքննության իրավունքի սահմանափակմանը կամ խախտմանը, քանի որ արդար դատաքննության բաղադրատարրերից մեկը ողջամիտ ժամկետում գործի քննության պայմանն է»,-նշեց դատախազը, ով շարունակեց, թե գործերի միացումը նպատակահարմար չի։

Քննարկման արդյունքում դատարանը բավարարեց Ամրամ Մակինյանի միջնորդությունը։ Սերժ Սարգսյանի երկու քրեական գործերը միացվեցին մեկ վարույթում, գործը կքննի դատավոր Գիվի Հովհաննիսյանը։

Այս թեմայով Հազար նոր ավտոբուս էլ բերենք, պիկ ժամերին հնարավոր է քչություն անի. Աշոտ Սարգսյան ՔՊ-ի կեղտոտ սպիտակեղենը փռել են արեւին Հայկ Սարգսյանն ասեց՝ պապայի ընկերն ա, կարա՞ գա. Սիմոնյանը մանրամասներ է պատմում քրեական հեղինակության հետ հանդիպումից Արդարադատությունը քնում է, բայց չի մահանում․ ԸՆԿԵՐ ՓԱՆՋՈՒՆԻ 20 մլրդ դրամ Հայկ Սարգսյանի պատճառով չի մտնի պետբյուջե. Oragir.News