Մանկական արվեստի թանգարանը վերաբացվել է

Վերաբացվել է Հենրիկ Իգիթյանի անվան գեղագիտության ազգային կենտրոնի Մանկական արվեստի թանգարանը: Երկար տարիներ անց վերջապես թանգարանին են վերադարձվել իր իրական տարածքները, եւ այսուհետ այն կգործի իր ողջ ներուժով:

Վերանորոգման, ֆունկցիոնալ առումով վերաիմաստավորման ու վերազինման աշխատանքներից հետո՝ Մանկական արվեստի թանգարանն այսօր ներկայանում է նոր շնչով ու հնարավորություններով, բայց հավատարիմ իր հիմնադիրների՝ Հենրիկ Իգիթյանի եւ Ժաննա Աղամիրյանի սկզբունքներին ու տեսլականին: Հենց նրանք 1968 թվականին Նկարիչների տանը բացված «Աշխարհը երեխաների աչքերով» ցուցահանդեսով դրեցին աշխարհում առաջին մանկական պատկերասրահի հիմնաքարը՝ բերելով նոր մշակույթ ու կոնցեպտ:

Թանգարանը մանկական երեւակայության, վառ ձեւերի ու գույների խտացման վայր է: Այստեղ ներկայացված են Գեղագիտության ազգային կենտրոնի բոլոր տարիների սաների լավագույն աշխատանքները, տարբեր թեմաներով արված նախագծեր, թանգարանի «ոսկե ֆոնդը», շուտով կվերաբացվի նաեւ միջազգային բաժինը: Ցուցադրված աշխատանքների հեղինակներն արդեն վաղուց երեխա չեն, նրանցից ոմանք այսօր հայտնի անուններ են մեծ արվեստի աշխարհում: Ներկայացված են նաեւ այսօր իրենց մանկությունն ապրող երեխաների գունեղ գործերը: Հիմնական ցուցադրությունից բացի, թանգարանի առաջին սրահում պարբերաբար անցկացվելու են նաեւ ժամանակավոր ցուցահանդեսներ: Վերաբացման առթիվ այնտեղ ցուցադրվում է «Սասնա ծռեր» էպոսին նվիրված բազմաժանր ցուցադրությունը:

Հայաստանի մանկական արվեստի թանգարանում այսուհետ ոչ միայն կարող եք դիտել երեխաների կողմից ստեղծված արվեստը, այլեւ ինքներդ ստեղծել արվեստ: Այստեղ կան աշխատարանների, վարպետության դասերի, արվեստային տարբեր միջոցառումների համար նախատեսված տարածքներ տարբեր տարիքի անձանց համար: Այդ ամենն իրականացվելու է «Արտակարգ» արվեստի հարթակի միջոցով: Այն հիմնադրվել է հստակ ու հավակնոտ առաքելությամբ՝ ստեղծելու նորարարական, ներառական եւ բազմաֆունկցիոնալ մշակութային ու կրթական տարածք, որտեղ տարբեր տարիքի, մասնագիտության եւ հետաքրքրությունների տեր մարդիկ կարող են ուսումնասիրել, արտահայտվել եւ զարգանալ արվեստի փոխակերպող ուժի միջոցով։ «Արտակարգ» արվեստի հարթակի առանցքում Գեղագիտության ազգային կենտրոնի հարուստ մանկավարժական փորձը, միջազգային համագործակցությունները եւ մանկական արվեստի խթանման համաշխարհային նվաճումներն են։ Այդ ամենը հիմնված է կենտրոնի հարուստ ժառանգության վրա, որն ավելի քան հինգ տասնամյակ Հայաստանի մշակութային եւ կրթական ոլորտի անկյունաքարն է:

Մանկական արվեստի թանգարանում գործելու է նաեւ գրադարան-գրախանութ, որտեղ կարող եք ոչ միայն ուսումնասիրել արվեստին առնչվող տարատեսակ գրականություն, այլեւ ձեռք բերել Գեղագիտության ազգային կենտրոնի տարբեր տարիների լավագույն հրատարակությունները:

Բովանդակային վերազինումից բացի, Թանգարանը վերանորոգումից հետո ֆիզիկապես դարձել է ներառական ու մատչելի տարածք բոլորի համար: Ներդրվել է վերելակ, որի օգնությամբ բոլորն առանց խոչընդոտների կկարողանան շրջել թանգարանի երկու հարկերով ու սրահներով:

Մանկական արվեստի թանգարանի վերածնունդը հնարավոր է դարձել «Հովնանյան» հիմնադրամի աջակցությամբ եւ Artbox HUB ծրագրի շրջանակներում տրամադրված դրամաշնորհով: Artbox-ը ստեղծվել է Creative Armenia-ի կողմից եւ իրականացվում է Հայաստանում Եվրոպական միության ֆինանսավորմամբ ու ՀԲԸՄ Հայաստանի հետ համագործակցությամբ «Կատապուլտ» ստեղծարար ակսելերացիոն ծրագրի շրջանակներում։

Համեցեք Մանակական արվեստի թանգարան՝ ոգեշնչվելու եւ արարելու: Մուտքը՝ Սայաթ-Նովա փողոցի կողմից:

Այս թեմայով 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Տուվայում տղամարդը հարձակվել է մանկական ճամբարի վրա Ստեփան Զորյանի տուն-թանգարանի կենդանացվել է «Մենավոր ծառը» Չեխովյան փոքր պաշտոնյայի մեծ ողբերգությունն «Արմմոնո-24»-ում Էդիտա Գզոյանի հարկադիր հեռացումը մտահոգիչ է․ հայ և օտարազգի ցեղասպանագետների բաց նամակը