Ռուսաստանը պատրաստ է Ուկրաինայի շուրջ բանակցությունների. Պեսկով

Ռուսաստանը կնախընտրեր Ուկրաինայի շուրջ ստեղծված իրավիճակը կարգավորել դիվանագիտական ​​ճանապարհով և պատրաստ է բանակցությունների, լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։ Այդ մասին «Արմենպրես»-ը տեղեկանում է ՏԱՍՍ գործակալությունից:

Նա այդ մասին հիշատակել է՝ ճեպազրույցում մեկնաբանելով ԱՄՆ նախագահ Դոնալդ Թրամփի խոսքը Մոսկվայի դեմ հնարավոր պատժամիջոցների մասին և ՆԱՏՕ-ի բոլոր անդամներին ռուսական նավթից հրաժարվելու կոչը։

«Մենք պահպանում ենք մեր դիրքորոշումը, մենք պահպանում ենք բաց լինելու սկզբունքը բանակցային գործընթացի համար։ Մենք նախկինի նման հայտարարում ենք, որ մեզ համար նախընտրելի է ուկրաինական ճգնաժամի կարգավորումը քաղաքական- դիվանագիտական ​​միջոցներով։ Ուստի այստեղ, մեր դիրքորոշումը լավ հայտնի է, այն ոչ մի կերպ չի փոխվել», – ասել է Կրեմլի ներկայացուցիչը։

Մեկնաբանելով ԵՄ-ի կողմից սահմանափակող միջոցառումների նոր փաթեթի նախապատրաստումը՝ Պեսկովը հայտարարել է, որ Եվրամիությունը և նրա շատ անդամ երկրներ առանձին շարունակում են թշնամական գիծը Ռուսաստանի դեմ՝ սխալմամբ կարծելով, թե պատժամիջոցները կարող են ազդել Մոսկվայի դիրքորոշման վրա: Նա ընդգծել է, որ Ռուսաստանը ենթակա չէ այդ պատժամիջոցների ազդեցությանը:

«Վերջին երեք տարիներին դա պերճախոս կերպով ցույց են տվել նախորդ 18 փաթեթները», – ասել է նա՝ նշելով, որ այդ պատժամիջոցներն, ակնհայտորեն, վնաս են հասցրել հենց Եվրամիության տնտեսությանը:

Այս թեմայով Իրոք, մենք հարգանքով ենք վերաբերվում Հայաստանի բոլոր ինքնիշխան իրավունքներին․ Պեսկով Կա պայմանավորվածություն, որ Փաշինյանի՝ Մոսկվա այցը տեղի կունենա մոտ ապագայում․ Պեսկով Զելենսկին կարող է գալ Մոսկվա, եթե ցանկանում է հանդիպել Պուտինի հետ. Պեսկով Մոտ ապագայում ակնկալում ենք եռակողմ հանդիպում, բայց նոր առաջարկներ չկան. Պեսկով Ռուսաստանը պատրաստ է խաղաղության հասնել Ուկրաինայում, ամեն ինչ կախված է Կիևից․ Պեսկով