Մինչ օրս պատասխան չեմ ստացել ոչ Ալեն Սիմոնյանից եւ ոչ էլ խմբակցություններից. Ալբերտ Մովսիսյան

Մեկնարկեց Երեւանի ավագանու աշնանային  նստաշրջանը: Ինչպես միշտ հնչեցին տարաբնույթ հարցեր` կապված Երեւան քաղաքի, տրանսպորտի, օդի աղտոտվածության եւ այլնի վերաբերյալ: Ի դեպ, նախքան հիմնական ավագանու նիստը՝ տեղի են ունենում հանձնաժողովների նիստեր, որտեղ ավագանիները քննարկում եւ քվեարկում են՝ այս կամ այն նախագծին տալով դրական կամ բացասական եզրակացություն:

Ավելի վաղ անկախ ավագանու անդամ Ալբերտ Մովսիսյանն  իր վրդովմունքն էր հայտնել առ այն, որ անկախ ավագանու անդամները օրենքով սահմանված իրավունք չունեն մասնակցելու հանձնաժողովների նիստերին: Ավելի հստակ՝  ներկա գտնվել կարող են, սակայն քվեարկել, կարծիք հայտնել, առարկել՝ ոչ: Մովսիսյանը խնդրել էր հարցը դնել քննարկման եւ լուծում տալ` հնարավորություն տալով անկախ ավագանիներին եւս խոսքի իրավունք ունենալ եւ տարբեր նախագծերի վերաբերյալ կարծիք արտահայտել հանձնաժողովում՝ քվեարկությամբ:

Հիշեցնենք, որ այս հարցին անդրադառնալով՝ Երեւանի ավագանու ՔՊ խմբակցության  ղեկավար Արմեն Գալջյանը Մովսիսյանին պատասխանել էր, որ նման իրավասություն քաղաքապետարանը չունի, եւ հարցը պետք է քննարկվի Ազգային ժողովում: Թե ինչ լուծում ստացավ անկախ ավագանու անդամի բարձրացրած հարցը, «Իրավունք»-ը պարզեց ԱԼԲԵՐՏ ՄՈՎՍԻՍՅԱՆԻՑ:

— Ձեր կողմից բարձրաձայնած խնդիրն առ այն, որ Դուք օրենքով զրկված եք մասնակցելու որեւէ հանձնաժողովի նիստի եւ որոշում կայացնելու, այժմ ի՞նչ փուլում է:

— Այո՛, ես խնդիրը բարձրաձայնեցի, սակայն ինչպես լինում է հիմնականում՝ հնչեց պատասխան, որն արժեք չուներ: Այսինքն՝ ուղղությունն այլ կողմ գնաց: Ինձ ասացին, որ պետք է այս հարցով դիմեմ ԱԺ: Ես դիմեցի Ալեն Սիմոնյանին եւ երեք խմբակցություններին,  որպեսզի անկախ ավագանու իրավունքները վերականգնվեն, եւ օրենքի այս բացը լրացվի: ԱԺ դիմել եմ ամիսներ առաջ եւ մինչ օրս պատասխան չեմ ստացել՝ ո՛չ Ալեն Սիմոնյանից եւ ո՛չ էլ խմբակցություններից: Այսինքն, այս ամենից ես կարող եմ եզրակացնել, որ գործող ընդդիմադիր ուժերից որեւիցե աջակցություն` անկախ ավագանիների հետ կապված, չկա:  Սակայն պայքարելու եմ մինչեւ վերջ, որպեսզի աչալուրջ լինեն եւ նմանատիպ բացերը լրացվեն:

— Սկսվել է Երեւանի ավագանու աշնանային նստաշրջանը: Ի՞նչ նոր առաջարկներով եւ ծրագրերով եք հանդես գալու:

— Ասեմ, որ խնդիրները բազում են, որոնցից ակտուալը Երեւանի օդի աղտոտվածությունն է եւ հանրային տրանսպորտը: Չմոռանանք խցանումների մասին: Մեր  «հարգարժան» Տիգրան Ավինյանի շնորհիվ քաղաքում աբողջովին խցանումներ են: Մեկ պարզ օրինակ բերեմ՝ Տիգրան Մեծ պողոտայից մինչեւ հասնում ես մյուս հատված կարող է տեւել մեկուկես ժամ: Էլ չասեմ Արգիշտի փողոցի հետ կապված, որը խցանումները հասնում են կիլոմետրերի: Ինչպես նաեւ խնդիր է նորակառույց շեքների ծավալն ու քանակը, որը ողջ քաղաքը պատում է փոշու մեջ: Չմոռանանք ջրամատակարարման մասին: Այսինքն՝  հիմա ես կարող եմ բազում խնդիրներ թվարկել, սակայն այդ խնդիրները լուծելու համար քայլեր են հարկավոր, միայն ելույթներով չէ: Եթե չի կատարվում քայլ, ապա դա հավասարազոր է զրոյի: Ի դեպ, շատերն են նման կերպ անում՝ ելույթ են ունենում եւ մոռանում հարցի ու խնդրի մասին: Պետք է խիստ հետեւողականություն դրսեւորենք, որպեսզի հարցերը ստանան իրենց լուծումները:

— Ինչպես ասացիք, հարցերը բազմաշերտ են, իսկ երեւանցին ինչպե՞ս դիմի անկախ ավագանու անդամին՝ իր հուզող հարցերով:

— Քաղաքացիները միշտ դիմում են ինձ եւ չնայած այն հանգամանքին, որ ես անկախ ավագանու անդամ եմ եւ գործում եմ միայնակ, միեւնույնն է, քաղաքացու կողմից հնչեցրած ոչ մի հարց անպատասխան չեմ թողնում: Անհամեստ չհամարեք, բայց ես՝ միայնակ, անում եմ մի ողջ խմբակցության աշխատանք: Կարեւոր եմ համարում ասել, որ քաղաքապետարանի պաշտոնական կայքում կա գրանցված իմ հեռախոսահամարը: Օրինակ, եթե խմբակցությունները թողնում են իրենց խմբակցության համարը, ապա ես թողել եմ իմ անձնական հեռախոսահամարը, որն անփոփոխ է եւ հասանելի ամեն ժամի:

ՆԱՆԱ ՍԱՐԳՍՅԱՆ

Այս թեմայով Այսօր 44-օրյա պատերազմում զոհված Ալբերտ Հովհաննիսյանի ծննդյան օրն է Հարկավոր է մարզային ուղեւորափոխադրամիջոցների կայանման վայրը փոխել․ Ալբերտ Մովսիսյան Հայկական կինոժառանգությունը օտարների ձեռքում. ո՞վ է պատասխան տալու ՇՏԱՊ. Որդուս կյանքը վտանգված է. Միհրան Մովսիսյան Տակնուվրա են արել ԱԱԾ գնդապետի կալանավորված որդու բանտախուցը․ ինչ են փնտրել