Մեզ սպասվում է պատերազմ. Եղիշե Մելիքյան

Աշխարհի 2026թ. առաջնության եվրոպական գոտու որակավորմանլ փուլի F խմբի 4-րդ տուրում Հայաստանի հավաքականը Դուբլինի «Ավիվա» մարզադաշտում կմրցի Իռլանդիայի ընտրանու հետ։

Հայաստանի ազգային ընտրանու գլխավոր մարզիչ Եղիշե Մելիքյանը նախախաղային մամուլի ասուլիսի ընթացքում պատասխանել է լրագրողների հարցերին։ 

«Կա ակումբը և հավաքականը գլխավորելու էական տարբերություն: Առաջին հերթին, ես պատասխանատու մարդ եմ, և ակումբում աշխատելիս նույնպես զգում էի պատասխանատվություն: Սակայն ազգային հավաքականի մարզիչ լինելը բոլորովին այլ մակարդակի պատասխանատվություն է: Տարբերությունը ոչ միայն աշխատանքի բնույթի մեջ է, այլև հոգեբանական մոտեցման: Ակումբում դու աշխատում ես ֆուտբոլիստների հետ, որոնք կապված են պայմանագրերով, և դու գիտես, թե ինչ պահանջել նրանցից: Իսկ ազգային հավաքականում խաղացողները հրավիրվում են հրավերով, այստեղ ֆինանսական հարցեր չկան: Այս դեպքում կարևոր են նվիրվածությունը և հայրենասիրությունը, որոնց վրա պետք է հիմնվել և աշխատել: Կարող եմ բերել նաև այլ օրինակներ, բայց սա է հիմնական միտքը:

Հայաստանի ազգային հավաքականը խաղում է հայ ժողովրդի համար: Հաշվի առնելով սփյուռքը՝ արտերկրում խաղալիս մենք ավելի շատ մտածում ենք նրանց մասին, որպեսզի օտար երկրում իրենք իրենց լավ և հպարտ զգան: Տանը խաղալիս մենք խաղում ենք Հայաստանի հայերի համար, որպեսզի ցույց տանք հաղթողի հոգեբանություն: Երկու դեպքում էլ մեր նպատակն է ոգևորել մեր հայրենակիցներին:

Երբ մենք տանը հաղթեցինք Իռլանդիային, ես ասացի, որ նրանց մոտ խաղալիս լինելու է բոլորովին այլ ֆուտբոլ: Մենք հոգեբանորեն պատրաստվել ենք, քանի որ գիտենք, որ այս խաղը մեզ համար շատ դժվար է լինելու: Մրցակիցը նախորդ խաղում պարտվել է և հասկանում է, որ սա իր վերջին հնարավորություններից մեկն է: Նրանք գիտակցում են, որ պետք է հաղթեն՝ մրցաշարում շանսեր պահպանելու համար: Մենք լավ հասկանում ենք նրանց մոտիվացիան և գիտենք, որ խաղը 100 տոկոսով տարբեր է լինելու: Մենք հոգեբանորեն պատրաստ ենք:

Ես խոսում էի հենց այդ մասին՝ ընդգծելով, որ գիտակցում ենք մրցակցի լրջությունը, նրանց մոտիվացիան և պատասխանատվությունը: Մենք նույն իրավիճակում ենք: Երկու թիմերն էլ վերջին խաղերում պարտվել են, կորցրել են կարևոր միավորներ: Ե՛վ մենք, և՛ մրցակիցը հասկանում ենք, որ այս երեք միավորները կարևոր նշանակություն ունեն: Այդ պատճառով վաղը մեզ սպասվում է պատերազմ: Թե ով կհաղթի՝ վաղը ցույց կտա»,- նշել է Մելիքյանը։

Հանդիպումը կկայանա վաղը՝ հոկտեմբերի 14-ին, Երևանի ժամանակով 22։45-ին։ 

Այս թեմայով «Ժողովուրդ». Գլխավոր մարզիչ Եղիշե Մելիքյանի մայբախը խոշոր վթարի կենտրոնում. վարույթ կա Ես հավատում եմ պրոֆեսոր Էդիկ Մինասյանի անմեղությանը․ Մելիքյան Ես հավատում եմ պրոֆեսոր Էդիկ Մինասյանի անմեղությանը․ Մելիքյան «Գայլն ու գառը» տրամաբանությամբ ՔՊ-ի հետ հարաբերվելը միշտ հանգեցնում է «գառան խաշլամայի»․ Մելիքյան Եկեղեցամարտության խարան․ Տեր Վահրամ ավագ քահանա Մելիքյան