ՕԳՆԵԼ Է ԲԱԶՄԱԹԻՎ ՎԻՐԱՎՈՐՆԵՐԻ, ՀԵՐՈՍԱԲԱՐ ԱՆՄԱՀԱՑԵԼ Է ԱՆՕԴԱՉՈՒ ԹՌՉՈՂ ՍԱՐՔԻ ՀԱՐՎԱԾԻՑ». ԱՆՄԱՀ ՀԵՐՈՍ ՀՈՎՀԱՆՆԵՍ ԳՐԻԳՈՐՅԱՆ

«2020 թվականի Արցախյան 44-օրյա ահաբեկչական պատերազմում ցավոք կորցրեցինք հազարավոր լուսավոր երիտասարդների, նրանցից մեկն էլ ՀՈՎՀԱՆՆԵՍ ԿԱՌԼԵՆԻ ԳՐԻԳՈՐՅԱՆՆ էր։

Այսօր, հոկտեմբերի 28-ը նրա ծննդյան օրն է, կդառնար 30 տարեկան։ Անմահ հերոսի հուշարձանին են այցելել հարազատներ, ընկերներ, որդեկորույս ծնողներ, ծաղիկներ խոնարհել ու խնկարկել։Անմահ հերոսի բարեկամուհին, Iravunk. com -ի հետ զրույցում նշեց.

«Հովհաննեսը ծնվել է 1995 թվականի այս օրը, հոկտեմբերի 28-ին, Սյունիքի մարզի Սիսիան քաղաքում։ Բարձր առաջադիմությամբ ավարտել է Սիսիանի Արշակ Գրիգորյանի անվան թիվ 1 հիմնական դպրոցը և ընդունվել Երևանի Պոլիտեխնիկական ինստիտուտ, զուգահեռ վերապատրաստվել է Արմենակ Խանփերցյանի անվան ավիացիոն ինստիտուտում, որն ավարտելուց հետո ծառայության է անցել Արցախի ՊԲ զորամասում, որպես ռադիոդասակի հրամանատար։ Ծառայության ընթացքում վայելել է թե ծառայակից ընկերների, թե ավագ սպայակազմի, թե ենթակաների սերն ու հարգանքը։ Նրա մասին ընկերներն ակնածանքով են խոսում, նաև մեծ հպարտությամբ.

«Հովհաննեսի մասին կարող ենք ասել, որ իրական հերոս էր, մարդ, ում հայրենասիրության, ծառայության ու կարճատև կյանքի մասին արժե ու պետք է ֆիլմ նկարահանել...»

Չարաբաստիկ 2020-ի սեպտեմբերի 27-ին, լույսի հետ պայթեց պատերազմը, Հովհաննեսը «Եղնիկներում» էր, կատարում էր ծառայությունը, ինչպես միշտ գերազանց, անդադար և առանց հանգստի։ Նա լինում էր այնտեղ, ուր վիճակը ծանր էր, ինչպես ծառայակից - մարտական ընկերներն են պատմում, Հովհաննեսն ամեն վայրկյան պատրաստ էր ցանկացած հանձնարարության, պատերազմի թեժ օրերին եղել է Մատաղիսում, Աղդամում, Արցախի Հարավային հատվածում։ Մարտական ընկերները պատմում են, որ տանկերից մեկը վթարվել ու մնացել էր մարտադաշտում, Հովհաննեսը մի ընկերոջ հետ մտել է մարտադաշտ, մեկ օրից ավել փնտրել, գտել տանկը, նորոգել են դուրս եկել, փրկելով թե անձնակազմը, թե տանկը։ Հոկտեմբերի 9-ին, Վարանդայում նենգ թշնամու անօդաչուի հարվածից այրվում է բեռնատարը, Հովհաննեսը շտապում է օգնության, օգնում է բազմաթիվ վիրավորների , քիչ անց լինում է երկրորդ հարվածը և անմահանում է հերոսաբար, ավագ լեյտենանտ Հովհաննես Գրիգորյանը, ազգը կորցնում է հավասարակշռված, բարձր մասնագիտական հմտություններով ու ամենակարևորը մարդկային բարձր որակներով օժտված հայ սպայի։ Հովհաննես Գրիգորյանը, պատերազմում ցուցաբերած խիզախության համար հետմահու պարգևատրվել է «Մարտական խաչ» 2 - րդ աստիճանի շքանշանով։

ՀԱՎԵՐԺ ՓԱՌՔ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Այս թեմայով 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան CNN. ԱՄՆ-ն քիչ էր մնացել, որ պատերազմ սկսեր Չինաստանի հետ ՆԱՏՕ-ն պատրաստվում է պատերազմ սկսել Ռուսաստանի հետ 2029թ.-ին. ՌԴ ԱԳՆ Եթե Ռուսաստանի և Եվրոպայի միջև պատերազմ սկսվի, ապա այն կլինի միջուկային. Լավրով ԱՄՆ–ին կհաջողվի՞ իրանում քաղաքացիական պատերազմ հրահրել