«Ժողովուրդ». Դասագրքերի տպագրությունը ԿԳՄՍՆ-ն տապալում է, բայց բյուջեի միջոցները շռայլորեն բաշխում է անհասկանալի համերգների համար

«Ժողովուրդ» օրաթերթը գրում է. «ՀՀ ԿԳՄՍ նախարարությունը «Ֆեստիվառ» մշակութային նախագծի համար 311 մլն 785 հազար դրամ (մոտ 820 հազար ԱՄՆ դոլար) գումար է հատկացրել։

«Ֆեստիվառ» փառատոնը կազմակերպվում է ԿԳՄՍ նախարարության աջակցությամբ եւ իրականացվում է Հանրային հեռուստաընկերության կողմից։ Արդեն երրորդ տարին անընդմեջ այն կայանում է՝ նպատակ ունենալով խթանել ներքին զբոսաշրջությունն ու մարզային մշակութային կյանքը:

Նախորդ տարի «Ֆեստիվառ» նախագծի համար վճարվել էր 180 մլն դրամ, իսկ այս տարի գումարի չափը գրեթե կրկնապատկվել է, քանի որ ԿԳՄՍՆ-ն ու Հանրային հեռուստաընկերությունը նաեւ վճարել են որոշ արտիստների՝ Հայաստան ժամանելու եւ մեկնելու ծախսերը։

Սեպտեմբերի 21-ին՝ Հայաստանի անկախության օրը, Արմավիրի կենտրոնական հրապարակում Հայաստանի պետական սիմֆոնիկ նվագախմբի նվագակցությամբ հանդես կգան տարբեր արտիստներ։ Ինչպես «Ժողովուրդ» օրաթերթը տեղեկանում է ՀՀ Պետական գնումների կայքից, միայն Արմավիրի համերգային ծրագրի համար հատկացվել է 109 մլն դրամ։

Այսպիսով՝ ծրագրի երաժշտական նվագախմբում ընդգրկված 70 անձի վճարվելու է 8,5 մլն դրամ.

9 երգեր նոտագրվելու են, ինչի համար հատկացվել է 2,7 մլն դրամ,
դիրիժորի հոնորարը կազմել է 2 մլն դրամ,
երգչուհի Սոնա Ռուբենյանի 1 ելույթը՝ 600 հազար դրամ,
երգչուհի Իվետա Մուկուչյանի 1 ելույթը՝ 1 մլն 170 հազար դրամ,
երգիչ Էրիկ Կարապետյանի 1 ելույթը՝ 1 մլն 170 հազար դրամ,
«Գարիկ Պապոյան եւ Սոնա Ռուբենյան» խմբի ելույթը՝ 2,1 մլն դրամ,
երգչուհի Մաշա Մնջոյանի ելույթը՝ 600 հազար դրամ,
երգչուհի Բրյունետի ելույթը՝ 1 մլն 170 հազար դրամ,
«Նեմրա» խմբի ելույթը՝ 1 մլն 170 հազար դրամ,
երգչուհի Ժակլինի ելույթի համար վճարվել է 1 մլն 378 հազար դրամ։

Բացի ելույթի վճարից՝ միջոցառման կազմակերպիչները 562 հազար դրամ հատկացրել են Ժակլինի՝ Փարիզ-Երեւան-Փարիզ չվերթի ավիատոմսերի համար, 300 հազար դրամ նրան տրամադրել են ՀՀ-ում 4 օր մնալու համար, ու եւս 31 հազար դրամ՝ Երեւան-Արմավիր-Երեւան ուղեւորափոխադրման համար։

«Ռեինկարնացիա» խմբի ելույթի համար վճարվել է 6 մլն դրամ։

Այս միջոցառման գովազդային եւ տպագրական ծախսերի, առաջխաղացման կազմակերպման ծառայությունների համար հատկացվել է 10,8 մլն դրամ։

Կարճ ասած՝ դասագրքերի տպագրությունը ԿԳՄՍՆ-ն տապալում է, բայց պետբյուջեի միջոցները շռայլորեն բաշխում է համերգներ կազմակերպելու համար»:

Առավել մանրամասն թերթի այսօրվա համարում

Այս թեմայով Լրացուցիչ 94,6 մլն դրամ կհատկացվի վարչապետի աշխատակազմի գործուղումների համար Արտահանողներին և մթերողներին աջակցելու համար կառավարությունը 4,5 մլրդ դրամ հատկացրեց ՀՐԱՏԱՊ. Վարդանի շուրջ 19-ամսյա կալանքը նշանակում է արդեն հարյուր հազարավոր դոլարների հանրային միջոցների ծախս 8000 արցախցի ստացել է բնակարանի սերտիֆիկատ, բայց իրացվել է միայն 4000-ը. Գեղամ Ստեփանյան Ucom-ի աջակցությամբ AI տեսախցիկ է տեղադրվել բնության պահպանության համար